Sikuli ta Idia Haorea Taudia ese Tanobada Taudia Ibounai Idia Durua

TANO 200 mai kahana dekenai, Iehova ena Witnes taudia edia kongrigeisen 98,000 mai kahana lalonai, Dirava ese taunimanima idauidau ia hadibaia. Unai taudia ese Baibel amo diba idia abia, bona unai diba ese ta ta ia durua Iehova ena ura idia dibaia bona Iena ura hegeregerena idia noho dainai, idia goada idia lao. Unai diba idia abia taudia ese namo bada idia davaria. Danu, idia dibaia gaudia be ma haida dekenai idia hadibaia, Iesu Keriso ese ena hahediba taudia ia hadibaia hegeregerena.​​—⁠Mataio 28:​19, 20.

Iehova ena Witnes taudia be edia kongrigeisen ena sikuli sibona lasi, to sikuli ma haida idia haginia danu. Unai bamona sikuli ta be Hesiai Gaukara Hadibaia Sikulina. Unai sikuli be October 1987, Pittsburgh, Pennsylvania, U.S.A. dekenai ia matamaia. Sikuli ginigunana lalonai be English gado idia herevalaia tadikaka 24 idia vareai. To hari tano 43 dekenai, unai sikuli be gado 21 ai idia karaia. Unai sikuli dekenai be headava lasi elda bona hesiai taudia idia vareai, bona idia be tano 90 mai kahana amo idia mai. Idia ese pura 8 ena kosi idia haorea neganai, haroro taudia be momo lasi tanodia​​—⁠edia tano eiava tano ma ta​​—⁠dekenai idia siaia lao. Lagani 2005 ena dokonai, tadikaka ibounai 22,000 mai kahana be unai sikuli idia haorea. Unai tadikaka be mai manau ida Basileia ena gaukara idia habadaia bona ma haida idia durua dainai, Iehova ese edia hekwarahi ia hanamoa.​​—⁠Aonega Herevadia 10:22; 1 Petero 5:⁠5.

Dala Idia Karaia Sikuli Idia Lao Totona

Tadikaka momo be Hesiai Gaukara Hadibaia Sikulina idia lao totona, namona be edia gaukara biaguna idia noia moni gaukara amo idia laga-ani o holide totona. To nega haida unai bamona idia karaia totona be auka. Hawaii dekenai, Hesiai Gaukara Hadibaia Sikulina ena boiboi idia abia dae tadikaka rua be tanobada ena sikuli dekenai tisa gaukara idia karaia dainai, namona be edia gaukara biaguna idia noia idia holide totona. Idia diba Iehova ese idia do ia durua dainai, revareva ta dekenai unai sikuli do idia lao ena badina bona ena namo idia torea bena idia siaia. Unai tadikaka rua be edia biaguna ese gwaumaoro ia henidia bona unai sikuli dekenai idia lao.

To, nega haida gaukara biaguna ese Witnes taudia ia hamaoroa bema idia holide bona unai sikuli dekenai idia lao, vadaeni edia gaukara do idia haboioa. Herevana tadikaka be edia moni gaukara do idia abia lou o lasi, to idia ura Iehova ena orea amo diba idia abia. Tadikaka haida be gabeai edia gaukara biaguna ese revareva amo idia ia hadibaia, sikuli idia haorea murinai edia gaukara dekenai idia giroa lou totona. Bema ta be ena lalona ia hadaia unai sikuli ia lao totona, inai hakaua herevana ia badinaia be namo: Emu gaukara biaguna oi noia gaukara amo oi laga-ani totona, Iehova ena heduru totona oi guriguri, bona Ia ese oi do ia durua.​​—⁠Salamo 37:⁠5.

‘Iehova ese Ia Hadibaia’

Unai wiki 8 sikulina lalonai, tadikaka ese Baibel idia stadilaia namonamo. Bona idia dibaia gaudia haida be inai: Iehova ena taunimanima be Dirava ena ura idia karaia namonamo dalana, bona edia haroro gaukara, hebou badadia bona maragidia dekenai Baibel idia gaukaralaia namonamo diba dalana.

Unai sikuli ia haorea bona ia moalelaia tadikaka ta be stiuden ta ia tore henia neganai, ia gwau: “Momokani, unai sikuli amo oi be diba bada herea do oi abia. Siri ta be mai anina bada, ia gwau, ‘Iehova ese oi do ia hadibaia.’ Unai sikuli ese emu kudouna bona kara do ia hanamoa, Iesu Keriso ena haheitalai oi tohotohoa totona. Unai sikuli dekenai diba bada herea do oi abia.”​​—⁠Isaia 54:​13, BHğ.

Haroro Taudia, Mamoe Naria Taudia, Bona Hadibaia Taudia

Hesiai Gaukara Hadibaia Sikulina idia hagugurua tadikaka be hari tano 117 dekenai hesiai gaukara idia karaia. Hegeregere, Atlantic, Caribbean, bona Pacific ena gabu haida, bona Iehova ena Witnes taudia edia brens opesi idia noho gabudia. Brens haida idia gwau, tadikaka ese unai sikuli amo idia abia dibana be edia haroro, hadibaia, bona mamoe naria gaukarana dekenai idia gaukaralaia. Unai sikuli ese idia ia durua haroro gaukara lalonai Baibel idia gaukaralaia namonamo totona. (2 Timoteo 2:​15) Ruma tauna ena henanadai idia haerelaia totona, idia ese Buka Helaga Herevalaiaa bukana idia gaukaralaia momo, bona pablisa ma haida idia hadibaia unai bamona idia karaia totona. Unai sikuli idia hagugurua taudia be idia gaukara goadagoada dainai, unai ese kongrigeisen taudia ia hagoadaia bada.

Kongrigeisen elda taudia ese ‘mamoe orea idia naridia’ be hahenamo badana, bona idia ese ma haida idia durua Iehova idia tura henia totona. (1 Petero 5:​2, 3) Elda ta ia gwau: “Ai moale badina brens opesi ese unai sikuli idia haorea tadikaka idia siaia, bona idia ese ai idia durua Dirava ena mamoe ai naridia totona.” Asia ena kahana ta dekenai, brens tadikaka idia gwau: “Unai sikuli idia hagugurua tadikaka be mai edia hebogahisi. Idia gaukara goada bona kongrigeisen ese ia matauraidia. Momo ese unai tadikaka edia manau, lalokau, bona ura idia laloa bada. Unai tadikaka be sibona idia henia dainai, mai edia moale ida elda o hesiai taudia idia noho lasi kongrigeisen dekenai idia lao.” (Filipi 2:⁠4) Unai bamona tadikaka ese edia tadikaka idia hagoadaia dainai, idia ita hanamoa be namo.​​—⁠1 Korinto 16:⁠18.

Danu, Hesiai Gaukara Hadibaia Sikulina ena tisa taudia ese stiuden idia durua tok idia henia namonamo totona. Tadikaka momo ese unai sikuli ena heduru bona sisiba idia badinaia dainai, sekit bona distrik hebouhebou dekenai idia ese tok namodia idia henia diba. Sekit naria tauna ta ia gwau, unai sikuli idia hagugurua tadikaka be “tok namodia idia henia, bona taunimanima ese idia lalopararalaia dalanai tok idia henia.”​​—⁠1 Timoteo 4:​13.

Africa ai, Hesiai Gaukara Hadibaia Sikulina idia karaia murinai, tadikaka be edia kongrigeisen dekenai idia giroa lou neganai, edia hadibaia karana be namo herea. Unai sikuli idia hagugurua elda taudia ese haroro, mamoe naria, bona hadibaia gaukaradia idia durua dainai, kongrigeisen idia goada.​​—⁠Efeso 4:​8, 11, 12.

Kongrigeisen Naria Gaukarana Idia Hanamoa

Gabu haida ai, elda bona hesiai taudia be momo lasi. Bema Hesiai Gaukara Hadibaia Sikulina idia hagugurua tadikaka idia siaia lasi, anina be kongrigeisen haida dekenai elda be lasi. Unai dainai, sikuli idia hagugurua taudia momo be unai bamona gabudia dekenai idia siaia lao.

Brens momo idia gwau, unai stiuden be “orea naria dalana idia diba namonamo,” “kongrigeisen dekenai edia gaukara idia laloa bada totona,” “ma haida idia durua Iehova ena orea idia laloa bada bona matauraia totona,” bona “edia kongrigeisen idia lalokau henia bona hagoadaia.” Tadikaka be unai bamona idia karaia badina Baibel idia badinaia bona sibona edia aonega o laloparara dekenai idia tabekau lasi. (Aonega Herevadia 3:​5-7) Idia be harihari gaudia bamona edia kongrigeisen dekenai.

Gabu Daudau Dekenai Hesiai Gaukara Idia Karaia

Unai sikuli idia hagugurua taudia haida be spesel painia gaukara idia karaia, bona gabu daudau grup idia durua kongrigeisen ai idia lao totona. Guatemala dekenai, elda ta be unai bamona spesel painia tadikaka edia heduru dainai ia moale, bona ia gwau: “Lagani 20 lalonai lau lalohekwarahi, badina edena bamona inai teritori badana do lau naria. Nega momo unai lau gurigurilaia. To, Hesiai Gaukara Hadibaia Sikulina amo idia mai tadikaka be orea haheaua namonamo bona tok henia daladia idia diba namonamo, bona lau moale badina hari inai gabu dekenai ai be heduru namona ai abia.”

Unai sikuli idia hagugurua tadikaka haida ese idia dibaia gauna be inai: Gabu daudau teritori dekenai idia noho hanua maragidia idia davaria totona, idia be gabu daudau idia raka bona ororo idia hanaia. Unuseniai, idia ese maoromaoro grup maragidia idia haginia bona pablisa idia hadibaia unai grup idia naria totona, ena be pablisa haida ese unai idia karaia be auka. Hegeregere Niger dekenai, elda ta ia noinoi unai sikuli idia hagugurua tadikaka haida do idia siaia totona, badina ia laloa ena gabu dekenai unai tadikaka be gaukara namona do idia karaia. Reana idia headava lasi spesel painia bona sekit taudia be unai bamona gabudia dekenai idia lao be namo. Aposetolo Paulo bamona, tadikaka be ‘sinavai abata edia lalonai kahirakahira idia mase, henaoa taudia ese idia hadikaia,’ idia lalohisihisi bona idia durua kongrigeisen idia laloa momo.​​—⁠2 Korinto 11:​26-​28.

Matamata Taudia Idia Durua

Baibel ese matamata taudia ia hagoadaia edia Havaraia Tauna idia laloa totona. (Hadibaia Tauna 12:⁠1) Hesiai Gaukara Hadibaia Sikulina idia hagugurua tadikaka be idia gaukara goadagoada​—⁠idia be haheitalai namona Keristani matamata taudia totona. Unai sikuli idia hagugurua tadikaka rua be United States ena kongrigeisen ta dekenai idia lao neganai, unai kongrigeisen ena haroro gaukara ena hora ia bada daekau. Guna regula painia taudia​—⁠o hanaihanai Basileia idia haroro taudia​—⁠be rua, to hari unai namba ia bada daekau 11. Kongrigeisen momo dekenai danu unai bamona ia vara.

Unai sikuli idia hagugurua stiuden ese headava lasi tadikaka idia hagoadadia Hesiai Gaukara Hadibaia Sikulina idia lao be namo. Unai bamona herevadia ese haida idia hagoadaia kongrigeisen ena hesiai tauna ena maduna idia tahua totona. Netherlands brens tadikaka idia gwau, matamata taudia haida be idia daradara edia mauri lalonai dahaka do idia karaia, bona Hesiai Gaukara Hadibaia Sikulina idia haorea tadikaka “edia haheitalai namona ese unai matamata taudia do ia durua bada.”

Gado Ma Ta Idia Herevalaia Kongrigeisen Dekenai Hesiai Gaukara Idia Karaia

Gabu momo ai, gado ma ta idia herevalaia taudia dekenai sivarai namona harorolaia karana be ia bada ia lao. Nega momo, Hesiai Gaukara Hadibaia Sikulina idia haorea tadikaka be gado ma haida idia dibaia bona taunimanima momo (edia tano korikori idia rakatania taudia) idia noho teritori dekenai hesiai gaukara idia karaia. Hegeregere, Belgium dekenai Albania, Persia, bona Russia gado idia herevalaia taudia be momo dainai, unai gabudia dekenai Basileia harorolaia tadikaka momo idia siaia be namo.

Britain, Germany, Italy, Mexico, United States, bona tano ma haida dekenai, gado ma ta idia herevalaia kongrigeisen bona grup be Hesiai Gaukara Hadibaia Sikulina idia hagugurua loaloa naria taudia, elda, bona hesiai taudia amo heduru bada idia abia vadaeni. Korea brens tadikaka ia gwau, “Hesiai Gaukara Hadibaia Sikulina idia hagugurua tadikaka 200 mai kahana be gado ma ta idia herevalaia kongrigeisen bona grup idia durua bada.”

Mai Manau ida Maduna Ma Haida Idia Huaia

Hesiai Gaukara Hadibaia Sikulina idia hagugurua tadikaka be elda, hesiai taudia, bona loaloa naria gaukaradia idia karaia danu. Tadikaka ma haida be tano ma haida dekenai idia lao, reana brens dekenai Haroro Naria Dipatmen idia naria. Reana konstraksen gaukara idia diba momo tadikaka be Kingdom Hall haginia gaukarana idia durua.

Tanobada hegegemadai, kongrigeisen bona sekit edia namba idia bada daekau dainai, hanaihanai loaloa naria taudia momo idia lao be namo. Unai dainai, brens opesi be Hesiai Gaukara Hadibaia Sikulina idia haorea tadikaka haida idia abia hidi, wiki ten lalonai treinini idia abia, unai amo sekit naria tauna idia durua o sekit naria taudia ai idia lao. Unai sikuli idia hagugurua tadikaka 1,300 mai kahana be hari gabu 97 dekenai loaloa naria gaukara idia karaia. Africa ena tano ta ai, loaloa naria tadikaka 100, amo 55 be Hesiai Gaukara Hadibaia Sikulina idia haorea. Africa ena gabu ma ta dekenai, loaloa naria tadikaka 100 amo, 70 be unai sikuli idia haorea.

Asia, Australia, Canada, Europe, bona United States dekenai, unai sikuli idia hagugurua tadikaka be tano ma haida dekenai idia siaidia. Unai dala amo, idia ese tanobada taudia ibounai idia durua.

Iehova ese iena Natuna, Iesu Keriso amo haroro taudia, mamoe naria taudia, hadibaia taudia bona ma haida ia abia hidi, inai nega dokona lalonai Basileia gaukara idia habadaia totona. Dirava ena taunimanima edia namba be ia bada daekau noho, a? Oibe! Unai dainai, idia bapatiso vadaeni tadikaka ese edia gaukara idia habadaia be gau badana. (Isaia 60:22; 1 Timoteo 3:​1, 13) Hesiai Gaukara Hadibaia Sikulina ese elda bona hesiai taudia dekenai dala ia kehoa edia hesiai gaukara idia habadaia totona, unai amo idia sibona bona ma haida ese namo bada idia davaria.

[Footnote]

[Pictures on page 10]

Hesiai Gaukara Hadibaia Sikulina ese tanobada hegegemadai Basileia gaukarana ia habadaia

[Pictures on page 13]

Oi ura Hesiai Gaukara Hadibaia Sikulina lalonai oi vareai bena ma haida oi durua, a?