Pablisa be Momo Lasi Gabudiai Oi Haroro Diba, A?

“United States ai, ai be moni bona kohu dekenai ai hegeregere, to ai diba vaira negadiai, unuseniai moni o kohu bada haboua karana ese ai bona emai natudia ruaosi ia hadikaia diba. Unai dainai, lau bona egu adavana ai ura misinari gaukara ai karaia lou be namo, badina guna unai gaukara lalonai moale ai davaria, herevana emai moni bona kohu be momo lasi.”

RALPH bona Pam idia ura misinari gaukara idia karaia lou dainai, lagani 1991 ai brens opesi haida idia tore henia, idia noinoi pablisa be momo lasi gabudia dekenai idia siaia lao totona. Mexico ena brens opesi edia haere be, unai gabu dekenai pablisa momo idia mai be gau badana, badina English gado idia herevalaia taudia be momo. Unai brens opesi ena hereva ese ia hahedinaraia, unai gabu ai uma ena anina be “idia kurokuro vadaeni gogoa totona.” (Ioa. 4:​35, NW ) Daudau lasi murinai, Ralph, Pam bona edia natudia memero rua​—⁠ta ena mauri lagani be 8 bona ma ta be 12​—⁠be unai boiboi idia abia dae, bona idia hegaegae matamaia Mexico dekenai idia lao totona.

Teritori Badana

Ralph ia gwau: “United States ai do rakatania lasi neganai, tadikaka taihu haida be emai namo idia laloa dainai idia gwau: ‘Gabu daudau lao karana be namo lasi!’ ‘Umui gorere neganai be edena bamona?’ ‘Dahaka dainai umui ura gabu ma ta dekenai umui lao, English gado teritori ai umui haroro totona? Unai taudia be hereva momokani do idia abia dae lasi!’ To, ai be abia hidi ai karaia vadaeni Mexico dekenai ai lao totona. Ai diba unai be abia hidi maorona, badina lagani momo lalonai unai ai palanilaia vadaeni. Unai dainai, abiatorehai badadia ai karaia lasi, moni ai haboua namonamo, bona nega momo emai ruma bese ida unuseniai do ai davaria hekwakwanai idauidau ai herevalaidia.”

Matamanai, Ralph bona ena ruma bese be Mexico ena brens opesi idia vadivadi henia. Unuseniai, tadikaka ese unai Mexico ena mapu be idia dekenai idia hahedinaraia bona idia gwau, “Inai be emui teritori!” Ralph bona ena ruma bese be San Miguel de Allende dekenai idia noho​—⁠unai taoni ena daudau Mexico City ena notwest amo be kilomita 240 bamona, bona unuseniai tano idauidau amo idia mai taudia momo idia noho. Lagani toi murinai, unuseniai English gado kongrigeisen ta idia haginia bona ena pablisa be 19. Mexico ai, unai be English kongrigeisen ginigunana​​—⁠to gaukara bada ia do noho.

America taudia milioni ta bamona be Mexico ai idia noho. Danu, Mexico taudia momo, hegeregere doketa taudia, loea taudia, bona stiuden taudia momo be English gado idia diba. Ralph ia gwau: “Ai guriguri Iehova ese haroro taudia ma haida ia siaia totona. Emai ruma ai daiutu ta be ia noho hegaegae, badina idia ura pablisa momo lasi gabunai heduru idia henia tadikaka be nega momo emai haroro gabuna ‘itaia’ totona idia mai.”​​—⁠Num. 13:⁠2.

Haroro Gaukara Idia Habadaia

Daudau lasi murinai, idia ura edia haroro gaukara idia habadaia tadikaka taihu ma haida idia mai. Idia rua be Bill bona ena adavana Kathy, United States amo idia mai. Idia be lagani 25 lalodiai pablisa be momo lasi gabudia dekenai idia haroro. Idia laloa Spanish gado idia dibaia be namo, unai amo unai gado idia herevalaia taudia idia haroro henia diba. To Lake Chapala ena kone kahanai ia noho taoni ta ladana, Ajijic dekenai idia lao neganai edia lalohadai idia haidaua, badina unuseniai be moni gaukara amo idia ritaea America taudia momo idia noho. Bill ia gwau, “Ajijic dekenai, ai gaukara goada English gado ai idia hereva bona idia ura hereva momokani idia dibaia taudia ai davaria totona.” Lagani rua murinai, Bill bona Kathy be unuseniai idia noho lalonai kongrigeisen ta idia haginia​​—⁠Mexico dekenai, unai be English kongrigeisen iharuana.

Canada dekenai, Ken bona Joanne idia ura edia noho dalana idia haidaua, unai amo nega bada idia henia diba haroro gaukara karaia totona. Unai dainai, idia bona edia natuna kekenina Britanny be Mexico dekenai idia lao. Ken ia gwau, “Unuseniai ranu siahu bona paua be lasi, eiava nega haida telefon be ia gaukara lasi; unai bamona noho dalana be lagani haida murinai ai manadalaia.” To, haroro gaukara amo moale ai davaria. Daudau lasi murinai, Ken be kongrigeisen hesiai tauna ta ai ia lao, bena lagani rua murinai elda maduna ia abia. Matamanai, Britanny ia hemarai bona ia gari unai English kongrigeisen maragina lalonai idia noho tadikaka taihu bona matamata taudia ia bamoa totona. To gabeai, ia ese Kingdom Hall haginia gaukaradia ia durua matamaia, unai neganai turana namodia momo ia davaria.

United States amo idia mai Texas taudia, Patrick bona ena adavana Roxanne idia kamonai, edia gabu kahirakahira ai be English gado idia herevalaia taudia momo idia noho, bona unai be gabu namona misinari gaukara idia karaia totona. Patrick ia gwau: “Mexico ena not ist kahanai ia noho taoni ta ladana, Monterrey ai vadivadi henia murinai, ai mamia Iehova be ai ia siaia unuseniai idia noho taudia ai durua totona.” Idia ese dina faiv lalonai edia ruma Texas dekenai idia hoihoilaia bona Mexico dekenai idia lao. (Kara 16:⁠9) Ena be Mexico ai mauri be ia auka to idia moale badina lagani rua murinai, Witnes taudia 17 sibona idia noho grup maragina be kongrigeisen ta ai ia lao​—⁠ena pablisa taudia be 40.

Jeff bona ena adavana Deb danu be edia noho dalana idia haidaua, edia haroro gaukara idia habadaia totona. Edia ruma badana United States dekenai idia hoihoilaia, bena Mexico ena ist kone kahanai ia noho siti ta ladana, Cancún ai ruma maragina ta idia abia. Guna, hebouhebou gabuna be edia ruma kahirakahira ia noho ruma badana ta mai ena air-condition dekenai idia karaia. To hari, idia be motuka amo hora 8 do idia heau, English gado ai idia karaia hebouhebou ta dekenai idia lao totona​—⁠unai hebouhebou be steidiam badana ta ai idia karaia. To idia moale badina Cancún dekenai kongrigeisen ta idia haginia, ena pablisa be 50 bamona.

Mexico tadikaka bona taihu haida be English gado ai haroro gaukara idia durua matamaia. Hegeregere, Rubén bona ena ruma bese idia kamonai San Miguel de Allende dekenai idia haginia English kongrigeisen ginigunana be Mexico ena teritori ibounai dekenai haroro gaukara idia karaia. Unai dainai, maoromaoro edia lalona idia hadaia unuseniai heduru idia henia totona. To gau badana be English gado idia dibaia guna, Mexico taudia edia mauri dalana, hereva o kara idia lalopararalaia namonamo guna, bona wiki ta ta ai kongrigeisen heboudia dekenai do idia lao, ena daudau be kilomita 800 bamona. Rubén ia gwau: “Ai moale badina idau tano amo idia mai taudia ai haroro henia​—⁠idia haida be lagani momo lalonai Mexico dekenai idia noho, bona unai be nega ginigunana English gado ai sivarai namona idia kamonai. Idia haida be mai moale bada ida ai idia tanikiu henia.” San Miguel de Allende ena kongrigeisen idia durua murinai, Rubén bona ena ruma bese be Mexico ena taoni ta ladana, Guanajuato dekenai, idia lao painia gaukara idia karaia totona. Unuseniai idia ese English kongrigeisen ta idia hamatamaia, ena pablisa taudia be 30 mai kahana. Hari, idia be Guanajuato kahirakahira ia noho taoni ta ladana, Irapuato dekenai English gado grup maragina ta ida hesiai gaukara idia karaia noho.

Haida Haroro Henia be Auka, to Unai Hekwakwanai Idia Hanaia

Mexico taudia momo danu be English gado idia diba. To, nega momo idia ida Basileia sivaraina herevalaia be auka, badina idia be taga taudia edia gabu ai idia noho bona nega momo edia hesiai hahinedia ese ruma ena iduara idia kehoa. Eiava, bema ruma taudia ese iduara idia kehoa, idia ura lasi kamonai badina idia laloa Iehova ena Witnes taudia be unai gabu ena orea gunana ta bona maragina ta sibona. To, idau tano amo idia mai Witnes taudia idia haroro neganai, haida idia kamonai.

Mexico ena siti ma ta ladana Querétaro ai, Gloria ena sivarai mani oi laloa. Ia gwau: “Guna, Spanish gado idia herevalaia Witnes taudia haida ese lau idia haroro henia, to lau ura lasi edia hereva lau kamonai. To, egu ruma bese bona turadia be hekwakwanai idia davaria matamaia neganai, lau lalohisihisi bada bona Dirava lau guriguri henia, lau noia lau do ia durua unai hekwakwanai hanamoa daladia lau diba totona. Daudau lasi murinai, English gado ia diba hahinena ta be egu ruma dekenai ia mai. Ia henanadai ‘Ruma ai ta be English gado ia diba, a?’ Ia be idau tano amo ia mai hahine dainai, lau ura iena hereva lau kamonai. Unai dainai, lau gwau lau be English gado lau diba. Ia haroro noho lalonai, egu lalonai lau gwau, ‘Inai kavakava America hahine be egu gabu dekenai dahaka ia karaia noho?’ To matamanai, lau be heduru totona Dirava dekenai lau guriguri. Unai dainai, reana unai hahine amo Dirava be egu guriguri ia haerelaia.” Gloria be Baibel stadi ia abia dae bona ia goada ela bona daudau lasi murinai ia bapatiso, ena be ena ruma bese taudia ese ia idia dagedage henia. Hari, Gloria be regula painia gaukara ia karaia, bona ena adavana bona natuna merona danu ese Iehova idia hesiai henia.

Hesiai Gaukara Idia Habadaia Taudia Idia Abia Hahenamodia

Ena be tadikaka be pablisa momo lasi gabudiai hahetoho momo idia davaria, to idia ese hahenamo momo idia davaria. Ralph (matamanai ita herevalaia tauna) ia gwau: “Ai ese Britain taudia, China taudia, Jamaica taudia, Sweden taudia, bona Ghana taudia momo ai stadi henidia. Unai Baibel stiuden taudia haida be nega ibounai haroro gaukara idia karaia. Idia hanaia laganidia lalonai English kongrigeisen 7 idia hamatamaia be ai itaia. Emai natudia memero ruaosi be ai ida painia gaukara idia karaia matamaia, bona hari, idia be United States ena Betele dekenai idia gaukara noho.”

Hari, Mexico dekenai, English kongrigeisen ibounai be 88 bona grup ma haida idia noho danu. Dahaka dainai kongrigeisen ena namba ia bada daekau haraga? Mexico dekenai, English gado idia herevalaia taudia momo be guna Witnes taudia ese idia do haroro henia lasi. Haida be guna edia tano korikori dekenai edia turadia o ruma bese ese idia koudia dainai sivarai namona idia kamonai be auka, to hari ta be edia kamonai karana ia koua diba lasi. Ma haida be moni gaukara amo idia ritaea vadaeni dainai, idia be mai edia nega Baibel idia stadilaia totona. Danu, English kongrigeisen taudia 33 pesen be painia gaukara idia karaia, unai ese kongrigeisen ia durua ia gaukara goada bona tubu totona.

Hahenamo Momo Do Oi Davaria

Ita diba, taunimanima momo herea be edia gado ai Basileia ena sivarai namona do idia kamonai bona abia dae. Unai dainai, ita moale badina lo tadikaka taihu momo​​—⁠matamata taudia, buruka taudia, headava lasi taudia, bona headava taudia​​—⁠idia ura pablisa momo lasi gabudia dekenai idia lao bona idia haroro. Momokani, reana metau momo do idia davaria, to idia moale badina kudou-maoro taudia idia durua hereva momokanidia idia abia dae totona. Oi ura emu noho dalana oi haidaua, unai amo oi hegeregere diba emu tano ai o pablisa momo lasi gabudia dekenai oi haroro totona, a?a (Luka 14:​28-​30; 1 Kor. 16:⁠9) Bema unai bamona oi karaia, hahenamo momo do oi davaria.

[Footnote]

[Box on page 21]

Ritaea Taudia Haida Edia Moale Karana ese ta Ena Lalona Ia Veria

Beryl be Britain ia rakatania bona ia lao Canada dekenai ia noho. Unuseniai, ia be kampani badadia haida ai bosi gaukara ia karaia. Danu, ia be hosi edia gadara helulu ta (equestrian) ia diba momo dainai, Canada oreana ida lagani 1980 ena Olympic gadara lalonai idia vareai. Beryl be gaukara amo ia ritaea bona Mexico ena hanua ta ladana Chapala dekenai ia noho. Nega momo ia bona ena adavana be hotel dekenai idia lao aniani totona. Unuseniai, idia moale ritaea taudia haida ia itaia, idia be English gado ai idia hereva dainai, idia dekenai ia lao bona ia hedavari henia. Bena ia henanadai, Mexico dekenai dahaka idia karaia. Idia be Iehova ena Witnes taudia bona nega momo idia moale. Beryl bona ena adavana idia gwau, ‘bema ta be Dirava dibaia karana amo moale o mauri korikori ia davaria, vadaeni ita danu ese Dirava ita diba be namo.’ Beryl be hua haida lalonai kongrigeisen heboudia dekenai ia lao murinai, Baibel stadi ia abia dae. Lagani haida lalodiai Beryl be regula painia gaukara ia karaia.

[Box on page 22]

“Ai Danu Idia Noho be Hahenamo Ta”

Pablisa momo lasi gabudia dekenai idia lao taudia edia heduru dainai, unai gabu ai idia noho tadikaka taihu idia moale. Caribbean ena brens opesi ta ia gwau: “Bema iniseniai hesiai gaukara idia karaia idau tano taudia handred momo be edia tano dekenai idia giroa, kongrigeisen ena gaukara dalana do ia dika. Ai danu idia noho be hahenamo ta.”

Baibel ia gwau, “[hahine] momo ese, [sivarai namona] idia gwauraia hedinarai.” (Sal. 68:11; NW ) Unai dainai, ita itaia idia do headava lasi taihu momo be idau tano ai hesiai gaukara idia karaia noho. Idia be sibodia edia ura idia dadaraia bona ma haida idia durua bada. Eastern Europe ena brens opesi ta ia gwau: “Aiemai kongrigeisen momo dekenai, taihu be momo herea, nega haida 70 pesen bamona. Idia momo be hereva momokani lalonai idia noho daudau lasi, to tano ma haida amo idia mai haneulato painia taihudia ese idia hadibaia karana amo heduru bada idia abia. Idau tano amo idia mai taihudia be harihari gaudia ai dekenai!”

Unai taihu ese edia hesiai gaukara be edena bamona idia laloa? Angelica ena mauri lagani be 30 mai kahana, ia headava lasi, bona lagani haida lalonai idau tanodia ai painia gaukara ia karaia. Ia gwau: “Hekwarahi gaudia be momo. Tano ta dekenai dina ta ta ai lau be kopukopu gabudia dekenai lau raka lao raka mai, bona idia hisihisi taudia momo lau itaia neganai, unai be dika rohoroho. To lau moale badina haroro gaukara dekenai taunimanima lau durua diba. Unuseniai idia noho taihu ese nega momo lau idia tanikiu henia badina lau mai idia lau durua dainai, unai ese lau ia hamoalea bada danu. Taihu ta ia gwau, iena tano ai painia gaukara lau karaia dainai, unai ese ia hagoadaia ful-taim hesiai gaukara ia karaia totona.”

Painia taihu ta ladana Sue, ena mauri lagani be 50 mai kahana, ia gwau: “Hahetoho momo do oi davaria, to oi abia hahenamodia ese unai ibounai ia hanaia. Haroro gaukara be moale bada ia havaraia gaukarana! Nega momo taihu matamatadia ida lau gaukara hebou neganai, Baibel, buka bona magasin lalonai lau dibaia gaudia lau kikilaia, hegeregere idia lau hadibaia edena dala ai hekwakwanai idia hanaia totona. Nega momo lau dekenai idia gwau, ‘Ena be oi headava lasi, to lagani momo painia gaukara oi karaia bona hekwakwanai momo oi hanaia dalana ai itaia neganai, ai diba ai danu be hekwakwanai idauidau ai hanaia diba.’ Unai bamona taihu lau durudia dainai lau moale bada.”

[Map on page 20]

(For fully formatted text, see publication)

MEXICO

Monterrey

Guanajuato

Irapuato

Ajijic

Chapala

Lake Chapala

San Miguel de Allende

Querétaro

MEXICO CITY

Cancún

[Picture on page 23]

Haida idia moale badina idau tano taudia idia haroro henia, idia be nega ginigunana English gado ai sivarai namona idia kamonai