Duahia Taudia Idia Henanadai . . .

Toi Tamona be Baibel ena hahediba herevana, a?

▪ Ena be Toi Tamona dekenai lalohadai be idauidau, to ena anina be inai bamona idia gwauraia: “Tamana, Natuna, bona Lauma Helaga be Dirava; idia toiosi be matamana lasi bona dokona lasi, idia ta ta be mai edia siahu, ta ese ma ta ia hanaia lasi; idia ta ta idia gwauraia Dirava, bona idia toiosi be tamona.” Unai be Baibel ena hahediba herevana, a?

Nega momo Mataio 28:19 idia gaukaralaia, unai hahediba herevana hamomokania totona. Unai siri ai Iesu ia gwau: “Unai dainai umui lao, bese ibounai taudia be hahediba taudia ai umui halaoa, bona Tamana, Natuna, bona lauma helaga ladanai idia do umui bapatisoa.” Momokani, unai siri ese Tamana, Natuna, bona lauma helaga ia herevalaia. To, ia gwau lasi idia be tamona. Iesu ese ena murinai idia raka Iuda taudia ia hagania taunimanima do idia hadibaia, bona Tamana, Natuna, bona lauma helaga ladanai do idia bapatisoa. Iuda besena be dahaka idia abia dae?

Israela besena be Taravatu kontrakana, Baibel ena kahana ta unai, idia abia neganai Iehova be idia ia hagania, ia gwau: “Idau dirava ta do umui abia lasi lauegu vairana dekenai.” (Deuteronomi 5:7) Unai siri ai taunimanima hida idia hereva noho? Deuteronomi 6:4 ia gwau: “Israela taudia e, umui kamonai! Lohiabada be iseda Dirava, Lohiabada sibona mo”​—⁠toi tamona lasi. Dirava ese Israela taudia be Aigupito amo ia ruhadia. Aigupito taudia ese toi tamona diravadia, Osiris, Isis, bona Horus (edia laulau be lauri kahanai ia noho), idia tomadiho henia. Unai dainai, Iehova ese Israela taudia ia hagania ia sibona do idia tomadiho henia. Taunimanima ese unai hahegani idia lalopararalaia be mai anina bada, ani? Rabi tauna J. H. Hertz ia gwau: “Dirava tamona sibona tomadiho henia herevana ese ia hahedinaraia dirava momo tomadiho henia be maoro lasi . . . Shema o Heberu gurigurina ese Keristani hahediba herevana, toi tamona diravana, ia herevalaia lasi badina unai ese Dirava be Tamona herevana ia hadikaia.”a

Iesu be Iuda besena lalonai ia vara dainai, ia idia hadibaia unai hahegani ia badinaia totona. Iesu ia bapatiso bena Diabolo ese ia dibagania neganai, Iesu ia gwau: “Satani, oi siri! Badina Toretore Helagadia ia gwau: ‘Iehova oiemu Dirava oi tomadiho henia be namo, bona ia sibona dekenai hesiai gaukara helagana do oi karaia.’” (Mataio 4:10; Deuteronomi 6:13) Unai sivarai amo gau rua ita dibaia. Ginigunana be, Satani ia ura Iesu ia dibagania ia do ia tomadiho henia totona, to bema Iesu be Dirava, ia dekenai unai hedibagani be anina lasi. Iharuana be, Iesu ese inai hereva “ia sibona,” ia gwauraia neganai, ia hahedinaraia ia do idia tomadiho henia lasi.

Taunimanima be Dirava idia dibaia bona idia ura ia idia hesiai henia neganai, idia be “Tamana, Natuna, bona lauma helaga ladanai” idia bapatiso. (Mataio 28:19) Idia ese Iehova ena siahu bona Iesu Keriso ena gaukara Iehova ena ura hagugurua karana dekenai idia lalopararalaia bona abia dae. (Salamo 83:18; Mataio 28:18) Danu, idia ese Dirava ena lauma helaga​—⁠iena gaukara siahuna​—⁠ena gaukara dalana idia lalopararalaia.​—⁠Genese 1:2; Galatia 5:22, 23; 2 Petero 1:21.

Lagani handred momo lalodiai, Toi Tamona hahediba herevana dainai taunimanima idia daradara. To, Iesu be ena hahediba taudia ia hadibaia bona durua “Dirava momokani tamona,” Iehova, idia dibaia totona.​—⁠Ioane 17:3.

[Footnote]

[Picture Credit Line on page 11]

Musée du Louvre, Paris