Iehova ese Taunimanima Edia Toana Ia Laloa Lasi Karana Tohotohoa
1 Iehova ese taunimanima ia laloa bada. Edia toana ia laloa lasi to iena ura ia karaia tauna ia abia dae. (Kara 10:34, 35) Iesu ese taunimanima ia haroro henia neganai, ia danu ese taunimanima edia toana ia laloa lasi. (Luka 20:21) Namona be edia haheitalai ita tohotohoa, Paulo hegeregerena, ia gwau: “Badina Dirava be taunimanima ibounai edia Lohiabada, bona ia dekenai idia noinoi taudia dekenai iena hanamoa ia henia.”—Roma 10:12.
2 Ita davaria taudia ibounai dekenai Dirava ena Basileia sivarai namona ita harorolaia karana amo Dirava ita hanamoa. Herevana idia be bese, dagi, bona edukeisen idauidau, eiava moni bona ladana bada eiava maragi taudia, to idia dekenai sivarai namona ita harorolaia be gau badana. (Roma 10:11-13) Unai ena anina be idia kamonai taudia ibounai—tatau, hahine, matamata, bona buruka taudia—dekenai ita haroro. Namona be ruma ibounai dekenai ita lao unai amo dala ita kehoa ruma taudia ta ta ese hereva momokani idia kamonai totona.
3 Taunimanima Ibounai Laloa: Iseda tahua gauna be taunimanima ibounai ita hereva henia. Unai idia laloa dainai, pablisa haida be doketa edia opesi dekenai, hospital, bona gavamani edia opesi idauidau dekenai taunimanima idia haroro henidia dainai, anina namona idia abia. Ma danu, pablisa haida ese bisinesi taudia, sikuli edia gunalaia bona sisiba henia taudia, diadi taudia bona idia noho gabu ena orea idauidau gunalaia taudia idia haroro henia. Unai bamona taudia oi davaria neganai, oiemu tanikiu karana idia dekenai oi hahedinaraia, ita noho gabuna dekenai idia henia heduru karadia dainai. Namona be hemataurai oi hahedinaraia, bona edia gaukara eiava unai gaukara ai idia davaria hekwakwanai idia herevalaia magasin oi abia hidi.
4 Nega ta ai, taihu ta ese diadi ta be ena opesi lalonai ia hereva henia. Idia herevahereva namonamo murinai, ia gwau: “Oi diba dahaka lau ura henia Iehova ena Witness taudia dekenai, a? Edia kara be hadibaia hereva namodia latanai idia haginia, bona hanaihanai idia badinaia.” Unai siahu bada tauna dekenai haroro namona ia henia.
5 Taunimanima edia kudouna ita diba lasi. To, ita davaria taudia ibounai dekenai ita haroro karana amo, ita hahedinaraia Iehova ese iseda gaukara ia hakaua karana ita abidadama henia. Ma danu, unai ese taunimanima dekenai dala ia kehoa helaro ia henia sivaraina idia kamonai henia totona. (1 Tim. 2:3, 4) Namona be iseda nega ita gaukaralaia namonamo bona Iehova ese taunimanima edia toana ia laloa lasi karana ita tohotohoa, bena taunimanima ibounai dekenai sivarai namona ita harorolaia.—Roma 2:11; Ef. 5:1, 2.