English Watchtower Matamata
MAI moale ida ai ura umui ai hadibaia inai hua lalonai Watchtower matamata, simplified English Watchtower o auka lasi English gado ai idia torea gauna ai halasia. Unai magasin matamata be lagani tamona lalonai do ai tohoa, bona bema momo ese idia ura henia, do ai printaia noho. Unai magasin matamata be vaia ita abia English Watchtower ida do ai siaia.
Pura ta ta ai ita stadilaia Gima Kohorona be ibounai ese idia lalopararalaia be mai anina bada. Badina “igui hesiai tauna” be Gima Kohorona stadi amo Dirava ena taunimanima ia hadibaia. (Mat. 24:45) To, dahaka dainai simplified English Watchtower ai halasia?
Badina haida be inai: Tanobada hegegemadai iseda tadikaka taihu momo be English kongrigeisen idia bamoa, to standard English Watchtower ena hereva haida idia lalopararalaia lasi. Hegeregere, Africa, Asia, bona South Pacific tanodia momo ai English gado idia gaukaralaia. To, iseda tadikaka be hebou bona haroro gaukara sibona ai English gado idia gaukaralaia, bona edia ruma dekenai edia gado idia gaukaralaia. Danu, idia herevahereva neganai auka lasi English herevadia idia gaukaralaia, to standard English Watchtower ena hereva momo be auka. Ma danu, iseda tadikaka taihu haida be refiuji tano ma haida dekenai bona English kongrigeisen dekenai idia lao. To, English be edia gado lasi dainai, Watchtower stadi idia lalopararalaia lasi. Danu, matamata taudia be English gado idia diba, to standard English Watchtower be ia auka. Unai dainai simplified English Watchtower ese tanobada hegegemadai tadikaka taihu momo do ia durua Watchtower stadi idia lalopararalaia totona.
Simplified English Watchtower lalonai idia auka lasi English herevadia idia gaukaralaia, to ia be standard English Watchtower hegeregerena bona Baibel ena hereva momokani ia hadibaia. Edia paragraf, henanadai, laulau bona riviu maua be hegeregere. Anina be Watchtower stadi totona, ta be simplified English Watchtower o standard English Watchtower ia gaukaralaia diba.
Ai diba simplified English Watchtower ese tadikaka taihu bona matamata taudia momo do ia durua pura ta ta ena stadi idia hegaegaelaia totona. Iehova be “tadikaka oreana ibounai” ia lalokau henia, bona ita tanikiu henia badina ia ese “igui hesiai tauna” ia gaukaralaia gau ibounai be nega korikori ai ita abia totona.—1 Pet. 2:17.
Iehova Ena Witnes Taudia Edia Hakaua Oreana