Oi Hekwarahi Noho Iehova Ena Hanamoa Oi Abia Totona

1, 2. Iehova ena hesiai taudia be dahaka idia haheaukalaia be namo?

ABIDADAMA tauna ginigunana, Abela, ena nega amo ema bona hari, Iehova idia tomadiho henia taudia be edia abidadama dainai idia haheauka. Aposetolo Paulo ese Heberu Keristani taudia ia tore henia, ia gwau, idia be “hahetoho bada [idia] haheaukalaia,” Iehova ena lalonamo bona hanamoa idia abia totona. (Heb. 10:32-34) Paulo ese Keristani taudia edia haheauka karana be Grik taudia edia spot gadara ida ia hahegeregerea, hegeregere heau helulu, heatu helulu, bona boksini. (Heb. 12:1, 4) Hari, ita be mauri ena heau helulu lalonai ita noho, bona idia heau taudia haida be idia ura ita idia hakaua kerere, idia tarapua, bona ita idia halusia, unai amo iseda moale bona vaira nega ena hahenamo ita haboioa diba.

² Laloatao, ita be Satani bona ena tanobada dikana ida ita heatu noho. (Efe. 6:12) Unai dainai gau badana be ita hekwarahi, tanobada ena “goada momokani gaudia” ita dadaraia totona. Unai be ena hahediba hereva koikoidia bona kara dikadia, hegeregere matabodaga karadia, kuku bona drag ania karana, bona inuinu kekero karana. Danu, namona be hanaihanai iseda goevadae lasi tauanina ena ura bona lalomanoka ita dadaraia.​—2 Kor. 10:3-6; Kol. 3:5-9.

3. Iseda heatu lalonai, Iehova be edena dala ai ita ia durua?

³ Satani bona ena tanobada dikana ita halusia diba, a? Oibe, to ita kwalimu totona, ita hekwarahi be namo. Paulo ese ia sibona be boksini tauna ida ia hahegeregerea, ia gwau: “Lau be hodahoda ia paisia kava tauna bamona, lau paisi lasi.” (1 Kor. 9:26) Boksini tauna ese ia heatu henia tauna ena imana ia koua hegeregerena, ita ese iseda inai taudia ita koua be namo. Iseda heatu lalonai Iehova ese ita ia hadibaia bona durua. Iena Hereva lalonai ia ese ita ia hamauria diba hadibaia herevadia ia henia. Danu, iseda Baibel bukadia, Keristani heboudia, hebouhebou badadia bona maragidia amo ita ia durua. Oi dibaia gaudia oi badinaia noho, a? Bema unai oi karaia lasi, oi be “hodahoda ia paisia kava tauna bamona,” emu inai tauna oi paisia lasi.

4. Dika ita halusia totona, dahaka ita karaia be namo?

⁴ Namona be nega ibounai ita noho hegaegae, badina bema ita hegaegae lasi, iseda inai taudia ese ita idia paisia diba bona ita moru neganai, ita idia kikia diba. Baibel ia gwau: “Namo lasi dika ese oi ia halusia, to namona be kara namo amo dika oi halusia noho.” (Roma 12:21) Inai hagoadaia herevana, “namo lasi dika ese oi ia halusia,” ese ia hahedinaraia ita be dika ita halusia diba. Unai ita karaia diba bema dika ita heatu henia o dadaraia noho. To bema ita gima lasi bona iseda heatu ita hadokoa, Satani, iena tanobada dikana, bona iseda goevadae lasi tauanina ena ura ia kwalimu diba. Namo lasi Satani ese oi ia hagaria dainai, emu imana oi atoa diho o oi hesiku bona ia kwalimu!​—1 Pet. 5:9.

5. (a) Dirava ena hanamoa ita abia totona, dahaka ese ita ia durua diba? (b) Baibel lalonai daidia edia sivarai idia noho?

⁵ Ita kwalimu totona, namona be ita hekwarahi noho ena badina ita laloatao. Oibe, bema ita ura Dirava ena lalonamo bona hanamoa ita abia, namona be Heberu 11:6 ai ia noho hereva ita laloatao, ia gwau: “Dirava kahirakahira ia lao tauna ia abia dae be namo Dirava be ia noho bona Dirava ese mai momokani ida ia idia tahua taudia edia davana do ia henia.” Inai Grik herevana idia hahanaia “tahua,” ena anina be oi hekwarahi bada gau ta oi abia totona. (Kara 15:17) Baibel lalonai, abidadama tatau bona hahine edia sivarai idia noho, idia be idia hekwarahi bada Iehova ena hanamoa idia abia totona. Iakobo, Rahela, Iosepa, bona Paulo ese idia davaria hekwakwanai ese edia lalona bona tauanina ia hamanokaia, to idia haheauka dainai, hahenamo idia davaria. Edena dala ai edia haheitalai ita tohotohoa diba?

IDIA HAHEAUKA DAINAI HAHENAMO IDIA ABIA

6. Dahaka ese Iakobo ia durua ia haheauka totona, bona dahaka hahenamo ia abia? (Laulau ginigunana herevalaia.)

⁶ Iakobo be ia hekwarahi bada bona ia haheauka, badina Iehova ia lalokau henia, iena hetura karana Dirava ida ia laloa bada, bona ia abia dae momokani Iehova ese ena gwauhamata hegeregerena ena bese taudia do ia hanamoa. (Gen. 28:3, 4) Unai dainai, Iakobo ena mauri lagani be 100 neganai, ia hekwarahi bada Dirava ena hanamoa ia abia totona. Taunimanima ai ia lao aneruna ida ia rosia helulu danu. (Genese 32:24-28 duahia.) Iakobo be sibona ena goada amo unai aneru goadana ida ia rosia helulu, a? Lasi! To, Iakobo ese ena lalona ia hadaia unai rosia helulu ai do ia kwalimu, bona unai ia vara! Oibe, iena haheauka karana dainai Dirava ese ia hanamoa. Bona iena ladana ia hatoa Israela, (anina be “Dirava ida Ia Heatu Tauna” eiava “Dirava Ia Heatu”). Iakobo ese Iehova ena lalonamo bona hanamoa ia abia, bona ita danu be unai ita ura.

7. (a) Rahela be dahaka hekwakwanai ia davaria? (b) Dahaka ese Rahela ia durua bena gabeai hahenamo ia abia?

⁷ Iakobo ena lalokau adavana, Rahela, danu ia ura dikadika Iehova ena gwauhamata iena adavana dekenai do ia guguru dalana ia itaia. To, koua gauna ta ia noho. Oibe, ia be natudia lasi. Iena nega ai, bema hahine ta be natudia lasi, unai be hemarai gauna. Edena dala ai Rahela be goada ia abia, unai amo iena lalona idia hamanokaia gaudia ia haheaukalaia diba? Ia be ia hesiku lasi, to hanaihanai ia guriguri goadagoada. Iehova ese Rahela ena guriguri herevadia ia kamonai bona ia hanamoa, gabeai Rahela be natudia ia havaraia. Unai dainai Rahela be mai moale ida ia gwau: “Lauegu kakana danu ai goada helulu, lau kwalimu vadaeni!”​—Gen. 30:8, 20-24.

8. Iosepa be dahaka hekwakwanai ia davaria, bona edena dala ai ia be haheitalai namona?

⁸ Iakobo bona Rahela edia gini goada karana ese edia natuna Iosepa ia durua bada, unai dainai hahetoho badadia ia haheaukalaia diba. Iosepa ena mauri lagani be 17 neganai, ia dekenai idia vara gaudia ese iena mauri idia haidaua momokani. Iena tadikaka idia mama dainai, igui hesiai tauna bamona ia idia hoihoilaia. Gabeai, ia idia samania koikoi dainai, Aigupito ena dibura ruma ai lagani momo ia noho. (Gen. 37:23-28; 39:7-9, 20-21) To Iosepa be ia lalomanoka lasi, iena tadikaka ia badu henidia lasi, bona edia dika davana ia haloua lasi. Iena lalona bona kudouna ai iena hetura karana Iehova ida ia laloa bada. (Lev. 19:18; Roma 12:17-21) Namona be Iosepa ena haheitalai ese ita ia durua. Hegeregere, ena be ita maragi negana ai iseda mauri be ia auka eiava hari iseda noho dalana be ia namo lasi, to namona be ita hekwarahi bona haheauka noho. Bema unai ita karaia, ita diba momokani Iehova ese ita do ia hanamoa.​—Genese 39:21-23 duahia.

9. Iakobo, Rahela, bona Iosepa hegeregerena, dahaka ita karaia diba Iehova ena hanamoa ita abia totona?

⁹ Hari oi davaria noho hekwakwanai ta mani oi laloa. Reana oi dekenai ia vara kara gagevana ta, bese ma ta inai henia karana, o ma haida ese oi idia hevasehalaia. Eiava ma ta be oi ia mama henia dainai, oi ia samania koikoi. Unai bamona negadiai, oi lalomanoka lasi, to Iakobo, Rahela, bona Iosepa ese idia karaia gaudia oi laloa. Oibe, idia ese edia hetura karana Dirava ida idia laloa bada dainai, ia ese idia ia hagoadaia bona hanamoa. Idia be idia hekwarahi bona edia guriguri hegeregerena idia kara. Inai tanobada dikana ena dokona be kahirakahira, unai dainai ita vairanai ia noho helaro namona ita dogoatao noho be namo! Oi be oi hekwarahi noho Iehova ena lalonamo oi abia totona, a?

OI HEKWARAHI HAHENAMO ABIA TOTONA

10, 11. (a) Dirava ena hanamoa ita abia totona, dahaka ita karaia be namo? (b) Dahaka ese ita do ia durua, unai amo abia hidi maorodia ita karaia diba, bona do ita lalomanoka lasi?

¹⁰ Edena bamona negadiai Dirava ena hanamoa abia totona ita hekwarahi be namo? Reana ita momo be ita hekwarahi iseda manoka gaudia ita hanaia totona. Haida be idia hekwarahi bada haroro gaukara idia moalelaia totona. Eiava reana oi be oi gorere momo eiava sibona noho karana oi haheaukalaia noho. Ma haida be idia hekwarahi bada edia lalona ia hahisia tauna ena dika idia gwauatao totona. Herevana ita be lagani momo lalonai Iehova ita hesiai henia, to namona be ita ibounai ita hekwarahi Dirava ena hesiai gaukara idia koua diba gaudia ita dadaraia totona, badina ita diba momokani Dirava ese abidadama taudia do ia hanamoa.

¹¹ Momokani, nega momo ia auka abia hidi maorona ita karaia bona Keristani dala ita badinaia totona. Unai ia vara badina iseda kudouna ese ita ia koia diba. (Ier. 17:9) Bema oi mamia oi be dala kererena oi badinaia, namona be guriguri amo lauma helaga ena heduru oi noia. Guriguri karana bona lauma helaga ese oi dekenai goada ia henia diba, Iehova ese ia abia hidi dalana oi badinaia totona. Emu guriguri hegeregerena oi kara. Dina ta ta ai Baibel ena kahana ta oi duahia, bona nega oi atoa sibona emu stadi bona Ruma Bese Ena Tomadiho oi karaia totona.​—Salamo 119:32 duahia.

12, 13. Keristani taudia rua be edena dala ai heduru idia abia edia ura kereredia idia dadaraia totona?

¹² Dirava ena Hereva, iena lauma helaga, bona iseda buka bona magasin ese Keristani taudia ia durua, ura kereredia idia dadaraia totona. Hegeregere, mero matamata ta ese December 8, 2003 ena Awake! ai, atikol ladana, “How Can You Resist Wrong Desires?” ia duahia. Bona ia gwau: “Lau be lau hekwarahi bada lalohadai mirodia lau dadaraia totona. To, unai atikol ia gwau ‘taunimanima momo be idia hekwarahi bada ura dikadia idia dadaraia totona.’ Unai lau duahia neganai, lau mamia, lau sibona lasi, to ma haida danu be unai hekwakwanai idia davaria.” Ia ese danu atikol ladana “Alternative Life-Styles​—Does God Approve?” ia moalelaia. Unai atikol be October 8, 2003 ena Awake! dekenai ia noho. Ia gwau unai atikol ese ia hahedinaraia ma haida dekenai unai be “ginigini ta ese [edia] tauanina ia gwadaia bamona.” (2 Kor. 12:7) Ena be hari idia hekwarahi kara maoromaoro idia karaia totona, to idia diba edia vaira nega be do ia namo. Ia gwau: “Unai badina dainai, lau laloa dina ta ta ai unai hahetoho lau hanaidia diba. Bona Iehova lau tanikiu henia bada, badina iena orea amo ia ese ita ia durua inai tanobada dikana amo ita roho mauri totona.”

¹³ United States ai ia noho taihu ta mani ita laloa danu. Ia gwau: “Lau ura umui lau tanikiu henia, badina nega korikori ai, emai dabu gaudia umui henia. Nega momo lau mamia inai atikol idauidau be lau totona idia torea. Lagani momo lalonai, lau hekwarahi bada Iehova ese ia inai henia urana ta lau dadaraia totona. Nega haida lau hesiku dainai, lau ura lasi gau ta lau karaia. Lau diba Iehova be hebogahisi Diravana bona egu dika do ia gwauatao, to unai ura kererena lau abia bona lau dadaraia lasi dainai, lau mamia iena heduru lau abia be anina lasi. Unai dainai egu mauri be ia auka momokani. . . . To, inai atikol ladana “Emu Kudouna ai Iehova Oi Diba, A?,” March 15, 2013, ena Gima Kohorona ai lau duahia neganai, lau mamia momokani Iehova be ia ura lau ia durua.”

14. (a) Paulo ese iena hekwakwanai be edena bamona ia laloa? (b) Edena dala ai iseda manoka gaudia ita hanaia diba?

¹⁴ Roma 7:21-25 duahia. Paulo ia diba iseda goevadae lasi tauanina ena ura bona ena manoka gaudia ita koua be mai ena hekwarahi. To ia diba momokani ia kwalimu diba, bema guriguri amo Iehova dekenai ia tabekau bona Iesu ena mauri davalaia boubouna ia abidadama henia. Ita be edena bamona? Bema ita hekwarahi iseda manoka gaudia ita dadaraia totona, do ita kwalimu. Edena dala ai? Paulo hegeregerena, namo lasi ita sibona eda goada dekenai ita tabekau, to Iehova dekenai ita tabekau, bona mauri davalaia boubouna ita abidadama henia.

15. Guriguri karana ese edena dala ai ita ia durua diba?

¹⁵ Nega haida, Dirava ese dala ia kehoa hekwakwanai ta ita haheaukalaia totona. Hegeregere, bema ita (eiava iseda ruma bese tauna ta) be gorere badana ta ia abia eiava ita idia kara auka henia be edena bamona? Namona be guriguri amo Iehova ita noia ita dekenai goada do ia henia, unai amo ia ita badinaia noho diba, do ita moale, bona iseda hetura karana ia ida do ita haboioa lasi. (Fili. 4:13) Paulo ena negai bona iseda negai idia noho taudia momo edia sivarai ese ia hamomokania, guriguri ese ita ia hagoadaia bona durua diba ita haheauka noho totona.

HEKWARAHI NOHO IEHOVA ENA HAHENAMO ABIA TOTONA

16, 17. Emu lalona oi hadaia dahaka oi karaia totona?

¹⁶ Diabolo ia ura oi hesiku bona emu imana oi atoa diho, bena do ia kwalimu. To, namona be emu lalona oi hadaia “gau namodia do [oi] dogoatao auka” totona. (1 Tes. 5:21) Bona oi abia dae momokani Satani, iena tanobada dikana, bona emu manoka gaudia oi halusidia diba. Unai ia vara diba, bema Dirava ena heduru dekenai oi tabekau.​—2 Kor. 4:7-9; Gal. 6:9.

¹⁷ Unai dainai, namona be oi heatu noho, oi hekwarahi noho, bona oi haheauka noho. Oibe, namona be oi abia dae momokani Iehova ese “gau namodia momo herea umui dekenai do [ia] bubua diho.”​—Mal. 3:10.