Abidadama be mai Ena Ahuna

¹ Heberu 11:6 ia gwau Dirava “idia tahua taudia ibounai, be davana namona Dirava ese do ia henidia.” Mai abidadama ida ‘gau momo lasi idia naria’ hesiai taudia dekenai, davana namona ia henia dalana ta be ‘gau momo edia biaguna ai ia halaodia.’ (Mat. 25:23) Anina be nega momo Iehova ese ena abidadama witness taudia dekenai edia gaukara namona ena ahuna be hesiai gaukara ma haida ia henidia.

² Aposetolo Paulo ena abidadama karana dainai ia abia ahuna ta be, Europe bona Asia Minor edia siti bona hanua idauidau dekenai hesiai gaukara ia karaia loaloa. (1 Tim. 1:⁠12) Ena be ia hekwarahi bada iena hesiai gaukara hagugurua totona, to Paulo ese ia abia hahenamo ia laloa bada. (Roma 11:13; Kol. 1:⁠25) Ia hahedinaraia mai ena lalona ibounai ida unai gaukara ia laloa bada, badina be taunimanima haroro henidia daladia ia tahua goadagoada. Iena abidadama be iena gaukara goadagoada karana amo ia hahedinaraia. Iena haheitalai ese ita ia hagoadaia iseda hahenamo, iseda hesiai gaukara unai, ita laloa bada totona.

³ Iehova ese Hesiai Gaukara Ia Henia Ita Dekenai: Edena bamona ita hahedinaraia unai ahuna namona ita laloa Paulo ese ia laloa hegeregerena? Iseda hesiai gaukarana habadaia daladia ita tahua. Dala ita davaria neganai, nega idauidau bona gabu idauidau dekenai ita haroro bona ruma-ta-ruma-ta gaukara ita karaia danu. Guna ruma dekenai idia noho lasi taudia iboudiai ita tahua bona kamonai taudia iboudiai ita lou henia. Bona Baibel stadi karaia totona ita makaia vadaeni negana ita reaia lasi.

⁴ Paulo ese iseda hesiai gaukara ia herevalaia neganai, ita ia hagoadaia: ‘Do oi haroro goadagoada.’ (2 Tim. 4:⁠2) Karaia goadagoada ena anina be karaharaga ita karaia. Iseda hesiai gaukara ita karaia goadagoada, bona ia be gau ginigunana iseda mauri lalonai, a? Hegeregere, ita ura lasi moale karadia bona sibona eda ura gaudia tahua karadia ese haroro totona ita atoa nega ia koua. Ita diba momokani hari inai nega ena dokona be kahirakahira dainai, ita diba momokani danu Basileia ena sivarai namona harorolaia gaukarana be ita karaia gaukara badana.

⁵ Iseda abidadama Dirava dekenai ita hahedinaraia diba bema ia ita badinaia bona ia henia gaukara ita karaia hanaihanai. Namona be iseda hesiai gaukara ita karaia guguru, bona Iehova ese iseda abidadama karana ena ahuna be dala badana ta ai do ia henia.