“Lauma Helaga Ena Huahua” amo Dirava Ita Hanamoa

“Lauegu Tamana ese hanamoa ia abia dalana be inai, umui ese huahua momo umui havaraia noho.”​—⁠IOA. 15:⁠8.

1, 2. (a) Edena dala ai ma haida ita hagoadaia diba? (b) Iehova ena harihari gauna be dahaka, bona edena dala ai ita ia durua?

INAI sivarai rua mani ita laloa: Keristani taihu ta ia itaia taihu matamata ta ena toana be ia lalohekwarahi. Palani ia karaia haroro gaukara ai ia do ia bamoa. Haroro gaukara lalonai, taihu matamata ese Keristani taihu dekenai ena lalohekwarahi gauna ia herevalaia. Hanuaboi ai taihu matamata ese Iehova ia tanikiu henia, badina unai lo taihu ese ia ia durua. Gabu ma ta ai, headava tau bona hahine be tano idauna ai idia haroro murinai edia hanua dekenai idia giroa lou. Aniani hebou negana ta ai, mai moale ida edia ekspiriens idia herevalaia neganai, tadikaka matamata ta be edia sivarai ia kamonai. Lagani haida murinai, unai tadikaka matamata be tano idauna ai haroro totona ia lao gwauraia neganai, unai headava tau bona hahine edia hereva ia laloa lou. Edia ekspiriens ese ia durua misinari tauna ai ia lao totona.

² Reana oi dekenai unai bamona ia vara o oi ese ma ta be unai bamona oi durua. Momokani, nega tamona sibona ta ida oi herevahereva karana ese ma ta ena mauri ia haidaua diba lasi, to dina ta ta ita ese ma haida ita hagoadaia bona durua diba. Mani oi laloa: Dirava ese oi dekenai gau ta do ia henia bona unai ese emu diba bona kara ia hanamoa diba, unai amo emu tadikaka taihu oi durua bona Dirava oi hesiai henia. Unai be dahaka? Iehova be ita dekenai harihari gauna namona ta ia henia, unai be lauma helaga. (Luka 11:13) Dirava ena lauma ese ita ia hakaua neganai, kara namodia ita hahedinaraia, bona hesiai gaukara idauidau ita karaia namonamo diba. Unai be harihari gauna namo hereana!​—⁠Galatia 5:​22, 23 duahia.

3. (a) Edena dala ai “lauma helaga ena huahua” ita hahedinaraia karana ese Dirava ia hanamoa? (b) Inai stadi lalonai edena henanadai edia haere do ita tahua?

³ Lauma helaga ese ia havaraia huahua idauidau ese Iehova Dirava ena kara idia hahedinaraia. (Kol. 3:​9, 10) Keristani taudia ese Dirava idia tohotohoa ena badina badana be Iesu ese ena aposetolo taudia dekenai ia hahedinaraia, ia gwau: “Lauegu Tamana ese hanamoa ia abia dalana be inai, umui ese huahua momo umui havaraia noho.”a (Ioa. 15:⁠8) “Lauma helaga ena huahua” be iseda hereva bona kara amo ita hahedinaraia neganai, unai ese Dirava ena ladana ia hanamoa. (Mat. 5:16) Edena dala ai lauma helaga ese ia havaraia kara idauidau be tanobada ena kara amo ia idau? Edena dala ai lauma helaga ena huahua ita hahedinaraia diba? Dahaka dainai nega haida ia auka unai ita karaia totona? Inai stadi lalonai unai henanadai toi edia haere do ita tahua, bona lauma helaga ena huahua toi, lalokau, moale, bona maino do ita herevalaia.

Dirava Ena Lalokau Tohotohoa

4. Iesu be ena hahediba taudia ia hadibaia edena bamona lalokau do idia hahedinaraia?

⁴ Lauma helaga ese ia havaraia lalokauna be tanobada taudia ese idia hahedinaraia lalokau amo ia idau. Dahaka dainai? Badina ia be Dirava amo ia mai lalokauna. Ororo Harorona ai Iesu be unai ia herevalaia. (Mataio 5:​43-48 duahia.) Ia gwau, kara dika taudia be ma haida idia lalokau henia danu, to unai taudia edia kara davana korikorina sibona idia haloua. Unai bamona “lalokau” ia hahedinaraia tauna be sibona ena ura ia dadaraia lasi. Bema ita ura ‘iseda Tamana guba ai ia noho ena natudia ai ita lao,’ tanobada taudia amo ita idau be namo. Haida ese ita idia kara henia ena davana korikori sibona ita haloua lasi, to Iehova ese idia ia lalokau henia hegeregerena idia ita lalokau henia be namo. Edena dala ai unai ita karaia diba?

5. Edena dala ai ita idia dagedage henia taudia ita lalokau henia diba?

⁵ Mani Baibel ena sivarai ta ita laloa. Paulo bona Sila be Filipi ai idia haroro neganai, hanua taudia ese idia dogoatao, idia dadabaia, dibura ruma ai idia atoa, bona edia aena be au metaudia rua huanai idia lokaia. Unai negai, reana dibura ruma naria tauna ese idia ia dagedage henia danu. Bena tano mareremarere ia vara bona idia heau mauri gwauraia neganai, idia ese dibura ruma naria tauna ena kara dika davana idia haloua, a? Lasi. To iena namo idia laloa bada dainai, sibona edia ura idia dadaraia bona ia bona ena ruma bese taudia idia haroro henia bona idia be Keristani taudia ai idia lao. (Kara 16:​19-34) Paulo bona Sila hegeregerena, iseda negai danu tadikaka taihu ese idia ia dagedage henia taudia idia hanamoa.​—⁠Roma 12:⁠14.

6. Edena dala ai ta be ena tadikaka totona ena mauri ia atoa diho? (Rau 21 ai ia noho maua itaia.)

⁶ Iseda tadikaka taihu ita lalokau henidia sibona be hegeregere lasi, to Baibel ia gwau: “Iseda maduna be iseda tadikaka totona iseda mauri ita atoa diho.” (1 Ioane 3:​16-18 duahia.) To, dala maragidiai lalokau ita hahedinaraia diba danu. Hegeregere, bema eda hereva o kara amo eda tadikaka ta ita habadua, namona be ita naria lasi to ita ese eda tadikaka ida maino ita karaia guna. (Mat. 5:​23, 24) To bema ta ese ita ia habadua, dahaka do ita karaia? Iena dika do ita gwauatao, eiava ia do ita badu henia noho? (Sal. 86:⁠5) Lauma helaga ese ia havaraia lalokauna ese ita do ia durua iseda tadikaka edia kerere maragidia ita gwauatao totona, “Iehova ese mai kudouna ibounai ida ita ia gwauatao hegeregerena.”​—⁠Kol. 3:​13, 14; 1 Pet. 4:⁠8.

7, 8. (a) Edena dala ai iseda tadikaka lalokau henia karana ita habadaia diba? (b) Edena dala ai Iehova lalokau henia karana ita habadaia diba? Haheitalai gwauraia.

⁷ Edena dala ai iseda tadikaka lalokau henia karana ita habadaia diba? Unai ita karaia diba bema iseda lalokau Dirava dekenai be ia goada. (Efe. 5:​1, 2; 1 Ioa. 4:​9-11, 20, 21) Baibel ita duahia, ita laloa dobu bona guriguri negadiai ita be Iehova kahirakahira ita lao, bona unai ese iseda lalokau eda guba Tamana dekenai ia hagoadaia. To Dirava kahirakahira ita lao totona nega ita atoa be gau badana.

⁸ Mani oi laloa: Bema taravatu ta ia gwau, oi be dina ta lalonai hora tamona sibona Baibel do oi duahia, oi laloa dobu bona Iehova oi guriguri henia, dahaka do oi karaia? Do oi hekwarahi unai hora ai gaukara ma ta oi karaia lasi, to unai nega be Iehova sibona dekenai oi henia, ani? Momokani, Dirava ita guriguri henia karana be ta ese ia koua diba lasi, bona ita momo be eda ura negana ai Baibel ita duahia diba. To, namona be nega ita “hoia” unai amo dina ta ta ena gaukara idauidau ese Dirava kahirakahira ita lao dalana ia koua lasi. Dina ta ta ai nega oi “hoia” Dirava kahirakahira oi lao totona, a?

“Moale be Lauma Helaga amo Ia Mai”

9. Ena be hekwakwanai ita davaria, to edena dala ai ita moale noho diba?

⁹ Moale be lauma helaga ena huahua ta, bona herevana dahaka hekwakwanai ita davaria, ita moale noho diba. Moale be hegeregere medu lasi neganai ia mauri noho tubutubu gauna ta bamona. Tanobada hegegemadai Dirava ena hesiai taudia momo be ‘dagedage lalonai Dirava ena hereva idia abia dae mai moale ida.’ (1 Tes. 1:⁠6) Ma haida edia mauri be ia auka, to Iehova ese ena lauma helaga amo ia durudia ‘unai amo gau ibounai idia haheaukalaia, idia hesiku lasi bona idia moale.’ (Kol. 1:11) To, ita moale ena badina haida be dahaka?

10. Ita moale ena badina haida be dahaka?

¹⁰ Satani ena tanobada ena kohu be idia dika haraga diba, to Iehova amo ita abia kohu be do idia dika haraga lasi. (1 Tim. 6:17; Mat. 6:​19, 20) Ita moale ena badina haida be inai: Iehova ese ita dekenai mauri hanaihanai ena helaro ia henia, ita be tanobada hegegemadai tadikaka oreana lalonai ita noho, bona ita moale ena badina badana be Dirava ita tura henia. Iseda hemami be Davida ena bamona, ena be Saulo dainai gabu idauidau ai ia komu, to ane amo Iehova ia hanamoa, ia gwau: “Oiemu bogahisihisi bona oiemu lalokau ese, inai tanobada ena mauri idia hereaia. Unai dainai egu udu bibina ese oi do idia hanamoa bada. Egu mauri dinadia ibounai lalonai oi do lau hanamoa.” (Sal. 63:​3, 4) Herevana dahaka hekwakwanai ita davaria, Davida bamona Dirava ita hanamoa noho be namo.

11. Dahaka dainai mai moale ida Iehova ita hesiai henia be namo?

¹¹ Aposetolo Paulo ese Keristani taudia ia hamaoroa: “Nega ibounai Lohiabada dainai do umui moale. Ma lau gwau lou, umui moale!” (Fili. 4:⁠4) Dahaka dainai Keristani taudia be mai moale ida Iehova idia hesiai henia be namo? Badina Satani ese Iehova ena lohia siahuna ia hepapahuahulaia, bona ia gwau taunimanima be mai edia lalona ibounai ida Dirava idia hesiai henia lasi. (Iobu 1:​9-11) Bema Iehova ena hesiai gaukara be mai iseda lalona ibounai ida ita moalelaia lasi, Iehova be unai do ia abia dae lasi. Unai dainai namona be salamo torea tauna ena sisiba ita laloa, ia gwau: “[Iehova] do umui tomadiho henia, mai emui moale danu. Lohiabada ena vairana dekenai umui mai, mai moale anedia danu.” (Sal. 100:⁠2) Mai moale ida Iehova ita hesiai henia neganai, unai ese Dirava ena ladana ia hanamoa.

12, 13. Ita lalometau neganai, dahaka ita karaia diba?

¹² Iehova ena hesiai taudia danu be nega haida idia lalomanoka, bona idia moale lasi. (Fili. 2:​25-30) Unai bamona negadiai, dahaka ese ita do ia durua? Efeso 5:​18, 19 ia gwau: “Lauma helaga amo do umui honu noho. Umui ese salamo, Dirava hanamoa anedia, bona tomadiho anedia do umui abia. Emui kudouna ai Iehova hanamoa anedia umui abia.” Edena dala ai unai sisiba ita badinaia diba?

¹³ Ita lalometau neganai, namona be Iehova ita guriguri henia bona gau namodia ita laloa. (Filipi 4:​6-9 duahia.) Haida idia davaria Basileia anedia idia abia neganai, unai ese idia ia hamoalea bona gau namodia idia laloa. Tadikaka ta be hekwakwanai badana ta dainai ia lalometau, to ia gwau: “Lau guriguri loulou bona Basileia ane haida edia hereva lau laloatao. Iehova hanamoa ane namodia lau abia badabada eiava egu lalona dekenai lau laloa neganai, lau moale. Danu, Iehova Kahirakahira Oi Lao bukana be nega korikori ai idia halasia. Lagani tamona lalonai unai buka be nega rua lau duahia. Ia be bonana namo dehoro bamona, egu lalona ia hanamoa. Lau diba Iehova ese egu hekwarahi ia hanamoa.”

“Maino ese Umui Do Ia Hatamonaia”

14. Lauma helaga ese ia havaraia maino ena namo be dahaka?

¹⁴ Iseda intenesenel hebouhebou negadiai, tano idauidau amo idia mai tadikaka taihu be ta ta edia hebamo karana idia moalelaia. Unai ese hari inai negai Dirava ena taunimanima ese idia moalelaia maino ia hahedinaraia. Taunimanima idia hoa, badina idia itaia tano idauidau taudia be idia inai heheni lasi, to ‘idia gaukara goada lauma helaga ese ia henia lalotamona karana idia badinaia totona, bona maino ese idia ia hatamonaia.’ (Efe. 4:⁠3) Ena be guna idia be ta ta idia inai henia, to hari idia be tura namodia.

15, 16. (a) Guna Petero ese Idau Bese taudia be edena bamona ia laloa, bona dahaka dainai? (b) Edena dala ai Iehova ese Petero ia durua ena lalohadai ia haidaua totona?

¹⁵ Tano idauidau amo idia mai taudia idia lalotamona be auka. To iseda huanai lalotamona karana ita habadaia totona, aposetolo Petero ena haheitalai mani ita laloa. Iena lalohadai kopina idia utua lasi Idau Bese taudia dekenai be Baibel ese ia hahedinaraia, ia gwau: “Umui diba, Iuda tauna ta ese idau bese tauna ta ia bamoa eiava ia hereva henia be taravatu. To Dirava ese lau dekenai ia hahedinaraia, tau ta do lau gwauraia lasi ia miro eiava ia goeva lasi.” (Kara 10:​24-29; 11:​1-3) Petero ia tubu daekau lalonai, Iuda taudia idia abia dae Taravatu ia gwau Iuda taudia sibona do idia lalokau henia. Unai dainai, ia laloa Idau Bese taudia inai henia karana kerere lasi.b

¹⁶ Mani oi laloa, Petero be Korenelio ena ruma ia vareai neganai, ia hemarai bona ia gari badina guna ia be Idau Bese taudia ia bamoa lasi. Vadaeni, edena dala ai ‘maino ese idia do ia hatamonaia’ bona “ta ta idia hakapua namonamo” diba? (Efe. 4:​3, 16) Oibe, Petero be Korenelio ia do vadivadi henia lasi neganai, Dirava ena lauma ena heduru dainai Petero be ena lalohadai ia haidaua, bona Idau Bese taudia ia abia dae. Matahanai ta amo Iehova ia hahedinaraia, ia be bese idauidau edia toana eiava kopina ena kala ia laloa lasi, to ibounai ia abia dae. (Kara 10:​10-15) Unai dainai, Petero ese Korenelio ia hamaoroa: “Hari lau laloparara momokani, Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:​34, 35) Petero ese ena kara bona lalohadai ia haidaua bona ‘tadikaka oreana ibounai ia lalokau henia.’​—⁠1 Pet. 2:⁠17.

17. Dahaka dainai Dirava ena taunimanima ese idia moalelaia lalotamona be idau herea?

¹⁷ Petero hegeregerena, hari Dirava ena taunimanima momo be edia lalohadai idia haidaua noho. (Isaia 2:​3, 4 duahia.) Taunimanima milioni momo “bese ibounai, iduhu ibounai, kopina bona gado idauidau amo” be edia lalohadai idia haidaua, bona Dirava ese ia abia dae gaudia bona goevadae gaudia idia abia dae. (Apok. 7:9; Roma 12:⁠2) Guna idia momo be inai tanobada ena kara idia karaia, hegeregere ma haida idia inai henia, idia tuari, bona bese hapararaia karadia idia karaia. To, Dirava ena Hereva idia stadilaia bona lauma helaga ena heduru amo, idia ese ‘maino havaraia gaudia idia tahua noho.’ (Roma 14:19) Edia huanai ia noho lalotamona karana ese Dirava ia hanamoa.

18, 19. (a) Edena dala ai ita ta ta ese kongrigeisen lalonai maino bona lalotamona ita habadaia diba? (b) Pura vaira ena stadi ai dahaka do ita herevalaia?

¹⁸ Edena dala ai iseda huanai ia noho maino bona lalotamona ita habadaia diba? Kongrigeisen momo lalonai idau tano taudia idia noho. Idia haida edia kastom be idauidau o iseda gado idia diba namonamo lasi. Ita hekwarahi idia ita diba namonamo totona, a? Baibel ese ita ia hagoadaia unai bamona do ita karaia. Roma kongrigeisen lalonai Iuda bona Idau Bese taudia idia noho, bona Paulo ese idia ia hamaoroa: “Umui ese ta ta do umui abia dae, Keriso ese ita ia abia dae hegeregerena, vadaeni taunimanima ese Dirava do idia hanamoa.” (Roma 15:⁠7) Oi hekwarahi kongrigeisen lalonai oi manada lasi tadikaka o taihu ta oi diba namonamo totona, a?

¹⁹ Lauma helaga ena huahua ita hahedinaraia noho totona, dahaka gau ma haida ita karaia be namo? Pura vaira ena stadi ese lauma helaga ena huahua ma haida do ia herevalaia.

[Footnotes]

Edena Bamona Do Oi Haere?

• Edena dala ai sibona eda ura ita dadaraia bona iseda tadikaka ita lalokau henidia?

• Dahaka dainai mai moale ida Dirava ita hesiai henia be namo?

• Edena dala ai ita ese kongrigeisen lalonai maino bona lalotamona ita habadaia diba?

[Box on page 21]

“Idia be Keristani Taudia Korikoridia”

Buka ta (Resistance and Martyrdom​​—⁠Jehovah’s Witnesses in the Third Reich) lalonai Jew merona ta be Neuengamme dibura kamepa ai ia ginidae neganai, nega ginigunana Iehova ena Witnes taudia ia hedavari ena sivarai ia torea. Ia gwau:

“Dachau amo ai mai Jew taudia be kamepa dekenai ai vareai neganai, Jew taudia ma haida be edia aniani idia hunia badina idia ura lasi ai dekenai idia henia. . . . Guna dibura ruma dekenai ai do lao lasi neganai, ai heduru heheni. To hari kamepa lalonai, mase bona mauri be emai vairanai ia noho neganai, ta ta be sibona idia laloa bona ma haida idia durua lasi. To, Bible Student taudia edia kara be idau. Unai nega ai idia hekwarahi bada ranu ena paipa idia hanamoa totona. Unai be keru negana bona dina ibounai lalonai aisi ranu lalonai idia gini. Ai diba lasi edena bamona unai idia haheaukalaia. Idia gwau Iehova ese idia dekenai goada ia henia. Idia danu be idia hitolo bona idia aniani be namo. To, dahaka idia karaia? Edia paraoa ibounai idia haboua bona kahana be Dachau amo idia mai tadikaka ida idia haria. Idia hedavari neganai ta ta idia rosia bona idia kisi henia, idia guriguri bena idia aniani. Unai murinai, idia ibounai be idia bogakunu bona idia moale. Bona idia gwau edia hitolo mamina be ia ore. Unai lau itaia neganai, lau laloa: Idia be Keristani taudia korikoridia.”

[Pictures on page 19]

Gaukara idauidau amo nega oi “hoia” Iehova kahirakahira oi lao totona, a?