Mai Ura ida Sibona Idia Henia​—Mexico Ai

ITA moale badina ita itaia Witnes matamata taudia momo be kohu momo lasi maurina idia noholaia, unai amo edia haroro gaukara idia habadaia diba. (Mat. 6:22) Edia mauri lalonai dahaka idia haidaua? Dahaka hekwakwanai idia davaria? Haere ita diba totona, mani Mexico ai idia haroro matamata taudia haida edia sivarai ita itaia.

“EMAI MAURI LALONAI GAU HAIDA AI HAIDAUA”

Dustin bona Jassa be United States amo bona January 2007 ai idia headava. Idia moale badina daudau lasi murinai, sailboat ta idia hoia bona unuseniai idia noho. Idia be Astoria, Oregon, U.S.A., ena taoni hairaina ta ena davara dekenai idia noho, bona ena ororo momo ai au idia tubu bona sinou ese idia koua. Danu, Astoria be Pacific Ocean kahirakahira ia noho. Dustin ia gwau: “Unai gabu ena toana be hairai momokani!” Idia ruaosi idia laloa, idia be kohu momo lasi maurina idia noholaia, bona Iehova dekenai idia tabekau. Idia gwau: ‘Ai be sailboat badana (7.9 mita) dekenai ai noho, pat-taim moni gaukara ai karaia, idau gado kongrigeisen ta ai bamoa bona nega ta ta heduru painia gaukara ai karaia.’ To, gabeai idia laloparara idia be sibona idia koia noho. Dustin ia gwau: “Nega bada ai haorea bouti ai hanamoa totona, bona kongrigeisen ai bamoa momo lasi. Ai laloparara bema ai ura emai mauri lalonai Iehova ai atoa guna, gau haida ai haidaua be namo.”

Jassa ia gwau: “Lau do headava lasi neganai, lau be Mexico ai English gado kongrigeisen ta lau bamoa. Unuseniai, egu hesiai gaukara lau moalelaia bona lau ura dikadika do lau giroa lou.” Dustin bona Jassa idia ura tano ma ta ai edia hesiai gaukara idia karaia. Unai ura idia habadaia totona ruma bese tomadiho ai, sivarai namona idia ura kamonai taudia be momo tanodia idia lao tadikaka taihu edia sivarai idia duahia. (Ioa. 4:35) Dustin ia gwau: “Ai ura unai bamona moale ai mamia danu.” Dustin bona Jassa be edia turadia amo idia kamonai Mexico ai idia haginia grup matamata ta be heduru ia ura. Unai dainai, edia lalona idia hadaia unuseni idia lao totona. Edia moni gaukara idia rakatania, sailboat idia hoihoilaia, bena Mexico dekenai idia lao.

“INISENI AI MAI BE HAHENAMO TA”

Dustin bona Jassa be taoni ta ladana Tecomán dekenai idia noho. Tecomán be Pacific Ocean kahirakahira ai, to Astoria ena saut kahana ai ia noho bona ena daudau be kilomita 4,345 bamona. Dustin ia gwau: “Guna ai be keru gabunai ai noho bona ororo ai itaia diba, to hari ai noho gabuna be siahu bona siporo au momo herea idia noho.” Matamanai, moni gaukara idia davaria be auka. Edia moni be hegeregere lasi dainai, wiki momo lalodiai dina ta ta, nega rua raisi bona bini sibona idia ania. Jassa ia gwau: “Raisi bona bini sibona ai ania dainai ai hesiku. To gabeai, emai Baibel stadi taudia ese vaivai, biku, nita, bona siporo baegedia momo idia mailaia!” Gabeai, Dustin bona Jassa be Intanet amo English gado be Taiwan taudia dekenai idia hadibaia. Unai moni gaukara amo idia abia pei be hegeregere, dina ta ta ena dabu gaudia idia hoia totona.

Dustin bona Jassa ese edia mauri dala matamatana be edena bamona idia laloa? Idia gwau: “Iniseni ai mai be hahenamo ta, badina hari emai hetura karana Iehova ida bona emai headava maurina be ia goada momokani. Dina ta ta ai ese gau momo ai karaia hebou​—⁠ai haroro hebou, Baibel stadi taudia durua daladia ai herevalaia hebou, bona Keristani hebou totona ai hegaegae hebou. Danu, hari ai mamia ai idia hametaua gaudia be momo lasi, guna bamona.” Ma idia gwau: “Guna ai be Salamo 34:8 (BHḡ) ena gwauhamata herevana ai lalopararalaia lasi, to hari ena anina ai diba namonamo. Unai siri ia gwau: ‘Oi mamia toho, bena oi diba, Iehova be namo.’”

GAUKARA TAUDIA TAUSEN MOMO​—⁠DAHAKA ESE EDIA LALONA IA VERIA?

Tadikaka taihu 2,900 mai kahana be Mexico dekenai idia lao, pablisa momo lasi gabudiai idia haroro totona. Idia momo be headava bona singul taudia, bona edia mauri lagani be 20 bona 30 lalodiai. Dahaka dainai unai Witnes taudia be unai gaukara idia abia dae? Idia haida dekenai unai henanadai idia henia neganai, badina toi idia herevalaia. Unai be dahaka?

(1) Iehova bona taunimanima idia lalokau henia. Leticia ena mauri lagani be 18 neganai bapatiso ia abia. Ia gwau: “Iehova dekenai gwauhamata lau karaia neganai, lau laloparara unai ena anina be egu mauri bona kudouna ibounai ida ia do lau hesiai henia. Unai dainai, egu lalokau Iehova dekenai lau hahedinaraia totona, lau ura egu nega bona goada ibounai ida iena hesiai gaukara lau karaia.” (Mar. 12:30) Leticia ena adavana Hermilo, ena mauri lagani be 20 bamona neganai pablisa momo lasi gabuna ta dekenai ia lao. Ia gwau: “Lau laloparara taunimanima lau durua Iehova idia tura henia neganai, lau ese dekena taudia lalokau henia karana lau hahedinaraia unai.” (Mar. 12:31) Guna, ia be Monterrey, taga taudia idia noho gabunai ia noho, banika ai ia gaukara bona mauri namona ia moalelaia. To, unai ia rakatania bona hari taoni maragina ta dekenai ia noho.

(2) Idia ura moale korikorina idia davaria. Leticia ia bapatiso murinai, painia taihu ta ia bamoa bona gabu daudau ai ia noho taoni ta idia lao, bona unuseniai hua ta idia haroro. Leticia ia gwau: “Lau itaia momo be Basileia ena sivarai idia kamonai dainai, lau hoa bona edia kara dekenai lau moale. Unai hua dokonai, lau gwau, ‘Lau ura egu mauri ibounai lalonai inai gaukara lau karaia!’” Unai hegeregerena, Essly, singul taihu ta ena mauri lagani be 20 bamona, be pablisa momo lasi gabudiai idia haroro tadikaka taihu edia moale ia itaia dainai, ia danu ia ura unai gaukara do ia karaia. Haisikuli ai ia noho neganai, ia ese pablisa momo lasi gabudiai idia haroro tadikaka taihu haida ia hedavari henia. Ia gwau: “Unai tadikaka taihu edia moale toana lau itaia neganai, unai ese egu lalona ia veria unai bamona mauri dalana lau abia hidi totona.” Taihu momo be Essly bamona idia karaia danu. Mexico ai, singul taihudia 680 mai kahana be pablisa momo lasi gabudiai idia haroro. Oibe, matamata bona buruka taudia dekenai idia be haheitalai namodia!

(3) Idia ura edia mauri idia gaukaralaia namonamo bona moalelaia. Essly be haisikuli ia haorea neganai, iunivesiti skolasip ta idia henia. Ena turadia ese ia idia doria unai skolasip do ia abia dae, unai amo digri ta ia abia, moni gaukara namona, motuka ia abia bona holidei totona gabu idauidau ia lao diba. To, edia hereva ia dadaraia. Essly ia gwau: “Lau itaia egu Keristani turadia haida be unai gaudia idia atoa guna, to Dirava ena hesiai gaukara idia laloa lasi. Danu, lau itaia hekwakwanai momo idia davaria bona idia lalohisihisi badina tanobada gaudia idia laloa bada. To, lau ura egu matamata negana lau gaukaralaia Iehova lau hesiai henia totona.”

Essly be kosi haida ia karaia, unai amo moni gaukara ia abia bona painia gaukara ia karaia diba. Gabeai, pablisa momo lasi gabuna ta dekenai ia lao. Danu, ia be Otomi bona Tlapaneco taudia edia gado ia dibaia. Lagani toi unai gunika hanuadia dekenai ia haroro, unai nega ia laloa lou bona ia gwau: “Pablisa momo lasi gabudia ai lau haroro dainai moale korikorina lau davaria. To mai anina bada gauna be, unai ese egu hetura karana Iehova ida ia hagoadaia.” Phillip bona ena adavana Racquel, be United States amo bona edia mauri lagani be 30 bamona, bona idia be Essly ena hereva dekenai idia lalotamona. Idia gwau: “Tanobada ia idau ia lao dainai, momo idia mamia edia mauri be auka. To, Baibel ena hereva idia kamonai henia taudia momo ai davaria neganai, ai mamia emai mauri be mai anina bada. Bona unai ai moalelaia!”

HEKWAKWANAI HANAIA DALANA

Pablisa momo lasi gabudiai hesiai gaukara karaia be mai ena hekwarahi. Hegeregere, ta be moni dalanai sibona ia naria be auka. Unai oi karaia totona, namona be oi gaukara goada emu hesiai gaukara oi karaia gabuna ai idia noho taudia edia mauri dalana oi manadalaia. Lagani momo ia painia taihu ta, Verónica ia gwau: “Guna, egu hesiai gaukara lau karaia gabuna ta ai aniani lau hegaegaelaia bona dava maragi ai lau hoihoilaia. Gabu ma ta dekenai, dabua lau hoihoilaia bona taunimanima edia huina lau utua. Hari, lau ese ruma hagoevaia gaukara lau karaia, bona tama sina matamatadia dekenai natudia ida herevahereva namonamo daladia lau hadibaia.”

Bema oi be idau tano taudia huanai oi noho, edia mauri dalana bona kastom karadia oi badinaia be mai ena hekwarahi. Phillip bona Racquel be Nahuatl gado idia herevalaia taudia huanai idia gaukara neganai unai idia mamia. Phillip ia gwau: “Edia noho dalana be idau.” Dahaka ese idia ia durua? Phillip ia gwau: “Nahuatl taudia ida ai noho neganai edia kara namodia sibona ai laloa bada, hegeregere edia famili idia gaukara hebou, mai lalokau ida ta ta idia kara heheni, bona hariharibada karana idia hahedinaraia.” Racquel ia gwau: “Unai hanua taudia huanai ai noho bona tadikaka taihu ida ai gaukara hebou amo gau momo ai dibaia.”

OI HEGAEGAE DALANA

Bema oi ura gunika hanuana ta dekenai hesiai gaukara oi karaia, edena dala ai oi hegaegae diba? Unai bamona hesiai gaukara idia manadalaia tadikaka taihu haida idia gwau: Namona be kohu momo lasi maurina oi manadalaia guna. (Fili. 4:11, 12) Dahaka gau ma haida oi karaia diba? Leticia ia gwau: “Lau ura lasi ful-taim moni gaukara lau abia bona gabu tamona dekenai lau noho. Badina lau ura egu nega ia noho gabu idauidau ai do lau lao hesiai gaukara lau karaia totona.” Hermilo ia gwau: “Lau be aniani nadua, dabua huria bona dabua iron dalana lau dibaia.” Verónica ia gwau: “Egu famili ida lau noho neganai, ruma hagoevaia bona dava maragi aniani namodia nadua dalana lau dibaia. Moni haboua namonamo dalana lau dibaia danu.”

Levi bona Amelia, United States amo be lagani eit idia headava vadaeni. Idia gwau Mexico dekenai idia lao totona, idia ia durua bada gauna be edia guriguri lalonai edia ura idia gwauraia hedinarai. Levi ia gwau: “Ai be lagani ta lalonai Mexico dekenai ai painia totona do ai haboua moni ai herevalaia murinai, Iehova ai noia ai do ia durua unai moni ai abia totona.” Hua haida murinai, edia guriguri ai idia gwauraia monina ibounai idia haboua, bena maoromaoro Mexico dekenai idia lao. Levi ia gwau: “Iehova ese emai guriguri ia haerelaia, unai dainai ai ura emai gwauhamata ai hagugurua.” Amelia ia gwau: “Ai laloa ai be lagani tamona sibona do ai noho, to hari ai be lagani seven ai noho vadaeni, bona ai ura lasi inai gabu do ai rakatania! Iniseni ai noho dainai Iehova ena heduru ai mamia momokani, bona dina ta ta ai ena kara namodia ai itaia.”

Adam bona ena adavana Jennifer be United States amo, bona Mexico ai English gado teritori ta dekenai hesiai gaukara idia karaia noho. Idia danu idia mamia guriguri karana be mai anina bada. Idia gwau: “Nega namona oi naria lasi. Idau tano ta dekenai hesiai gaukara oi ura karaia be Iehova dekenai oi gurigurilaia, bona emu guriguri hegeregerena oi kara. Kohu momo lasi maurina oi manadalaia, oi ura lao tanona ena brens ofesi oi tore henia, emu moni oi haboua bena unai tano dekenai oi lao!”a Bema unai bamona oi karaia, emu mauri do oi moalelaia, bona emu hetura karana Iehova ida be do ia goada.