BAIBEL HENANADAI EDIA HAERE
Dahaka dainai Iesu ena mase ita laloatao be namo?
Iesu Ena Mase Ese Dahaka Hahenamo Do Ia Havaraia?—Isaia 25:8; 33:24
Tanobada ibounai lalonai Iesu ena mase be mai anina bada—ia mase ita ese mauri ita abia totona. Dirava ia ura lasi taunimanima idia kara dika, gorere bona mase. (Genese 1:31) To Adamu dainai, kara dika be tanobada ai ia vareai. Unai dainai Iesu ese ena mauri ia henia, ita be kara dika bona mase amo ita ia hamauria totona.—Mataio 20:28; Roma 6:23 duahia.
Dirava ena lalokau karana be inai: Iena Natuna be tanobada dekenai ia siaia, bona ita totona ia mase. (1 Ioane 4:9, 10) Iesu ese ena hahediba taudia ia hamaoroa iena mase laloatao hebouna idia karaia be namo—unai negadiai paraoa bona wain idia gaukaralaia. Lagani ta ta ai, unai bamona hebou ita karaia neganai, ita be Dirava bona Iesu edia lalokau karana ita laloa bada.—Luka 22:19, 20 duahia.
Daidia ese paraoa idia ania bona wain idia inua be maoro?
Nega ginigunana Iesu ese aposetolo taudia dekenai unai hereva ia gwauraia neganai, ia be idia dekenai kontraka o gwauhamata ta ia herevalaia. (Mataio 26:26-28) Unai ese ia hahedinaraia, aposetolo taudia bona ma haida be guba ai Iesu ida king bona hahelaga gaukara do idia karaia. Ena be Iesu ena mase idia laloatao hebouna dekenai taunimanima milioni idia hebou, to Iesu ida kontraka idia karaia taudia sibona ese paraoa idia ania bona wain idia inua be maoro.—Apokalupo 5:10 duahia.
Lagani 2,000 bamona lalodiai, Iehova ese unai king taudia ia do abia hidi noho. (Luka 12:32) Unai bamona taudia be momo lasi, to tanobada ai mauri hanaihanai do idia abia taudia be hutuma bada.—Apokalupo 7:4, 9, 17 duahia.