Iehova amo Diba Oi Abia Noho, A?

1. Hadibaia karana dekenai Iehova ena ura be dahaka?

¹ Iehova, iseda “Hadibaia Tauna Badana,” ia ura ita ia hadibaia. (Isa. 30:​20, NW ) Iena vara guna Natuna ia havaraia murinai ena hadibaia karana ia matamaia. (Ioa. 8:​28) Adamu ia gwau-edeede murinai, Iehova be ena hadibaia karana ia hadokoa lasi, to mai lalokau ida goevadae lasi taudia ia hadibaia noho.​​—Isa. 48:​17, 18; 2 Tim. 3:​14, 15.

2. Edena hadibaia gaukara badana idia karaia noho?

² Hari, Iehova be hadibaia gaukara badana ia gunalaia noho. Isaia ia peroveta bamona, tanobada hegegemadai milioni momo be “Lohiabada ena Dubu Helaga ia gini ororona” dekenai idia aru lao noho. (Isa. 2:2) Dahaka dainai idia lao? Iehova ese ena dala be idia dekenai ia hadibaia totona! (Isa. 2:3) Hesiai laganina 2010 ai, Iehova ena Witnes taudia be hora 1.6 bilioni idia gaukaralaia, Baibel ena hereva momokani be taunimanima dekenai idia harorolaia bona hadibaia totona. Danu, tanobada hegegemadai kongrigeisen 105,000 bamona be wiki ta ta ai Dirava ena hereva amo diba idia abia noho, bona igui hesiai tauna mai ena kamonai ese buka bona magasin be gado 500 mai kahana ai idia halasia.

3. Edena dala ai Iehova amo oi abia dibana ese oi ia durua?

³ Ita Ia Durua: Dirava amo ita abia dibana ese ita ia durua bada! Ita diba Dirava be mai ena ladana bona ita ia laloa bada. (Sal. 83:18; 1 Pet. 5:​6, 7) Mauri lalonai ita be mai anina bada henanadai haida edia haere ita dibaia: Dahaka dainai taunimanima idia hisihisi bona idia mase? Moale korikorina be edena bamona lau davaria diba? Mauri ena anina be dahaka? Danu Iehova ese ita dekenai kara maoromaoro taravatudia ia henia, unai amo iseda ‘raka dalana do ia namo.’​​—Ios. 1:8.

4. Edena sikuli haida idia noho Dirava ena hesiai taudia totona, bona dahaka dainai Iehova amo diba ita abia be namo?

⁴ Iehova be sikuli haida ia hegaegaelaia, ena hesiai taudia ia durua edia hesiai gaukara idia habadaia totona. Rau 8-11 ai unai sikuli haida edia lista ia noho. Ena be iseda noho dalana dainai, unai bamona sikuli ta ita lao lasi, to Dirava amo ita abia noho dibana ita laloa bada, a? Matamata taudia​—nega momo sikuli tisa bona ma haida ese idia doria sikuli badadia idia lao taudia​—​ita hagoadaia, tahua gaudia namodia idia atoa bona Dirava amo diba hereadaena idia abia totona, a? Iehova amo diba ita abia noho karana ese ita durua, hari mauri ita moalelaia bona nega vairai mauri hanaihanai ita abia.​​—Sal. 119:105; Ioa. 17:3.

Iehova Ena Orea ese Ia Hegaegaelaia Sikuli Haida

Duahiduahi Bona Toretore Sikuli

• Badina: Taunimanima dekenai duahiduahi bona toretore ia hadibaia, unai amo sibona edia Baibel idia duahia bona stadilaia bona ma haida dekenai hereva momokani idia hadibaia.

• Ena Daudau: Stiuden ena laloparara hegeregerena.

• Gabu: Kingdom Hall.

• Vareai Taudia: Pablisa bona kamonai taudia ibounai.

• Vareai Dalana: Kongrigeisen elda taudia ese unai sikuli idia hegaegaelaia, bona duahiduahi bona toretore idia ura diba taudia ibounai idia hagoadaia, unai sikuli dekenai idia vareai totona.

Tiokratik Haroro Sikuli

• Badina: Pablisa ia hadibaia sivarai namona idia harorolaia bona hadibaia namonamo totona.

• Ena Daudau: Wiki ta ta ibounai.

• Gabu: Kingdom Hall.

• Vareai Taudia: Pablisa ibounai. Danu, kongrigeisen hebou idia mai hanaihanai taudia idia vareai diba, bema Baibel ena hadibaia herevadia idia abia dae bona edia mauri be Keristani hakaua herevadia hegeregerena.

• Vareai Dalana: Tiokratik Haroro Sikuli naria tauna hereva henia.

Gado Ma ta Dibaia Sikuli

• Badina: Pablisa ia hadibaia gado ma ta ai sivarai namona idia harorolaia totona.

• Ena Daudau: Hua foa o faiv. Nega momo Saturday daba ai, hora ta o rua lalonai idia karaia.

• Gabu: Kingdom Hall.

• Vareai Taudia: Idia ura gado ma ta ai idia haroro pablisa bona idia be haheitalai namona.

• Vareai Dalana: Bema haida idia ura gado ma ta idia dibaia, Brens opesi ese unai sikuli idia hegaegaelaia.

Kingdom Hall Konstraksen

• Badina: Kingdom Hall haginia bona hanamoa totona. Ia be sikuli lasi, to unai gaukara amo volantia taudia be gaukara idauidau idia hadibaia, haginia gaukara idia durua totona.

• Ena Daudau: Volantia taudia edia noho dalana hegeregerena.

• Gabu: Regional Building Committee ese ia naria gabudia ta ta ai. Reana volantia taudia haida do idia noia, dika idia vara gabudiai heduru idia henia totona.

• Idia Hegeregere Taudia: Idia be bapatiso tadikaka taihu, bona elda oreana ese ia abia hidi. Reana edia diba be bada o bada lasi.

• Vareai Dalana: Kongrigeisen elda amo Kingdom Hall Volunteer Worker Questionnaire (S-82-E) fom ta oi abia bona hahonua.

Painia Sikuli

• Badina: Painia taudia ia durua ‘edia hesiai gaukara idia hagugurua momokani’ totona.​​—2 Tim. 4:5.

• Ena Daudau: Wiki rua.

• Gabu: Brens ese ia abia hidi; nega momo be Kingdom Hall ai idia karaia.

• Idia Hegeregere Taudia: Lagani ta bamona idia regula painia taudia.

• Vareai Dalana: Sekit naria tauna ese ia abia hidi.

Betele Sikuli

• Badina: Inai sikuli ese Betele ai idia vareai taudia matamatadia ia durua edia gaukara idia karaia namonamo totona.

• Ena Daudau: Wiki 16. Unai wiki ta ta lalonai hora tamona idia sikuli.

• Gabu: Betele.

• Idia Hegeregere Taudia: Idia be Betele ai idia noho o nega sisina daudau volantia gaukara idia karaia (lagani ta o ma haida).

• Vareai Dalana: Brens opesi ese Betele taudia ia abia hidi.

Basileia Hesiai Gaukara Sikuli

• Badina: Elda bona hesiai taudia ia hadibaia, orea ena gaukara idauidau idia naria totona. (Kara 20:28) Inai sikuli be lagani haida murinai idia karaia, Hakaua Oreana ese ia abia hidi hegeregerena.

• Ena Daudau: Vanegai lagani lalodiai, elda taudia totona unai sikuli be dina ta mai kahana lalonai idia karaia bona hesiai taudia totona be dina tamona.

• Gabu: Nega momo be Kingdom Hall o Assembly Hall ai.

• Idia Hegeregere Taudia: Elda bona hesiai taudia.

• Vareai Dalana: Sekit naria tauna ese elda bona hesiai taudia ia boiria.

Elda Taudia Edia Sikulia

• Badina: Elda taudia ia durua edia kongrigeisen maduna idia huaia namonamo totona.

• Ena Daudau: Dina faiv.

• Gabu: Brens opesi ese ia abia hidi; nega momo be Kingdom Hall o Assembly Hall ai.

• Idia Hegeregere Taudia: Elda taudia.

• Vareai Dalana: Brens opesi ese elda taudia ia boiria.

Loaloa Naria Taudia Bona Adavadia Edia Sikulib

• Badina: Sekit bona distrik naria taudia ia durua, kongrigeisen idauidau ai hesiai gaukara idia karaia namonamo totona, bona “mai edia goada ida Dirava ena hereva idia herevalaia bona idia hadibaia” bona edia mamoe naria gaukarana idia karaia namonamo totona.​​—1 Tim. 5:​17; 1 Pet. 5:​2, 3.

• Ena Daudau: Hua rua.

• Gabu: Brens opesi ese ia abia hidi.

• Idia Hegeregere Taudia: Sekit bona distrik naria taudia.

• Vareai Dalana: Brens opesi ese loaloa naria taudia bona adavadia ia boiria.

Singul Tadikaka Edia Baibel Sikulic

• Badina: Singul elda bona hesiai taudia ia durua maduna ma haida idia huaia totona. Sikuli idia haorea taudia momo do idia siaia edia tano ai pablisa momo lasi gabudia ai hesiai gaukara idia karaia totona. Haida be tano ma ta dekenai do idia siaia lao, bema idia sibona ese brens opesi idia hadibaia idia be hegeregere unai idia karaia totona.

• Ena Daudau: Hua rua.

• Gabu: Brens opesi ese ia abia hidi; nega momo be Kingdom Hall o Assembly Hall ai.

• Idia Hegeregere Taudia: Singul tadikaka, edia mauri lagani be 23 ia lao 62 huanai bona edia helt ia namo, bona idia ura pablisa be momo lasi gabudia ai tadikaka idia hesiai henia bona Basileia gaukaradia idia durua. (Mar. 10:​29, 30) Idia be lagani rua lalonai elda o hesiai maduna idia huaia bona unai idia do karaia noho.

• Vareai Dalana: Bema unai sikuli be emu brens teritori ai idia karaia, unai sikuli idia ura lao taudia edia hebou be sekit hebouhebou ai do idia karaia. Hadibaia hereva ma haida be unai hebou ai do idia gwauraia.

Keristani Headava Taudia Edia Baibel Sikulid

• Badina: Headava taudia idia hadibaia namonamo, unai amo Iehova bona ena orea ese idia gaukaralaidia diba. Sikuli idia haorea taudia momo do idia siaia edia tano ai pablisa momo lasi gabudia ai hesiai gaukara idia karaia totona. Haida be tano ma ta dekenai do idia siaia lao, bema idia sibona ese brens opesi idia hadibaia idia be hegeregere unai idia karaia totona.

• Ena Daudau: Hua rua.

• Gabu: Unai sikuli be Watchtower Educational Center, Patterson, New York, U.S.A. ai idia hamatamaia. Gabeai, brens opesi ese unai sikuli do idia karaia gabudia do idia abia hidi, nega momo be Kingdom Hall o Assembly Hall ai.

• Idia Hegeregere Taudia: Headava taudia, edia mauri lagani be 25 bona 50 huanai bona edia helt ia namo. Edia noho dalana ia hegeregere, pablisa momo lasi gabudiai idia lao totona, bona edia lalohadai be: “Lau be inai, do lau lao! Lau do oi siaia!” (Isa. 6:8) Ma danu, edia headava lagani be rua bona hari lagani rua lalonai ful-taim hesiai gaukara idia karaia.

• Vareai Dalana: Bema sikuli be emu brens teritori ai idia karaia, unai sikuli idia ura lao headava taudia edia hebou be dina tamona hebouhebou ai do idia karaia. Hadibaia hereva ma haida be unai hebou ai do idia gwauraia.

Gilead Sikuli

• Badina: Painia bona ful-taim hesiai gaukara ma haida idia karaia taudia be misinari gaukara totona ia hadibaia.

• Ena Daudau: Hua faiv.

• Gabu: Watchtower Educational Center, Patterson, New York, U.S.A.

• Idia Hegeregere Taudia: Headava taudia, edia bapatiso laganidia be toi bona edia mauri lagani be 21 bona 38 huanai neganai aplikeisen idia atoa diba. Idia be English gado idia herevalaia bona edia headava lagani be rua, bona hari lagani rua lalonai ful-taim hesiai gaukara idia karaia. Edia helt be namo. Tano ma ta ai idia painia taudia (misinari taudia danu); loaloa naria taudia; Betele taudia; bona guna Hesiai Gaukara Hadibaia Sikulina, Singul Tadikaka Edia Baibel Sikuli, bona Keristani Headava Taudia Edia Baibel Sikuli idia lao taudia danu be aplikeisen idia atoa diba, bema idia hegeregere.

• Vareai Dalana: Idia abia hidi brens ta ta ai, unai sikuli idia ura lao taudia edia hebou be distrik hebouhebou ai do idia karaia. Hadibaia hereva ma haida be unai hebou ai do idia gwauraia. Bema emu tano ai unai hebou be distrik hebouhebou ai idia karaia lasi, to oi ura unai sikuli oi lao, hadibaia hereva haida totona emu brens opesi oi tore henia diba.

Brens Komiti Taudia Bona Adavadia Edia Sikuli

• Badina: Brens komiti taudia ia durua, Betele rumadia, kongrigeisen idauidau, sekit bona distrik gaukara, gado hahanaia gaukara, printa, bona buka siaia dipatmen bona ma dipatmen idauidau idia naria totona.​​—Luka 12:48b.

• Ena Daudau: Hua rua.

• Gabu: Watchtower Educational Center, Patterson, New York, U.S.A.

• Idia Hegeregere Taudia: Brens Komiti o Tano Komiti, o unai gaukara totona idia abia hidi taudia.

• Vareai Dalana: Hakaua Oreana ese tadikaka bona adavadia ia boiria.

[Footnotes]