Duahia Taudia Idia Henanadai . . .

Beibi Idia Bapatisoa be Namo, A?

▪ Victoria ia gwau, “Lau gari badina lau laloa egu tadina, John, be Limbo dekenai do ia lao.” Dahaka dainai ia gari? Victoria ia gwau, “John ia bapatiso lasi bena ia mase, bona Katolik pris ia gwau, unai badina dainai ia be Limbo ai do ia noho hanaihanai.” Unai lalohadai ese gari ia havaraia, to ia be Baibel ena hahediba herevana ta, a? Momokani, Baibel ia gwau idia bapatiso lasi bena idia mase natudia ibounai be helaro lasi, a?

Baibel ia gwau Keristani taudia idia bapatiso be namo. Iesu ese ena hahediba taudia ia hadibaia: “Bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa, bona idia umui hadibaia, umui lau hamaoroa gaudia ibounai be do idia badinaia.” (Mataio 28:​19, 20) Unai siri amo ita itaia, idia bapatiso taudia be Iesu ena hahediba taudia. Anina be ta ta ese Iesu sivaraina idia dibaia bona abia hidi idia karaia iena murinai idia raka totona​—⁠beibi be unai bamona abia hidi idia karaia diba lasi.

To momo idia gwau Iesu ena hahegani be natuna maragidia totona danu. Luteran edia pasto Richard, P. Bucher, ia gwau: “Taunimanima ibounai bona beibi danu ese bapatiso idia abia be namo.” Ma ia gwau: “Bema bapatiso amo ita koudia, anina be gwauatao karana do idia abia lasi, bona dala ita kehoa panisi idia abia totona.” Oibe, unai bamona hereva ese dala toi ai Iesu ena hahediba herevadia ia hakoikoia.

Ginigunana be, Iesu ia gwau lasi beibi idia bapatiso be namo. Dahaka dainai unai hereva be mai anina bada? Mani inai ita laloa: Iesu be mai momokani ida ena hahediba taudia dekenai Dirava ena ura ia hadibaia. Nega haida, hahediba hereva badadia ia gwauraia lou. Dahaka dainai? Badina ia ura ena hahediba taudia ese ena hereva idia lalopararalaia. (Mataio 24:42; 25:13; Mareko 9:​34-37; 10:​35-45) To, nega ta ia gwau lasi beibi idia bapatisoa be namo. Anina be ia laloaboio unai taravatu ia gwauraia totona, a? Lasi vaitani! Momokani, bema beibi idia bapatisoa be namo, Iesu ese unai ia gwauraia diba.

Iharuana be, Iesu ia gwau lasi mase murinai ta ese hisihisi ia abia. Iesu ese Baibel ena hereva ia abia dae. Baibel ia gwau: “Mauri taudia idia diba do idia mase, to mase taudia be gau ta idia diba lasi.” (Hadibaia Tauna 9:⁠5) Iesu ia diba ta ia mase neganai ia be pegatori, Limbo o ma gabu ta dekenai ia hisihisi lasi. To ia gwau idia be gau ta idia diba lasi, toana be idia mahuta.​—⁠Ioane 11:​1-14.

Ihatoina be, Iesu ia gwau, “guria gabuna lalonai idia noho taudia ibounai” be do idia mauri lou. (Ioane 5:​28, 29) Anina be idia bapatiso lasi taudia milioni momo do idia toreisi lou danu. Unai neganai, idia ese Dirava ena ura do idia dibaia bona tanobada Paradaisona ai do idia mauri hanaihanai.a​—⁠Salamo 37:⁠29.

Ia hedinarai goevagoeva, beibi bapatisoa karana be Baibel ese ia hahedibalaia lasi.

[Footnote]