Iehova Ena Kara Namodia Oi Laloa Bada
“Dirava umui tohotohoa, badina umui be iena lalokau natudia.”—EFE. 5:1.
1. (a) Iehova oi laloa neganai, edena kara namodia oi laloa? (b) Edena dala ai Dirava ena kara ita stadilaia neganai, namo ita davaria diba?
IEHOVA oi laloa neganai, edena kara namodia oi laloa? Ita momo be iena kara badadia hegeregere lalokau, hahemaoro goeva, aonega bona siahu ita laloa. To, ita diba Iehova be mai ena kara namodia momo. Idia hanaia laganidia lalonai, iseda buka bona magasin momo ese Iehova ena kara namodia 40 mai kahana idia herevalaia. Bema sibona emu stadi ai o famili ida Iehova ena kara umui stadilaia hebou, Iehova ena kara namodia momo do umui dibaia. Edena dala ai unai bamona stadi amo namo do ita davaria? Unai ese ita do ia durua eda guba Tamana ita lalokau henia, mai eda ura bada ida Ia kahirakahira ita lao bona ia ita tohotohoa.—Ios. 23:8; Sal. 73:28.
2. (a) Iehova ena kara namodia ita laloa bada karana ena haheitalai ta mani oi gwauraia? (b) Inai stadi bona stadi gabedia rua ai, dahaka do ita herevalaia?
2 Edena dala ai oi hahedinaraia oi be gau ta oi laloa bada? Mani aniani matamatana ta ita tohoa ena haheitalai ita laloa: Reana ita bonaia, sisina ita ania toho, bona ena mamina be namo herea dainai gabeai ita sibona ese unai aniani ita nadua. Unai hegeregerena, Dirava ena kara namona ta ita laloa bada totona, unai kara ita dibaia guna, Iehova ese unai kara ia hahedinaraia dalana ita laloa dobu, bena gabeai ita sibona ese unai kara ita hahedinaraia. (Efe. 5:1) Inai stadi bona stadi gabedia rua ai, Iehova ena kara namodia ma haida do ita herevalaia, bona inai henanadai do ita haerelaidia: (1) Unai kara ena anina be dahaka? (2) Edena dala ai Iehova be unai kara ia hahedinaraia? (3) Edena dala ai Iehova ita tohotohoa diba?
IEHOVA ITA HEREVA HENIA DIBA
3, 4. (a) Edena dala ai ita diba tau ta ita hereva henia diba? (b) Edena dala ai Iehova ese ia hahedinaraia ia kahirakahira ita lao diba?
3 Ta ita hereva henia be auka lasi ena anina mani ita herevalaia. Edena dala ai ita diba tau ta ita hereva henia diba? Bema ia be kara namo ia hahedinaraia, nega ia henia ma haida ia durua, bona ia auka lasi ia ita hereva henia totona. Unai bamona tauna be ena hereva, kara namodia bona kiri toana amo do ita dibaia.
4 Edena dala ai Iehova ia hahedinaraia ia ita hereva henia diba? Ena be Iehova be iunives ia Havaraia Tauna, to ita ia hadibaia ia be mai ena ura ida iseda guriguri ia kamonai bona haerelaia diba. (Salamo 145:18; Isaia 30:18, 19 duahia.) Iehova be nega bona gabu idauidau ai ita hereva henia diba, badina ita diba do ia kamonai. (Sal. 65:2; Iam. 1:5) Baibel ese Iehova ia herevalaia dalana amo ita laloparara, Iehova ia ura guriguri amo ia ita hereva henia. Hegeregere, Davida ia gwau, Iehova be ita “ia itaia noho” bona iena “imana idibana” amo ita ia durua. (Sal. 33:18; 63:8) Peroveta tauna Isaia ese Iehova be mamoe naria tauna ida ia hahegeregerea, ia gwau: “Ia ese mamoe edia natudia do ia haboua, bona iena imana dekenai idia do ia rosia.” (Isa. 40:11) Mani oi piksaia, Iehova ia ura ia kahirakahira ita noho, mamoe naria tauna ese mamoe be ena kemena dekenai ia rosia bamona. Oibe, iseda Tamana ita hereva henia be auka lasi. Edena dala ai Ia ita tohotohoa diba?
MAI ANINA BADA KARANA TA
5. Elda taudia be dahaka idia karaia be namo? Bona dahaka dainai unai be mai anina bada?
5 Vanegai, tano idauidau ai tadikaka taihu haida idia nanadaia, “Elda taudia dekenai edena kara oi ura henia?” Momo idia gwau, idia ura do idia mamia idia ese elda taudia idia hereva henidia diba. Momokani, Keristani taudia ibounai dekenai unai kara be mai anina bada. To, elda taudia ese unai kara idia hahedinaraia be gau badana. (Isa. 32:1, 2) Dahaka dainai? Taihu ta ia gwau, “Bema elda taudia ese unai kara idia hahedinaraia, unai ese dala do ia kehoa idia edia kara namodia ma haida ita dibaia totona.” Unai hereva be momokani. To dahaka oi karaia diba, unai amo ma haida do idia mamia oi idia hereva henia diba?
6. Dahaka oi karaia diba unai amo ia auka lasi haida ese oi idia hereva henia totona?
6 Unai kara ita hahedinaraia totona, dala ta be ma haida do ita laloa bada. Bema elda ta be haida ia laloa bada bona mai ena ura ida ena nega bona goada ia henia idia ia durua totona, tadikaka taihu bona matamata taudia ese iena kara namona do idia itaia. (Mar. 10:13-16) Ena mauri lagani 12 merona ladana Carlos ia gwau: “Lau moale badina lau itaia Kingdom Hall ai, elda taudia be idia kiri bona ma haida idia durua.” Namo lasi elda tauna be ia hereva sibona, to gau badana be iena kara amo ia hahedinaraia ia ura ma haida ia durua bona ia kamonai henidia. (1 Ioa. 3:18) Edena dala ai unai ia karaia diba?
7. Edena dala ai lapel kadi ese herevahereva dalana ia kehoa, bona unai amo dahaka ita dibaia?
7 Mani inai sivarai oi laloa. Vanegai, tadikaka ta be hebouhebou murinai peleini amo ena gabu dekenai ia giroa lou neganai, ena lapel kadi ia karaia. Peleini ai ia gaukara tauna ta ese tadikaka ena lapel kadi ai inai hereva ia itaia: ‘Dirava Ena Basileia Do Ia Mai!’ Bena ia gwau: “Oibe, do ia mai be namo—namona be gabeai unai ita herevalaia.” Gabeai, idia herevahereva murinai unai tauna be mai moale ida iseda magasin haida ia abia. Reana ita momo dekenai unai bamona ia vara vadaeni. To, edena dala ai lapel kadi ese herevahereva dalana ia kehoa? Lapel kadi ese taunimanima dekenai ia hahedinaraia ita be edeseni ita lao, bona ita ura mai moale ida eda abidadama be ma haida dekenai ita harorolaia. Unai hegeregerena, namona be elda ese tadikaka taihu dekenai idia hahedinaraia, idia moale idia ida idia herevahereva totona. Edena dala ai unai idia karaia diba?
8. Edena dala ai elda taudia idia hahedinaraia idia be ma haida idia laloa bada? Edia kara dainai kongrigeisen taudia haida be dahaka idia gwau?
8 Momokani, tano ta ta edia kastom be idauidau, to eda tadikaka taihu ita kiri henia, edia imana ita udeudea o ita hanamoa neganai, ita hahedinaraia idia ita laloa bada. Daika ese unai ia karaia guna be namo? Iesu ena haheitalai mani ita laloa. Mataio bukana ia gwau, Iesu be ena aposetolo taudia ida ia hebou neganai, “idia dekenai ia lao, bona ia hereva henidia.” (Mat. 28:18) Hari, elda taudia danu be unai bamona idia karaia, edia tadikaka dekenai idia lao bona idia hereva henia. Unai idia karaia dainai, kongrigeisen taudia edia hemami be edena bamona? Painia taihu ta, ena mauri lagani be 88 ia gwau: “Lau moale badina Kingdom Hall dekenai lau vareai neganai, elda taudia ese lau idia kiri henia bona lau idia hagoadaia.” Taihu ma ta ia gwau: “Hebou dekenai, elda tauna ta ese mai moale ida lau ia welkam henia neganai, unai ese lau ia hagoadaia bada.”
NEGA OI ATOA TADIKAKA TAIHU OI HEREVA HENIDIA TOTONA
9, 10. (a) Edena dala ai Iehova be haheitalai namona? (b) Edena dala ai elda taudia ese Iehova idia tohotohoa diba?
9 Namona be nega ita atoa tadikaka taihu ita hereva henidia, unai amo do ia auka lasi ita idia hereva henia totona. Iehova be haheitalai namona. Baibel ia gwau: “Ia be ita ta ta amo ia noho daudau lasi.” (Kara 17:27) Elda taudia ese Iehova idia tohotohoa dalana ta be, hebou murinai bona vairanai nega idia atoa tadikaka taihu matamatadia bona burukadia ida idia herevahereva totona. Painia tadikaka ta ia gwau: “Bema elda ta be lau ia nanadaia egu painia gaukara be edena bamona, bona egu hereva ia kamonai namonamo neganai, lau mamia ia be lau ia laloa bada.” Kahirakahira lagani 50 lalodiai Iehova ia hesiai henia taihu ta, ia gwau: “Elda taudia be nega idia atoa lau idia hereva henia neganai, lau mamia idia be lau idia laloa bada.”
10 Momokani, elda taudia be maduna momo idia huaia. To, hebou lalonai namona be nega idia atoa tadikaka taihu idia hereva henia totona.
IEHOVA BE TAUNIMANIMA EDIA TOANA IA LALOA LASI
11, 12. (a) Taunimanima edia toana laloa lasi karana ena anina be dahaka? (b) Edena Baibel sivarai ese ia hahedinaraia, Iehova be maka tamona ai taunimanima ibounai ia kara henidia?
11 Iehova ena kara namona ma ta be, ia ese taunimanima edia toana ia laloa lasi. (Kara 10:34) Unai ena anina be dahaka? Anina be ia ese maka tamona ai taunimanima ibounai ia kara henia. Taunimanima edia toana laloa lasi karana be dala badadia rua ai ita hahedinaraia: Iseda lalohadai bona kara. Dahaka dainai unai kara rua be mai anina bada? Badina bema ta be ma haida ia laloa bada, vadaeni iena kara amo unai do ia hahedinaraia danu. Unai kara ia hahedinaraia tauna be taunimanima ibounai ia kara namo henia. Ia be taunimanima edia hairai o edia taga ia laloa lasi, to ia ese maka tamona ai idia ibounai ia kara henidia.
12 Iehova be haheitalai hereadaena, badina ia ese taunimanima ibounai be maka tamona ai ia kara henidia. Baibel ia gwau, Dirava be “taunimanima edia toana ia laloa lasi” bona Iena vairanai “taunimanima ibounai be hegeregere.” (Kara 10:34, 35; Deuteronomi 10:17 duahia.) Mose ena nega ai ia vara gauna ta ese unai ia hamomokania.
Selopehada ena natuna kekeni be Iehova ese idia dekenai ahuna ia henia karana idia laloa bada (Paragraf 13, 14 itaia)
13, 14. (a) Selopehada ena natuna kekeni faiv be dahaka hekwakwanai idia davaria? (b) Edena dala ai Iehova ese ia hahedinaraia ia be taunimanima ibounai ia laloa bada?
13 Israela taudia be Gwauhamata Tanona ai idia do vareai lasi neganai, singul kekeni faiv be hekwakwanai ta idia davaria. Unai be dahaka? Idia diba Israela ruma bese ibounai bamona, idia danu ese edia tamana ena tano kahana do idia abia. (Num. 26:52-55) To, edia tamana Selopehada, Manase ena iduhu tauna, be ia mase vadaeni. Israela taudia edia kastom ai, tamana ia mase neganai, natuna merona ese tano do ia abia, to Selopehada ena natudia be kekeni sibona. (Num. 26:33) Vadaeni, Selopehada ena tano be ena varavara dekenai do idia henia, a? Selopehada ena natuna kekeni be dahaka do idia karaia?
14 Unai kekeni faiv be Mose dekenai idia lao bona idia gwau: “Badina be dahaka aiemai tamana ena ladana be iena iduhu dekena amo do idia kokia, ia be natuna tau lasi dainai?” Ma idia gwau: “Aiemai tamana ena [“tadikaka,” NW] edia huanai, be tano haida ai dekenai do umui henia.” Mose ia gwau lasi, ‘Taravatu ena hereva dainai, umui do lau durua lasi.’ To, ia ese “edia noinoi Lohiabada dekenai ia hamaoroa.” (Num. 27:2-5) Iehova ena haere be dahaka? Ia ese Mose ia hamaoroa: “Selopehada ena natuna hahine edia hereva be maoro, edia tamana ena [“tadikaka,” NW] edia huanai, tano haida do oi henia, edia tamana ena tano kahana be idia ese do idia abia.” Bena Iehova ese taravatu matamata ia karaia. Mose ia hamaoroa: “Inai danu, Israela taudia do oi hamaoroa, bema tau ta ia mase, mai ena natuna tau lasi, iena natuna hahine ese iena tano o kohu do ia abia.” (Num. 27:6-8; Ios. 17:1-6) Unai nega amo, unai taravatu ese unai bamona hekwakwanai idia davaria Israela hahine ia gimadia.
15. (a) Ta ese ia durudia lasi taudia be edena dala ai Iehova ese ia kara henidia? (b) Edena Baibel sivarai ma haida ese idia hahedinaraia, Iehova be taunimanima edia toana ia laloa lasi?
15 Momokani, unai sivarai ese ia hahedinaraia Iehova be ia hebogahisi bona taunimanima edia toana ia laloa lasi! Ta ese unai kekeni faiv ia durua lasi, to Iehova be mai hemataurai ida edia noinoi ia abia dae, bona ia kara henidia Israela taudia ibounai ia kara henia hegeregerena. (Sal. 68:5) Baibel ai unai bamona sivarai momo ese idia hahedinaraia, Iehova ese ena hesiai taudia iboudiai be maka tamona ai ia kara henidia.—1 Sam. 16:1-13; Kara 10:30-35, 44-48.
IEHOVA ITA TOHOTOHOA DIBA
16. Edena dala ai Iehova bamona, ita ese taunimanima ibounai be maka tamona ai ita kara henia diba?
16 Edena dala ai Iehova ita tohotohoa diba? Laloatao, taunimanima edia toana ita laloa bada lasi karana be dala rua ai ita hahedinaraia diba. Bema taunimanima edia toana ita laloa bada lasi, idia ibounai be maka tamona ai do ita kara henia. Reana oi laloa, oi be taunimanima edia toana oi laloa bada lasi. To nega haida, emu lalohadai ma haida dekenai be idau. Vadaeni, edena bamona do ita diba bema ita be taunimanima idauidau ita ura henia eiava lasi? Iesu ia ura diba taunimanima ese ia be edena bamona idia laloa neganai, ena tura namodia ia nanadaia: “Taunimanima idia gwau taunimanima ena Natuna be daika?” (Mat. 16:13, 14) Iesu ena haheitalai oi tohotohoa diba. Reana emu turana namona ta oi nanadaia diba, ‘Oi laloa lau ese taunimanima ibounai be maka tamona ai lau kara henia, a? Haida idia gwau lau be taunimanima edia toana lau laloa bada, a?’ Bema emu turana ia gwau, ia itaia oi ese hanua tamona taudia sibona oi kara namo henidia, eiava taga o sikuli bada taudia sibona oi ura henidia, dahaka do oi karaia? Namona be Iehova dekenai unai oi gurigurilaia, bona oi noia oi do ia durua emu lalohadai bona kara oi haidaua totona. Unai amo Iehova hegeregerena, oi ese taunimanima ibounai be maka tamona ai do oi kara henidia.—Mat. 7:7; Kol. 3:10, 11.
17. Edena dala idauidau ai ita hahedinaraia diba, ita be taunimanima edia toana ita laloa bada lasi?
17 Kongrigeisen ai mai hemataurai bona hebogahisi ida tadikaka taihu ibounai ita kara henia be namo, unai amo ita hahedinaraia ita be Iehova ita tohotohoa. Hegeregere, heabidae karana ita hahedinaraia neganai, namona be tadikaka taihu ibounai—ogogami taudia, ihareha bona vabu bona dogae taudia danu—ita boiridia. (Galatia 2:10; Iamesi 1:27 duahia.) Haroro gaukara lalonai ita ese taunimanima idauidau, idau tano amo idia mai taudia danu, ita hereva henia. Ita moale, badina Iehova ena orea ese Baibel idia herevalaia bukadia be gado 600 mai kahana ai idia hahanaia. Unai ese ia hamomokania, ita be taunimanima edia toana ita laloa bada lasi!
18. Edena dala ai oi hahedinaraia oi be Iehova ena kara namodia oi laloa bada?
18 Iehova ita hereva henia be auka lasi, bona ia be taunimanima edia toana ia laloa bada lasi karadia ita laloa neganai, eda lalokau Ia dekenai ia bada. Unai amo do ita ura Iehova ita tohotohoa, bona iena kara namodia be iseda tadikaka taihu bona ita haroro henia taudia dekenai do ita hahedinaraia.
“Lohiabada be ia dekenai idia boiboi taudia dekenai ia noho.”—Sal. 145:18 (Paragraf 9 itaia)
“Lohiabada emui Dirava . . . vairana dekenai taunimanima ibounai be hegeregere.”—Deu. 10:17 (Paragraf 17 itaia)