Adavana Lasi Tama Eiava Sina Lalodia Bada

GAU momo ese adavana lasi tama eiava sina edia nega bona goada ia haorea diba. Idia davaria hekwakwanai be momo herea. Edia ruma bese idia naria totona, namona be idia hekwarahi maduna idauidau idia huaia totona. Moni gaukara sibona idia karaia lasi, to sitoa dekenai idia lao, aniani idia nadua, ruma idia hagoevaia, bona tama eiava sina ena maduna idia huaia. Danu, natudia idia gorere neganai, hospital dekenai idia abia lao, nega idia atoa moale karadia totona, bona edia natudia edia lalona idia hagoadaia, bona bema hegeregere, sibodia totona nega idia atoa diba.

Hari inai negai, tama eiava sina sibona ruma besedia ena namba be ia bada daekau noho, bona nega momo taunimanima ese idia lalodia bada lasi. Sina ta ia gwau: “Nega momo unai bamona ruma besedia lau laloa lasi, ela bona lau danu be adavana lasi sina ta ai lau lao.” Dahaka oi karaia diba, unai amo oi hahedinaraia adavana lasi tama eiava sina oi lalodia bada? Idia oi laloa bada be namo, a? Edia dabu gaudia ita lalodia ena badina toi mani ita herevalaia.

Idia Ita Laloa Bada Ena Badina Haida

Adavana lasi tama eiava sina momo idia ura heduru idia abia. Mauri lagani 41 vabu ta, mai ena natuna rua, ia gwau: “Nega haida lau diba lasi dahaka do lau karaia, bona maduna momo lau huaia dainai lau lalometau.” Adavana ia mase, o adavana ese ia rakatania, eiava hekwakwanai ma haida idia vara dainai, adavana lasi tama eiava sina momo edia hemami be sina ta ena hemami bamona. Ia gwau: “Ai ura dikadika heduru ai abia, bona ai abia be namo!”

Unai oi karaia dainai do oi moale. Nega ta, ta oi durua ia sibona ese ia huaia diba lasi metau gauna ta umui huaia totona, a? Bema oibe, reana oi moale badina oi diba oi be ia dekenai heduru oi henia. Unai hegeregerena, adavana lasi tama eiava sina ese idia huaia maduna haida be nega haida idia metau, idia sibona ese idia huaia totona. Unai oi itaia neganai, namona be oi durudia, unai amo Salamo 41:1 ena hereva do oi hamomokania, ia gwau: “Ogogami taudia ia laloa tauna be namo.”

Unai ese Dirava ia hamoalea. Iamesi 1:27 ia gwau: “To Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia.” Unai siri ese adavana lasi tama eiava sinaa naria karana ia herevalaia danu. Heberu 13:16 ia gwau: “Kara namodia do umui laloaboio lasi, bona kohu lasi taudia danu, umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.”

Adavana lasi tama eiava sina ita lalodia bada ena badina toi ita herevalaia vadaeni, hari do ita tahua edena dala ai idia ita durua diba, bona edena bamona do ita diba ita karaia karana ese idia ia durua.

Edia Dabu Gaudia Ita Dibaia

Ita karaia diba gauna ta be adavana lasi tama eiava sina ita nanadaia, “Oi durua totona gau ta lau karaia diba, a?” To momokani, unai bamona ita henanadai neganai, ta be ena dabu gauna korikorina do ia gwauraia lasi. Ita herevalaia vadaeni bamona, Salamo 41:1 ia gwau, “ogogami taudia ia laloa tauna be namo.” Buka ta ia gwau, Heberu gado ai unai hereva ena anina ma ta be “gau ta oi lalohadailaia namonamo bona kara oi karaia.”

Unai dainai, idia durua dalana namona ita dibaia totona, namona be adavana lasi tama eiava sina ese idia davaria hahetoho oi laloa bada. Idia vara gaudia oi itaia namonamo, bona namo lasi unai gaudia oi laloa maragi. Sibona oi nanadaia, ‘Bema lau be adavana lasi tama eiava sina ta, dahaka heduru lau abia be namo?’ Momokani, adavana lasi tama eiava sina momo be oi do idia hamaoroa, idia davaria hekwakwanai do oi lalopararalaia lasi, to bema oi be idia ta, vadaeni edia hekwakwanai do oi lalopararalaia. To, bema oi hekwarahi edia noho dalana oi dibaia unai ese oi do ia durua, mai hebogahisi ida oi kara henidia totona.

Dirava Ena Haheitalai Hereadaena Tohotohoa

Iehova be mai lalokau ida adavana lasi tama eiava sina ia laloa bada, taunimanima bamona lasi. Baibel siri momo ese idia hahedinaraia Iehova Dirava ese vabu, tamana lasi natudia, bona adavana lasi tama eiava sina ia lalodia. Dirava ese idia ia kara henia dalana ita dibaia neganai, do ita diba edena bamona idia do ita durua. Inai kara badadia foa do ita herevalaia.

Edia hereva ita kamonai

Iehova ese idaunegai Israela taudia dekenai ia henia Taravatuna lalonai, ia gwau ia ese dabu taudia “edia tai do [ia] kamonai.” (Esodo 22:​22, 23) Edena bamona ena haheitalai namona oi tohotohoa diba? Nega haida adavana lasi tama eiava sina idia mamia idia be sibona idia noho, tau eiava hahine badana ta ia noho lasi idia hereva henia totona. Adavana lasi sina ta ia gwau: “Natudia be idia mahuta neganai, nega momo lau tai. Nega haida ia auka sibona noho karana lau haheaukalaia totona.” Bema hegeregere, adavana lasi tama eiava sina ta be ena hemami ia gwauraia hedinarai neganai, nega oi atoa diba ena hereva oi kamonai totona, a? Bema edia hereva oi kamonai namonamo, unai ese idia do ia durua tama eiava sina ena maduna idia huaia namonamo totona.

Hagoadaia herevadia ita gwauraia

Iehova ena lauma helaga amo ane helagadia eiava salamo idia torea, tomadiho negadiai Israela taudia be unai ane idia abia. Mani oi laloa, Israela dekenai idia noho vabu bona tamana lasi natudia be unai ane idia abia neganai, idia ia hagoadaia bona ia hadibadia Iehova be edia “tamana” bona “gimaia” Tauna bona idia do ia durua. (Salamo 68:​5, BHğ; 146:⁠9) Ita danu be hagoadaia herevadia ita gwauraia diba, adavana lasi tama eiava sina ese unai do ia laloaboio lasi. Ena be lagani 20 idia hanaia vadaeni, to adavana lasi sina ta ladana, Ruth, be tama ta ese ia gwauraia herevana ia laloatao, ia gwau: “Oi ese gaukara namona oi karaia emu natuna memero rua oi naridia totona. Unai bamona oi karaia noho.” Ruth ia gwau: “Ia amo unai hereva lau kamonai neganai, goada lau abia.” Oibe, “hereva namodia be muramura namona” bona adavana lasi tama eiava sina ta ia hagoadaia diba. (Aonega Herevadia 15:​4, Contemporary English Version) Adavana lasi tama eiava sina durudia totona, hanamoa hereva haida oi laloa diba, a?

Tauanina dalanai heduru henia

Iehova ese idaunegai Israela taudia dekenai ia henia Taravatuna ia gwau, hemataurai dalanai vabu bona tamana lasi natudia dekenai aniani bona heduru do idia henia. Unai dala amo, idia be “aniani hegeregere . . . idia ania” diba. (Deuteronomi 24:​19-21; 26:​12, 13) Ita danu be mai laloa maoromaoro bona hemataurai ida, tama eiava sina sibona idia noho ruma besedia ita durua diba. Uma eiava sitoa aniani be edia ruma dekenai oi laohaia diba, a? Emu dabua haida be adavana lasi tama eiava sina, eiava edia natudia dekenai oi henia diba, a? Eiava idia dekenai moni sisina oi henia, unai amo adavana lasi tama eiava sina ese ena ruma bese totona gau ma haida ia hoia diba, a?

Idia ita bamoa

Iehova ese Israela taudia ia haganidia, vabu bona tamana lasi natudia be idia karaia ariadia dekenai do idia lao bona unuseniai Israela taudia ma haida idia bamoa diba. Oibe, idia ia hamaoroa: “Do umui moale.” (Deuteronomi 16:​10-15) Hari inai negai danu, Baibel ese Keristani taudia ia hagania ‘edia ruma dekenai edia Keristani varavara taudia do idia abia dae,’ unai amo edia hebamo karana do idia moalelaia. (1 Petero 4:⁠9) Vadaeni, emu ruma dekenai tama eiava sina sibona ruma besena oi boiria diba, a? Aniani badana oi karaia be anina lasi. Iesu be ena turadia edia ruma ai ia noho neganai, idia ia hamaoroa, “Gau haida o tamona sibona be hegeregere.”​—⁠Luka 10:​42, NW.

Idia Ita Lalodia Bada Dainai Idia Moale

Kathleen, adavana lasi sina ta mai ena natuna toi, ia gwau inai aonega sisibana do lau laloaboio lasi, “Namo lasi oi laloa haida amo gau ta do oi abia; oi abia gaudia ibounai oi moalelaia.” Kathleen bamona, adavana lasi tama eiava sina momo idia abia dae edia natudia naria karana be sibodia edia maduna. Unai dainai, idia laloa lasi haida ese idia totona gau ta do idia karaia, to idia sibona ese idia karaia be namo. Ita daradara lasi, idia ese idia abia heduru ibounai idia moalelaia. Adavana lasi tama eiava sina dekenai laloa bada karana oi hahedinaraia dainai, oi bona idia be do umui moale, oi diba momokani Iehova Dirava ese “oi karaia karana dainai davana do ia henia.”​—⁠Aonega Herevadia 19:​17, New Century Version.

[Footnote]

[Picture on page 24]

Tama eiava sina sibona ruma bese ta be aniani totona oi boiria vadaeni, a? Unai oi karaia diba, a?