Disasta Do Idia Ore!

BEMA ta ia gwau, “Kahirakahira disasta do idia ore,” dahaka do oi karaia? Reana do oi gwau, “Reana oi nihi. Disasta be hanaihanai idia vara gaudia.” O reana emu lalona ai do oi gwau, ‘Ia laloa daika ia koia?’

Ena be toana be disasta do idia vara noho, to badina ta dainai ita abia dae momokani do idia ore. To, taunimanima ese disasta do idia haorea lasi. Taunimanima be tanobada ai idia vara gaudia edia badina idia diba namonamo lasi, danu unai gaudia biagua o hanamoa dalana idia diba lasi. Idaunegai Israela ena King Solomona, aonega bona gau idauidau ia tahua namonamo tauna, ia gwau: “Ita taunimanima ese Dirava ena kara ibounai edia anina, be ita davaria diba lasi. Do ita tahua auka, mai hekwarahi danu, to tanobada dekenai idia vara noho gaudia edia anina do ita davaria diba lasi. Sedira aonega taudia do idia gwau idia diba, to idia diba momokani lasi.”​—⁠Hadibaia Tauna 8:⁠17.

Bema taunimanima be disasta idia haorea diba lasi, vadaeni daika ese ia haorea diba? Baibel ese ia hahedinaraia iseda Havaraia Tauna ese unai gaudia ia haorea diba. Ia be ranu ena heau dalana bona unai bamona gaudia ia karaia Tauna. (Hadibaia Tauna 1:⁠7) Dirava ena siahu be bada herea, taunimanima edia ia hereaia. Peroveta tauna Ieremia ese unai ia hamomokania, ia gwau: “Lohiabada Dirava e, oi ese guba bona tanobada be oiemu siahu badana bona oiemu goada herea dekena amo oi karaia. Gau ta ia auka lasi oi dekenai.” (Ieremia 32:17) Dirava ese tanobada bona ia lalonai idia noho gaudia ibounai ia karaia dainai, ia diba gau ibounai be edena bamona do ia biagua namonamo, unai amo taunimanima be maino bona noho namona idia abia diba.​​—⁠Salamo 37:11; 115:⁠16.

Vadaeni, edena dala ai Dirava ese tanobada do ia hanamoa? Reana oi laloatao inai magasin ena atikol iharuana ese ia hahedinaraia, hari tanobada ai idia vara dika gaudia momo be “inai nega oromana ena dokona ena toana.” Iesu ia gwau: “Unai gaudia idia vara umui itaia neganai, umui diba Dirava ena Basileia be ia kahirakahira.” (Mataio 24:3; Luka 21:31) Dirava ena Basileia, iena guba gavamanina, ese tanobada do ia hanamoa bona lai, ranu bona unai bamona gaudia do ia biagua. Ena be Iehova Dirava sibona ese unai gaudia ia karaia diba, to iena Natuna ia abia hidi unai gaukara ia karaia totona. Peroveta tauna Daniela ese Iesu be inai bamona ia herevalaia: “Badana ese siahu bona mataurai bona dagi bada be unai Tau dekenai ia henia, bese ibounai bona iduhu ibounai bona gado ibounai taudia ese iena hesiai gaukara do idia karaia.”​—⁠Daniela 7:⁠14.

Dirava ena Natuna, Iesu Keriso, be siahu ia abia gau ibounai ia hanamoa, unai amo tanobada be gabu namona ai do ia halaoa. Lagani 2,000 gunanai, Iesu be tanobada ai ia noho neganai, Ia hahedinaraia ia be mai ena siahu lai bona davara ia biagudia totona. Nega ta, Galilea Gohuna ai ia bona ena hahediba taudia be bouti lalonai idia noho neganai, “lai bada herea ia toa, hurehure ese bouti ia botaia bona ranu be bouti lalonai ia vareai dainai, kahirakahira ia mutu.” Iena hahediba taudia be do idia mase garina idia gari, unai dainai Iesu idia hereva henia. Iesu be dahaka ia karaia? Ia ese “lai ia gwau henia bona gohu dekenai ia gwau: ‘Hadokoa! Regerege lasi!’ Bena lai ia doko, bona gohu ia namo lou.” Iena hahediba taudia idia hoa bona idia henanadai: “Inai tauna be daika? Badina lai bona gohu danu ese ia idia kamonai henia.”​​—⁠Mareko 4:​37-​41.

Hari Iesu be guba ai ia noho bona Dirava ese siahu bona dagi ia henia gau ibounai ia biagua totona. Ia be Dirava ena Basileia ena King dainai, iena gaukara be tanobada ai gau ibounai do ia hanamoa, taunimanima dekenai maino bona noho namo ia henia totona.

To ita itaia vadaeni, taunimanima be sibona idia laloa bada bona idia mataganigani dainai, idia karaia gaudia amo hekwakwanai momo bona disasta idia havaraia. Unai bamona taudia be idia ura lasi edia kara idia haidaua dainai Basileia be dahaka do ia karaia? Baibel ia gwau, Lohiabada Iesu “bona ena siahu bada anerudia be lahi hururuhururu ida guba amo idia hedinarai neganai, umui hisihisi noho taudia be ai ida Dirava ese laga-ani do ia henia. Unai nega ai, Dirava idia diba lasi taudia dekenai, bona iseda Lohiabada Iesu ena sivarai namona idia kamonai henia lasi taudia dekenai, dika davana do ia henia.” Oibe, ia ese ‘tanobada idia hadikaia taudia do ia hadikaia ore.’​​—⁠2 Tesalonika 1:​7, 8; Apokalupo 11:⁠18.

Unai murinai, “King ibounai edia king,” Iesu Keriso, ese tanobada gaudia ibounai do ia biagua. (Apokalupo 19:16) Ia ese Basileia henunai idia noho taudia do ia naria, dika bona hisihisi idia davaria lasi totona. Iena siahu do ia gaukaralaia lai bona ori edia heau dalana do ia biagua, unai amo dina be nega korikori ai ia hedinarai bona medu be nega korikori ai ia diho, taunimanima durua totona. Unai be idaunegai Iehova Dirava ese iena taunimanima dekenai ia henia gwauhamata hegeregerena, ia gwau: “Lau ese medu namona umui dekenai do lau henia, ena nega korikori neganai, vadaeni tano ese ena anina do ia havaraia, bona uma audia do idia huahua.” (Levitiko 26:⁠4) Taunimanima be edia ruma do idia haginia, bona edia ruma ia hadikaia gauna ta dainai do idia gari lasi: “Idia ese edia ruma do idia haginia, bona unai ruma lalonai do idia noho. Idau taudia ese edia ruma do idia abia lasi.”​—⁠Isaia 65:⁠21.

Dahaka Oi Karaia be Namo?

Oibe, momo bamona, oi danu oi ura disasta idia vara lasi tanobadana ai oi noho. To unuseniai oi noho totona, dahaka oi karaia be namo? “Dirava idia diba lasi taudia” bona “sivarai namona idia kamonai henia lasi taudia” be Dirava ese do ia hanamoa tanobadana ai idia noho diba lasi. Unai dainai, hari taunimanima ese Dirava idia dibaia, bona tanobada lohiaia totona ia hegaegaelaia dalana idia badinaia be namo. Dirava ia ura ia do ita dibaia bona iena Natuna amo ia haginia Basileiana ena sivarai namona ita kamonai henia.

Dala namona be Baibel ita stadilaia namonamo. Baibel ai idia noho herevadia ese ita idia hadibaia dahaka ita karaia, Basileia henunai ita noho totona. Namona be Iehova ena Witnes taudia oi noia oi do idia durua Baibel ena hereva oi dibaia totona. Idia noho hegaegae oi idia durua totona. Namona be inai oi diba, bema oi hekwarahi Dirava oi dibaia bona sivarai namona oi kamonai henia, vadaeni Aonega Herevadia 1:33 ena hereva be oi dekenai do ia guguru, ia gwau: “Lau dekenai do ia kamonai tauna, be do ia noho mai mauri danu. Ia be do ia noho namonamo, gari ta lasi.”