Dirava Kahirakahira Oi Lao

MOMO idia gwau idia abia dae Dirava ia noho, to unai idia karaia ena badina idia gwauraia diba lasi. Danu, dubu taudia idia kara dika o Dirava ese hisihisi ia koua lasi edia badina idia gwauraia diba lasi. To, idia guriguri sibona.

To, Dirava kahirakahira oi lao diba. Bema Dirava oi diba, emu abidadama do ia goada, bona ia do oi lalokau henia bona laloa bada. Abidadama ena anina be, ita itaia gaudia amo ita diba, ita abia dae gaudia be momokani. (Heberu 11:1) Dirava oi dibaia neganai, turana ta bamona ia oi hereva henia diba. Haida idia abia dae lasi Dirava ia noho, to idia guriguri sibona. Mani edia ekspiriens oi laloa.

◼ Atikol ginigunanai ai herevalaia hahine Patricia, ia gwau: “Nega ta lau be egu turadia ten ida lau noho bona idia be tomadiho idia herevalaia. Idia lau hamaoroa, egu tamana ia abia dae lasi Dirava ia noho, to Iehova ena Witnes hahine ta be emai ruma dekenai ia mai bona egu tamana ida ia herevahereva lalonai ruma lau rakatania. To egu turana ta ia gwau, ‘Reana Iehova ena Witnes taudia idia gwauraia herevadia be momokani.’

“Egu turana ma ta ia gwau, ‘Namona be edia hebou ta dekenai ita lao bona ita itaia.’ Bona unai bamona ai karaia. Ena be ai daradara, to ai haida be Witnes taudia edia hebou ibounai dekenai ai lao, badina ai idia kara namo henia.

“Sunday ta ai, lau kamonai herevana ta ese egu lalohadai ia haidaua. Hereva henia tauna ese taunimanima idia hisihisi ena badina ia herevalaia. Guna lau abia dae lasi Dirava ese taunimanima ia karaia neganai idia be goevadae, bona tau tamona dainai ita ibounai be mai eda kara dika bona ita mase. Danu, hereva henia tauna ia gwau, Iesu ia mase, unai amo taunimanima dekenai Adamu ese ia haboioa gauna ia henia lou.a (Roma 5:12, 18, 19) Hari lau laloparara unai be hereva momokani. Oibe, ita ia laloa bada Diravana ia noho. Baibel lau stadilaia noho lalonai, lau abia dae Dirava ia noho bona ia lau guriguri henia diba.”

◼ Atikol ginigunanai ai herevalaia tauna, Allan, ia gwau: “Dina ta Iehova ena Witnes taudia be aiemai ruma dekenai idia mai neganai, egu adavana ese ia abidia dae badina ia ura tanobada ai do ita mauri hanaihanai dalana ia dibaia. Lau moale lasi dainai, kisini dekenai egu adavana lau boiria bona lau hamaoroa, ‘Oi be kavakava. Edia hereva oi abia dae lasi!’

“Egu adavana ia gwau, ‘Vadaeni, oi lao bona edia hereva oi hakoikoia.’

“Oibe, edia hereva lau hakoikoia diba lasi. Bona idia ese lau dekenai buka ta idia henia, unai buka ese ia herevalaia gauna be inai, mauri be Dirava ese ia havaraia o evolusen amo ia vara. Unai buka ena hereva lau lalopararalaia dainai, egu lalona lau hadaia Dirava lau dibaia totona. Iehova ena Witnes taudia ida Baibel lau stadilaia matamaia, bona lau dibaia gaudia ese egu lalohadai dubu dekenai ia haidaua. Iehova lau dibaia neganai, ia lau guriguri henia matamaia bona lau noia lau do ia durua egu kara haida lau haidaua totona. Lau diba momokani Iehova ese egu guriguri ia haerelaia.”

◼ England ai ia noho tauna, Andrew, ia gwau: “Saiens taudia edia lalohadai lau ura henia. Bona evolusen lalohadaina lau abia dae badina haida idia gwau unai lalohadai be momokani. Danu, lau abia dae lasi Dirava ia noho, badina dika gaudia momo idia vara.

“Nega haida lau laloa: ‘Bema Dirava ia noho, dahaka dainai raskol karadia bona tuari idia vara?’ Hekwakwanai negadiai, nega haida heduru totona lau guriguri, to lau diba lasi daika lau hereva henia.

“Ta ese egu adavana dekenai Iehova ena Witnes taudia ese idia karaia pepapepa ladana, Inai Tanobada Do Ia Ore Eiava? ia henia. Unai be lau laloa momo henanadaina. Unai pepapepa dainai lau ura Baibel ena haere lau dibaia. Gabeai, egu holidei negana ta ai, ta ese lau dekenai buka ladana, Buka Helaga​—⁠Dirava Ena Hereva Eiava Taunimanima Edia?b ia henia. Lau laloparara saiens ese Baibel ia hamomokania neganai, lau ura Baibel ena hereva ma haida lau dibaia. Unai dainai Iehova ena Witnes tauna ta be stadi totona lau ia nanadaia neganai, lau abia dae. Iehova ena ura lau lalopararalaia neganai, lau diba ia noho momokani, bona guriguri amo ia lau hereva henia diba.”

◼ London ai, Protestan tomadiho ia abia dae hahine Jan, ia gwau: “Dubu taudia edia kara koikoi bona tanobada ai hisihisi momo idia vara dainai, lau ura lasi dubu lau lao. Danu, sikuli lau rakatania, bona moni abia totona gita lau gadaralaia bona ane lau abia. Unai negai Pat lau hedavari henia. Ia be Katolik tauna to dubu ia lao lasi danu.

“Ai ruaosi bona sikuli idia rakatania kava taudia haida be ruma ta dekenai ai noho, unai taudia be ist tanodia edia tomadiho idia badinaia. Hanuaboi ena hora momo lalonai ai be mauri ena badina ai herevalaia. Ena be lau bona Pat ai abia dae lasi Dirava ia noho, to ai laloa reana siahu gauna ta ese mauri gaudia ia havaraia.

“Gaukara tahua totona, England ena not kahana dekenai ai lao bona unuseniai emai natuna mero ia vara. Hanuaboi ta ai emai natuna ia gorere. Ena be lau abia dae lasi Dirava ia noho, to lau guriguri sibona. Gabeai, lau bona Pat emai hetura karana ia dika dainai, ia lau rakatania bona emai natuna lau abia. Unai negai heduru totona lau guriguri lou, badina lau laloa ta ia kamonai noho. To, lau diba lasi Pat danu be unai bamona ia karaia.

“Unai dina murinai, Iehova ena Witnes taudia rua be Pat ena ruma idia lao bona Baibel amo ia idia durua. Pat be lau ia rini henia bona ia noia bema Witnes taudia ida Baibel do ai stadilaia. Gabeai ai diba Dirava hamoalea totona, namona be taravatu hegeregerena emai headava ai hamaoromaoroa. Unai ai karaia be auka, badina toana be emai hetura karana ia dika vadaeni.

“Ai ura Baibel ena peroveta herevadia idia guguru dalana, hisihisi edia badina, bona Dirava ena Basileia dekenai diba ma haida ai abia. Metairametaira ai laloparara, Dirava be ai ia laloa bada bona ai ura iena ura ai karaia. Lau bona Pat ai headava bona Baibel ena heduru amo emai natudia toi ai naria. Ai diba momokani Iehova be emai guriguri ia kamonai.”

Hamomokania Gaudia Oi Stadilaia

Taunimanima milioni momo bona inai atikol ai ita herevalaia taudia be tomadiho koikoi idia dadaraia, bona Dirava ese hisihisi ia koua lasi ena badina idia dibaia. Unai taudia ta ta be Baibel ena hereva idia lalopararalaia dainai, idia abia dae Iehova be edia guriguri ia kamonai.

Dirava ena noho idia hamomokania gaudia oi ura stadilaia, a? Iehova ena Witnes taudia be mai moale ida oi do idia durua Iehova, ‘guriguri ia kamonai’ Diravana oi dibaia, bona ia kahirakahira oi lao totona.​—⁠Salamo 65:2.

[Footnotes]

[Blurb on page 10]

“Iehova ena ura lau lalopararalaia neganai, lau diba ia noho momokani, bona guriguri amo ia lau hereva henia diba”

[Picture on page 9]

Abidadama ena anina be, ita itaia gaudia amo ita diba, ita abia dae gaudia be momokani bona ita ura Dirava ita dibaia