“Tamana Lasi Memero” Dekenai Lalokau Oi Hahedinaraia
1 Iehova be “tamana lasi memero edia tamana.” (Sal. 68:5, NW ) Israela besena dekenai ia henia taravatu amo ia hahedinaraia ia ese edia namo ia laloa bada, ia gwau: “Vabu, o tamana sinana lasi maragina ta dekenai hisihisi do umui henia lasi. Bema hisihisi umui henidia, vadaeni lau dekenai idia tai, be momokani edia tai do lau kamonai.” (Eso. 22:22, 23) Dirava ena taravatu lalonai unai bamona taudia edia dabu gaudia idia abia totona durua daladia ia gwauraia. (Deu. 24:19-21) Keristani mauri dalanai, tomadiho korikori taudia idia hagoadaia ‘tamana bona sinana lasi maragidia bona vabu edia hisihisi lalonai do idia naridia.’ (Iam. 1:27) Tamana eiava sinana sibona ia noho ruma besedia eiava tomadiho dalanai idia parara ruma besedia lalonai idia noho taudia dekenai edena bamona Iehova ena lalokau ita tohotohoa diba?
2 Lauma Dalanai Hadibaia: Bema oi be adavana lasi tama eiava sina, eiava oiemu adavana be abidadama lasi tauna, do oi hekwarahi oiemu natudia ida Baibel stadi oi karaia hanaihanai totona. To idia tubu namonamo totona hanaihanai mai anina Baibel stadi oi karaia be namo. (Aon. 22:6) Dina ta ta lalodiai idia ida lauma gaudia umui herevalaia be mai anina bada danu. (Deu. 6:6-9) Nega haida, reana do oi lalo-manoka, to oi hesiku lasi. “Iehova ena matahakani bona lalona biagua karana ai [emui natudia] do oi naridia” lalonai, Iehova oi noia goada bona heduru hereva oi abia totona.—Efe. 6:4, NW.
3 Baibel ese ia gwauraia maduna idauidau oi huaia totona bema heduru haida oi ura, oiemu ura be elda taudia dekenai oi hadibaia. Idia ese dala namodia haida idia gwauraia diba eiava oi idia durua diba lauma gaudia totona oiemu ruma bese ese do ia badinaia dala namona ta oi hegaegaelaia.
4 Haida Idia Durua Diba Dalana: Aposetolo taudia edia nega ai, Timoteo be Iehova ena hesiai gaukara ia karaia mai ena ura bada ida, herevana tomadiho dalanai ia parara ruma besena dekenai ia tubu daekau. Unai bamona ia vara ena badina badana ta be ia matamata negana ai iena sinana bona tubuna idia hekwarahi bada ia dekenai toretore helagadia idia hadibaia totona. (Kara 16:1, 2; 2 Tim. 1:5; 3:15) To, Keristani taudia ma haida ia bamoa ese namo ia havaraia danu, bona idia ta be aposetolo Paulo, ia ese Timoteo ia gwauraia “lauegu lalokau merona, mai ena kara momokani danu, Keriso ena mauri dalana lalonai.”—1 Kor. 4:17.
5 Hari inai negai danu, kongregesen lalonai lo tadikaka bona taihu be mai lalokau ida tamana lasi memero bona kekeni idia durua karana ese namo bada ia havaraia! Idia ta ta edia ladana oi diba, a? Keristani heboudia bona ma gabu haida dekenai idia ida oi hereva, a? Haroro gaukara lalonai idia oi boiria oi idia bamoa totona. Reana nega haida oiemu ruma bese stadi lalonai bona moale karadia lalonai edia abidadama tamana eiava sinana ida oi boiria. Bema oi be edia turana bamona idia laloa neganai, oiemu haheitalai do idia badinaia bona emu hagoadaia herevadia do idia abia dae.—Fili. 2:4.
6 Iehova be tamana lasi memero bona kekeni ia laloa bada, bona hereva momokani idia abia dae totona mai lalokau ida ita henia heduru be ia hanamoa noho. Tamana eiava sinana sibona ia noho ruma besedia eiava tomadiho dalanai idia parara ruma besedia lalonai idia tubu daekau taudia haida be unai bamona hagoadaia karadia idia abia bona hari painia taudia, hesiai taudia, elda taudia, sekit naria taudia, misinari taudia, eiava Betele ruma bese taudia ai idia lao bona mai abidadama ida edia hesiai gaukara idia karaia noho. Namona be ita ibounai ese dala ita tahua, tamana lasi taudia dekenai iseda lalokau ita “habadaia,” iseda guba Tamana ia karaia hegeregerena.—2 Kor. 6:11-13.