Tiokratik Haroro Sikuli
Badina: Pablisa ia hadibaia sivarai namona idia harorolaia bona hadibaia namonamo totona.
Ena Daudau: Wiki ta ta ibounai.
Gabu: Kingdom Hall.
Idia Hegeregere Taudia: Kongrigeisen heboudia idia mai hanaihanai taudia ibounai. Idia be Baibel ena hadibaia herevadia idia abia dae, bona edia mauri lalonai Baibel ena hakaua herevadia idia badinaia.
Vareai Dalana: Tiokratik Haroro Sikuli naria tauna ese stiuden ia abia hidi.
Sharon be ALS (amyotrophic lateral sclerosis) gorerena ia abia bona ia paralais. Ia gwau: “Tiokratik Haroro Sikuli amo tahua karana karaia dalana bona hereva badadia hakapua namonamo dalana lau dibaia. Bona lau ia durua sibona do lau laloa lasi, to ma haida do lau durua Dirava idia tura henia totona.”
Arnie be nega daudau lalonai loaloa naria gaukara ia karaia, bona ia gwau: “Lau maragi neganai lau lanalana bona taunimanima lau hereva henidia neganai, edia vairana lau itaia lasi. Unai sikuli ese lau ia hagoadaia bona lau mamia lau hegeregere Iehova lau hesiai henia totona. Iehova ena heduru amo hahodi bona kamonai namonamo karana lau dibaia. Lau moale badina kongrigeisen bona haroro gaukara ai, Iehova lau hanamoa diba.”
Betele Sikuli
Badina: Betele ai idia vareai taudia matamatadia ia durua edia gaukara idia karaia namonamo totona.
Ena Daudau: Wiki 16. Miniti 45.
Gabu: Betele.
Idia Hegeregere Taudia: Betele tauna ta o idia boiria lagani ta o haida lalonai Betele dekenai volantia gaukara ia karaia.
Vareai Dalana: Betele dekenai idia vareai matamata taudia be unai sikuli dekenai idia lao.
Demetrius be lagani 1980 bamona lalonai unai sikuli dekenai ia lao, bona ia gwau: “Unai sikuli ese lau ia durua egu stadi karana lau hanamoa, bona lau ia durua lagani momo lalodiai Betele gaukara lau karaia totona. Emai tisa taudia, idia hadibaia gaudia bona edia sisiba ese idia hamomokania, Iehova be lau ia lalokau henia bona ia ura lau ia durua egu Betele gaukara lau karaia namonamo.”
Kaitlyn ia gwau: “Sikuli ese lau ia durua lau karaia gaudia ibounai lalonai, Iehova ena dala lau badinaia totona. Danu, lau ia durua Iehova, ena ruma, bona iena orea lau laloa bada totona.”
Basileia Hesiai Gaukara Sikuli
Badina: Loaloa naria taudia, elda taudia bona nega haida hesiai taudia ia hadibaia, orea ena gaukara idauidau idia karaia namonamo totona. (Kara 20:28) Kongrigeisen lalonai idia vara hekwakwanai bona heduru daladia idia herevalaia. Hakaua Oreana ese inai sikuli idia karaia negana ia abia hidi.
Ena Daudau: Vanegai lagani lalodiai, loaloa naria taudia totona be dina rua o dina rua mai kahana, elda taudia totona be dina ta mai kahana, bona hesiai taudia totona be dina tamona lalonai idia karaia.
Gabu: Kingdom Hall o Assembly Hall.
Idia Hegeregere Taudia: Elda, hesiai taudia bona loaloa naria taudia.
Vareai Dalana: Elda bona hesiai taudia be sekit naria tauna ese ia boiria. Loaloa naria taudia be brens ofesi ese ia boiria.
“Ena be nega kwadogina lalonai sikuli ai karaia, to heduru bada ai abia. Hegeregere, ai idia durua Iehova ena hesiai gaukara ai moalelaia bona ‘ai goada ai lao’ totona. Elda gunadia bona matamatadia idia durua mamoe naria gaukara idia karaia namonamo, bona ‘mai lalotamona ida’ idia gaukara hebou totona.”—Quinn (henunai).
“Unai treinini ese ai ia durua emai hetura karana Dirava ida ai gimaia, dika gaudia ai dadaraia bona mamoe oreana ai naria namonamo totona. Unai ese ia hamomokania Iehova be ai ia laloa bada.”—Michael.
Painia Sikuli
Badina: Painia taudia ia durua ‘edia hesiai gaukara idia hagugurua momokani’ totona.—2 Tim. 4:5.
Ena Daudau: Wiki rua.
Gabu: Brens ofesi ese ia abia hidi; nega momo Kingdom Hall ai.
Idia Hegeregere Taudia: Lagani ta o ma haida idia regula painia taudia.
Vareai Dalana: Idia hegeregere painia taudia be sekit naria tauna ese do ia hadibadia.
Lily (idiba kahanai) ia gwau: “Unai sikuli ese lau ia durua haroro gaukara bona lau davaria hekwakwanai lau haheaukalaia totona. Egu stadi, hahediba dalana bona Baibel gaukaralaia dalana lau hanamoa. Hari, lau hegeregere elda taudia bona ma haida lau durua, bona kongrigeisen taudia lau hagoadaia totona.”
Brenda be unai sikuli dekenai nega rua ia lao, bona ia gwau: “Sikuli ese lau ia durua egu hesiai gaukara lau hanamoa, egu lalomamina lau hadibaia namonamo, bona ma haida lau durua totona. Momokani, Iehova be hariharibada Diravana!”
Elda Taudia Edia Sikuli
Badina: Elda taudia ia durua edia kongrigeisen maduna idia huaia namonamo, bona edia hetura karana Dirava ida idia hagoadaia totona.
Ena Daudau: Dina faiv.
Gabu: Brens ofesi ese ia abia hidi; nega momo Kingdom Hall o Assembly Hall ai.
Idia Hegeregere Taudia: Elda taudia.
Vareai Dalana: Brens ofesi ese elda taudia ia boiria.
United States ai idia karaia klas namba 92 dekenai idia lao taudia haida edia koment be inai:
“Unai sikuli ese lau ia durua egu gaukara lau hanamoa bona Iehova ena mamoe lau naria namonamo totona.”
“Lau hegeregere vadaeni, Baibel ena hereva badadia amo ma haida lau hagoadaia totona.”
“Unai sikuli amo lau dibaia gaudia be egu mauri lalonai do lau gaukaralaia.”
Loaloa Naria Taudia Bona Adavadia Edia Sikuli
Badina: Sekit bona distrik naria taudia ia durua, kongrigeisen lalonai “mai edia goada ida Dirava ena hereva idia herevalaia bona idia hadibaia” namonamo totona.—1 Tim. 5:17; 1 Pet. 5:2, 3.
Ena Daudau: Hua rua.
Gabu: Brens ofesi ese ia abia hidi.
Idia Hegeregere Taudia: Sekit bona distrik naria taudia.
Vareai Dalana: Brens ofesi ese loaloa naria taudia bona adavadia ia boiridia.
“Iesu ese orea ia gunalaia dalana ai lalopararalaia namonamo. Ai itaia kongrigeisen dekenai lalotamona ia noho totona, tadikaka ai durua bona hagoadaia be gau badana. Danu sikuli amo ai dibaia, ena be loaloa naria tadikaka ese nega ta ta ma haida dekenai sisiba eiava matahakani ia henia, to namona be ia hahedinaraia Iehova ese idia ia lalokau henia.”—Joel, klas namba 1, 1999.
Singul Tadikaka Edia Baibel Sikuli
Badina: Singul elda bona hesiai taudia ia durua Iehova ena orea lalonai maduna ma haida idia huaia totona. Sikuli idia haorea taudia momo be edia tano ai, pablisa momo lasi gabudia dekenai idia siaia. Haida be tano ma ta dekenai idia siaia, bema idia sibona ese brens ofesi idia hadibaia idia ura unai idia karaia. Haida be gunika gabudia dekenai idia siaia nega sisina lalonai spesel painia gaukara idia karaia totona.
Ena Daudau: Hua rua.
Gabu: Brens ofesi ese ia abia hidi; nega momo Kingdom Hall o Assembly Hall ai.
Idia Hegeregere Taudia: Singul tadikaka edia mauri lagani be 23 ia lao 62 huanai, edia helt ia namo bona idia ura pablisa be momo lasi gabudia ai haroro gaukara idia karaia. (Mar. 10:29, 30) Idia be lagani rua lalonai regula painia, elda o hesiai tauna ena maduna idia huaia, bona unai idia do karaia noho.
Vareai Dalana: Unai sikuli idia ura lao taudia edia hebou be sekit hebouhebou ai do idia karaia, bona unuseniai hadibaia hereva ma haida do idia gwauraia.
Rick be United States ai idia karaia klas namba 23 dekenai ia lao, bona ia gwau: “Unai sikuli lau lao neganai, Iehova ena lauma helaga ese egu mauri ia haidaua. Iehova ese oi dekenai gaukara ta ia henia neganai, ia be oi do ia durua unai gaukara oi hagugurua totona. Lau itaia bema sibona egu ura lau dadaraia, bona Dirava ena ura lau atoa guna, ia ese lau do ia hagoadaia.”
Germany ai hesiai gaukara ia karaia tadikaka Andreas, ia gwau: “Lau itaia Iehova ena orea be hoa dalanai ia gaukara. Unai treinini ese lau ia durua gabeai gaukara ma haida lau karaia totona. Danu, Baibel ena haheitalai momo amo inai mai anina bada gauna lau dibaia: Iehova bona tadikaka taihu lau hesiai henia neganai, moale korikorina do lau davaria.”
Keristani Headava Taudia Edia Baibel Sikuli
Badina: Headava taudia idia hadibaia namonamo, unai amo Iehova bona ena orea ese idia gaukaralaidia diba. Sikuli idia haorea taudia momo be edia tano ai, pablisa momo lasi gabudia dekenai idia siaia. Haida be tano ma ta dekenai idia siaia, bema idia ura unai bamona idia karaia. Haida be gunika gabudia dekenai idia siaia, nega sisina lalonai spesel painia gaukara idia karaia totona.
Ena Daudau: Hua rua.
Gabu: Inai sikuli be United States dekenai idia hamatamaia, bona September 2012 ai tanobada hegegemadai idia noho brens ofesi haida dekenai do idia karaia danu; Kingdom Hall o Assembly Hall ai.
Idia Hegeregere Taudia: Headava taudia, edia mauri lagani be 25 bona 50 huanai, edia helt ia namo, bona edia noho dalana ia hegeregere pablisa momo lasi gabudia idia lao totona. Bona edia lalohadai be: “Lau be inai, . . . Lau do oi siaia!” (Isa. 6:8) Ma danu, idia be lagani rua lalonai idia headava vadaeni bona lagani rua lalonai ful-taim hesiai gaukara idia karaia. Namona be tadikaka be lagani rua lalonai elda eiava hesiai tauna ena gaukara ia karaia vadaeni.
Vareai Dalana: Unai sikuli idia ura lao taudia edia hebou be distrik hebouhebou ai do idia karaia, bona unuseniai hadibaia hereva ma haida do idia gwauraia. Bema unai hebou idia karaia lasi, to oi ura unai sikuli dekenai oi lao, brens ofesi oi tore henia diba hereva ma haida oi abia totona.
“Wiki 8 lalonai unai sikuli ai karaia bona emai mauri ia haidaua. Bema headava taudia idia ura edia hesiai gaukara idia habadaia, unai sikuli idia lao be hahenamo badana! Emai lalona ai hadaia, emai mauri lalonai emai nega do ai haria namonamo bona aonega dalanai do ai gaukaralaia.”—Eric bona Corina (henunai), klas namba 1, 2011.
Gilead Sikuli
Badina: Stiuden taudia idia hadibaia taunimanima momo idia noho gabudia ai, misinari gaukara do idia karaia, loaloa naria taudia o Betele taudia ai do idia lao totona. Sikuli idia karaia ena badina be haroro gaukara bona brens ena gaukara idia durua totona.
Ena Daudau: Hua faiv.
Gabu: Watchtower Educational Center, Patterson, New York, U.S.A.
Idia Hegeregere Taudia: Ful-taim hesiai gaukara idia karaia headava taudia, hegeregere Gilead sikuli idia do lao lasi misinari taudia, spesel painia taudia, loaloa naria taudia o Betele taudia. Namona be idia ese lagani toi lalonai ful-taim hesiai gaukara idia karaia vadaeni. Namona be English gado ai idia hereva, duahiduahi, bona toretore diba.
Vareai Dalana: Brens komiti ese headava taudia idia boiria.
Lade bona Monique be United States amo bona Africa dekenai idia gaukara noho. Lade ia gwau: “Gilead Sikuli ese ai ia durua tanobada ena kahana ta dekenai ai lao, bona tadikaka taihu ida ai gaukara hebou totona.”
Monique ia gwau: “Baibel amo lau dibaia gaudia lau badinaia neganai, egu hesiai gaukara lau moalelaia bada. Unai ese ia hamomokania Iehova be lau ia lalokau henia.”
Brens Komiti Taudia Bona Adavadia Edia Sikuli
Badina: Brens komiti taudia ia durua, Betele rumadia, kongrigeisen idauidau, sekit bona distrik gaukara, gado hahanaia gaukara, printa gaukara, bona buka siaia dipatmen idia naria totona.
Ena Daudau: Hua rua.
Gabu: Watchtower Educational Center, Patterson, New York, U.S.A.
Idia Hegeregere Taudia: Brens Komiti o Tano Komiti, o unai bamona gaukara karaia totona idia abia hidi taudia.
Vareai Dalana: Hakaua Oreana ese tadikaka bona adavadia ia boiria.
Lowell bona Cara, be klas namba 25 dekenai idia lao. Hari, idia be Nigeria ai idia gaukara. Lowell ia gwau: “Herevana lau bisi bada eiava lau dekenai dahaka gaukara idia henia, to Iehova hamoalea totona ena dala lau badinaia be gau badana. Danu, unai sikuli ese ia hahedinaraia ma haida ita kara henia neganai, Iehova ese ena hesiai taudia ia lalokau henia dalana ita tohotohoa be namo.”
Cara ia gwau: “Lau laloa dobu point badana ta be inai, bema ma ta hadibaia totona auka lasi dalanai hahediba herevana ta lau gwauraia hedinarai namonamo lasi, anina be lau ese unai hahediba herevana lau stadilaia namonamo be namo.”