Inai Oi Diba, A?

Iesu ena hereva, “kilomita rua do oi lao,” ena anina be dahaka?

▪ Ororo Harorona ai, Iesu ia gwau: “Bema gaukara biaguna ese oi ia doria ia ida kilomita ta do oi lao, ia ida kilomita rua do oi lao.” (Mataio 5:41) Iesu idia kamonai henia taudia idia diba ia herevalaia gauna be, siahu tauna ta ese taunimanima ia oda henia, gaukara ta idia karaia totona.

Aposetolo edia negai, Roma taudia ese Israela idia lohiaia. Idia ese taunimanima o animal idia doria edia gaukara idia karaia totona, o idia laloa gau ibounai idia biagua unai amo edia bisinesi idia habadaia. Hegeregere, Roma tuari taudia ese Kurene tauna Simona idia oda henia Iesu ena hisihisi auna be Iesu do idia hamasea gabuna dekenai do ia huaia lao. (Mataio 27:32) Unai bamona ta doria karana be dagedage karana, momo ese idia ura henia lasi, bona Iuda taudia ese idia badulaia.

Roma taudia ese taunimanima idia doria kohu be kilomita hida idia huaia lao be ita diba lasi. Reana Iuda taudia idia ura lasi Roma taudia ese idia henia gaukara ma haida idia karaia. Unai dainai, Iesu ese kamonai taudia dekenai inai hereva, “kilomita rua do oi lao” ia gwauraia neganai, anina be idia ia hamaoroa siahu taudia ese idia oda henia gaukaradia be mai moale ida do idia karaia.​—⁠Mareko 12:17.

Evanelia bukadia ai idia herevalaia tauna, Ana, be daika?

▪ Baibel ai Ana (Ananus) idia gwauraia “Hahelaga Tauna Badana,” bona Iesu idia kota henia neganai ia be unai gaukara ia karaia. (Luka 3:2; Ioane 18:13; Kara 4:6) Ia be Israela edia hahelaga tauna badana Kaiapa, ena ravana, bona hahelaga gaukara ia karaia lagani 6 eiava 7 C.E. amo ela bona lagani 15 C.E. bamona ai, Roma edia gavana Valerius Gratus ese ena dagi ia kokia. Ena be unai ia vara, to Ana be guna hahelaga tauna badana dainai, Israela ai ena siahu ia do gaukaralaia noho. Iena natudia memero faiv bona ravana tau be hahelaga tauna badana ena dagi idia abia.

Bese ma haida ese Israela idia do lohiaia lasi neganai, hahelaga tauna badana be ena dagi ia dogoatao noho ela bona ia mase. (Numera 35:25) To, Roma taudia ese Israela idia lohiaia neganai, hahelaga tauna badana be Roma edia gavana bona Roma taudia ese idia abia hidi king henunai ia gaukara bona idia be mai edia siahu ena dagi idia kokia totona. Histori torea tauna Flavius Josephus ia gwau, lagani 6 eiava 7 C.E. ai, Suria amo ia mai Roma ena gavana, Kurenio, ese hahelaga tauna badana Joazar ena dagi ia kokia bona Ana dekenai ia henia. To, toana be unai Israela lasi lohia taudia ese hahelaga taudia huana amo hahelaga tauna badana matamatana idia abia hidi.

Ana ena famili be mataganigani bona taga taudia. Badina toana be dubu ai idia bouboulaia gaudia, hegeregere pune manu, mamoe, oela bona wain hoihoilaia karadia idia biagua. Josephus ia gwau, Ana ena natuna, Ananus (Anania) ena “hesiai taudia be raskol taudia, bona taunimanima idia doria hahelaga taudia edia gaukara davana idia henia; idia ura lasi moni idia henia taudia idia dadabaia.”