“Lauma Helaga Ena Gaudia Laloa Karana ese Mauri Bona Maino Ia Mailaia”

1, 2. Dahaka dainai horoa Keristani taudia dekenai Roma karoa 8 be mai anina bada?

LAGANI ta ta ai Iesu ena mase laloatao negana ai, Roma 8:15-17 oi duahia, a? Reana. Unai siridia ai lauma helaga ese Keristani taudia ia horoa dalana ia herevalaia​—Dirava ena lauma bona edia laloa dalana idia gwauraia hedinarai. Bona unai karoa ena siri ginigunana ese “Keriso Iesu ida idia hakapua taudia” ia herevalaia. To, Roma karoa 8 be horoa taudia sibona ia herevalaia, a? Eiava tanobada ai do idia noho Keristani taudia ia herevalaia danu?

² Unai karoa ese horoa Keristani taudia ia herevalaia. Idia be “Dirava ena lauma” idia abia bona ‘Dirava ese idia be ena natudia ai do ia halaoa negana bona edia tauanina amo idia do ia ruhaia negana idia naria noho.’ (Roma 8:23) Oibe, vaira nega ai guba dekenai idia be Dirava ena natudia ai do idia lao. Unai be momokani badina idia be bapatiso Keristani taudia ai idia lao, bona mauri davalaia boubouna amo Dirava ese edia kara dika ia gwauatao, bona idia ia gwauraia maoromaoro.​—⁠Roma 3:23-26; 4:25; 8:30.

3. Dahaka dainai ita gwau diba tanobada helarona idia abia taudia dekenai Roma karoa 8 be mai anina danu?

³ To, tanobada ai do idia noho hanaihanai taudia dekenai Roma karoa 8 be mai anina bada, badina Dirava ese idia ia gwauraia maoromaoro danu. Paulo ese matamanai ia torea revarevana ese unai ia hahedinaraia. Karoa 4 ai, ia ese Aberahamo ia herevalaia. Iehova ese Israela taudia dekenai Taravatu ia do henia lasi bona Iesu be iseda kara dika totona ia do mase lasi neganai, unai abidadama tauna ia noho. To, Iehova ese Aberahamo ena abidadama ia itaia dainai, ia gwauraia maoromaoro. (Roma 4:20-22 duahia.) Hari Iehova ese abidadama Keristani taudia ia gwauraia maoromaoro danu. Bona idia be Roma karoa 8 ai ia noho sisiba amo namo idia abia diba.

4. Roma 8:21 ena hereva dainai, sibona dekenai dahaka henanadai do ita henia?

⁴ Roma 8:21 ese ia hamomokania tanobada matamata be momokani do ia vara. Unai siri ai inai gwauhamata ia noho, “Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.” To henanadai be inai, ‘Ita be unuseniai do ita noho bona unai ahuna do ita abia, a? Oi abia dae momokani unai ahuna do oi abia, a?’ Roma karoa 8 ai ia noho sisibana ese oi do ia durua.

“TAUANINA ENA URA GAUDIA LALOA KARANA”

5. Roma 8:4-13 ai, Paulo be dahaka mai anina bada gauna ia herevalaia?

⁵ Roma 8:4-13 duahia. Roma karoa 8 ese “tauanina ena ura hegeregerena” idia raka taudia bona “lauma helaga ena ura hegeregerena” idia raka taudia ia herevalaia. Reana haida do idia laloa unai karoa ese hereva momokani idia diba taudia bona idia diba lasi taudia, bona Keristani taudia bona Keristani lasi taudia edia idau ia herevalaia. To, Paulo ese unai revareva be “Roma ai [idia] noho taudia, Dirava ese ia lalokau henia bona ia boiria helaga taudia” dekenai ia torea. (Roma 1:7) Paulo ese tauanina ena ura hegeregerena idia raka taudia bona lauma helaga ena ura hegeregerena idia raka taudia edia idau ia gwauraia. Edia idau be dahaka?

6, 7. Roma 8:4-13 ai, Paulo ese inai hereva “tauanina” be edena bamona ia herevalaia?

⁶ Inai hereva “tauanina” ena anina mani ita laloa. Siri lalonai Paulo ese ia gaukaralaia Grik herevana be siri ma haida ai idia gaukaralaia neganai, “tauanina ena ura” idia herevalaia. Nega haida ia be iseda tauanina korikorina eiava garana ia herevalaia diba.​—Roma 2:28; 1 Kor. 15:39, 50; Roma 1:3.

⁷ To Roma 8:4-13 ai, inai hereva “tauanina” ena anina be karoa 7 ese ia hahedinaraia. Paulo ese “tauanina ena ura hegeregerena ita noho” bona “iseda tauanina lalonai idia gaukara noho ura dikadia” ia herevalaia. (Roma 7:5) Unai amo ita diba, Paulo ese “tauanina ena ura hegeregerena idia kara taudia” ia herevalaia neganai, ia be “tauanina gaudia sibona idia laloa noho” taudia ia gwauraia. Unai taudia be edia ura sibona idia laloa bona badinaia. Oibe, idia momo be sibodia edia ura idia badinaia, herevana ia be matabodaga karadia karaia urana eiava ura ma haida.

8. Dahaka dainai Paulo ese “tauanina ena ura hegeregerena” raka karana ena dika ia herevalaia?

⁸ To reana do oi laloa, dahaka dainai Paulo ese horoa Keristani taudia dekenai “tauanina ena ura hegeregerena” raka karana ena dika ia herevalaia. Hari Dirava ese ena turadia ai ia halaoa bona ia gwauraia maoromaoro taudia ese unai dika idia mamia danu, a? Momokani, Keristani tauna be tauanina ena ura hegeregerena ia raka matamaia diba. Hegeregere, Paulo ia gwau, Roma ai, tadikaka bogaraginai idia noho taudia haida be “tauanina ena ura dikadia ena igui hesiai taudia,” reana idia ese matabodaga karadia eiava aniani, inuinu, eiava gau ma haida idia ura henia bada. Idia haida be edia hereva amo kerere lasi taudia idia veria. (Roma 16:17, 18; Fili. 3:18, 19; Iuda 4, 8, 12) Mani oi laloa, Korinto tadikaka ta be nega sisina lalonai “iena tamana ena adavana ida ia noho hebou.” (1 Kor. 5:1) Unai dainai Dirava ese Paulo amo Keristani taudia ia sisiba henia, “tauanina ena ura gaudia laloa karana” dekenai idia gima totona.​—⁠Roma 8:5, 6.

9. Roma 8:6 ai Paulo ena sisiba ena anina be dahaka?

⁹ Hari danu Paulo ena sisiba be mai anina bada. Keristani tauna ta be lagani momo lalonai Dirava ia hesiai henia murinai, reana ia be tauanina ena ura gaudia do ia lalohadailaia matamaia. To, nega ta ta ai aniani, moni gaukara, moale karadia, eiava hetura karana ia laloa Keristani tauna ia herevalaia lasi. Dirava ena hesiai tauna be unai gaudia ia laloa be kerere lasi. Iesu danu be aniani ia moalelaia, bona ma haida ia ubua. Bona ia diba ita moale danu be namo. Bona Paulo ese headava taudia be nega maorona ai lalokau idia hahedinaraia dalana ia herevalaia danu.

10. Roma 8:5, 6 ai, inai hereva “tauanina ena ura gaudia laloa karana,” ena anina be dahaka?

¹⁰ Vadaeni inai hereva, “tauanina ena ura gaudia laloa karana” ena anina be dahaka? Paulo ese ia gaukaralaia Grik herevana ena anina be, “ta ese ena lalona o kudouna ai gau tamona sibona ia laloa, bena unai hegeregerena palani ia karaia, bona ia badinaia.” Tauanina ena ura gaudia sibona idia laloa taudia edia mauri be edia goevadae lasi tauanina ena ura ese ia biagua. Diba bada tauna ta ese Roma 8:5 be inai bamona ia herevalaia: “Idia ese edia lalona idia hadaia edia tauanina ena ura sibona do idia badinaia, badina taunimanima momo be unai gauna idia ura henia eiava idia herevalaia momo.”

11. Sibona dekenai inai henanadai, ‘Lau be dahaka lau laloa bada?,’ ita henia neganai, dahaka gaudia ita laloa be namo?

¹¹ Roma Keristani taudia be edia mauri ai idia laloa bada gaudia idia lalohadailaia be namo. Edia mauri ai idia be “tauanina gaudia” sibona idia laloa, a? Ita danu be unai ita lalohadailaia be namo. Ita dekenai dahaka be mai anina bada, bona ita herevalaia gaudia ese dahaka idia hahedinaraia? Dina ta ta ai ita ura bada dahaka ita karaia? Haida be idia ura bada wain idauidau idia tohoa, edia ruma idia hanamoa, dabua matamatadia idia tahua, edia moni idia habadaia, edia holidei idia palanilaia, bona ma gau haida idia karaia. Unai idia karaia be kerere lasi, unai be iseda mauri ai ita karaia gaudia. Hegeregere, nega ta Iesu be wain ia karaia, bona Paulo ese Timoteo ia hamaoroa “wain sisina” do ia inua. (1 Tim. 5:23; Ioa. 2:3-11) To Iesu bona Paulo be wain sibona “idia herevalaia momo,” a? Unai be idia ura henia bada gauna, a? Lasi. Vadaeni ita be edena bamona? Iseda mauri ai dahaka be mai anina bada?

12, 13. Dahaka dainai sibona iseda kara ita tahua be mai anina bada?

¹² Sibona iseda kara ita tahua be mai anina bada. Dahaka dainai? Paulo ia gwau: “Tauanina ena ura gaudia laloa karana ese mase ia mailaia.” (Roma 8:6) Unai be dika herea, badina oi ese emu hetura karana Dirava ida oi haboioa bona vaira nega ai oi be helaro lasi. To, Paulo ena hereva ena anina be ta ese “tauanina ena ura gaudia” ia laloa neganai, ena dokona be mase, a? Lasi, ta be ena kara ia haidaua diba. Mani Korinto ai ia noho tauna ta ita laloa, ia be “tauanina ena ura gaudia” ia tahua bona matabodaga karadia ia karaia, unai dainai kongrigeisen amo ia idia atoa siri. To, ia ese ena mauri ia haidaua. Tauanina ena ura gaudia tahua karana ia dadaraia bona dala maorona ia badinaia matamaia.​—2 Kor. 2:6-8.

¹³ Bema unai tauna ese ena mauri ia haidaua, Keristani tauna ese ena mauri ia haidaua diba danu, bema ia be tauanina ena ura ia tahua goadagoada lasi, Korinto tauna ia karaia bamona. Momokani, Paulo ese “tauanina ena ura gaudia” sibona ia laloa tauna ena dokona ia herevalaia dainai, unai ese Keristani tauna ia hagoadaia diba ena mauri ai gau haida ia haidaua totona!

“LAUMA HELAGA ENA GAUDIA LALOA”

14, 15. (a) Paulo ese “tauanina ena ura gaudia laloa karana” ia herevalaia murinai, dahaka hagoadaia herevana ia gwauraia? (b) “Lauma helaga ena gaudia laloa karana” ena anina be dahaka?

¹⁴ Aposetolo Paulo ese “tauanina ena ura gaudia laloa karana” dekenai sisiba ia henia murinai, inai hagoadaia herevana ia gwauraia: “Lauma helaga ena gaudia laloa karana ese mauri bona maino ia mailaia.” Mauri bona maino ita abia be hahenamo namona, ani? To, unai hahenamo be edena bamona do ita abia?

¹⁵ “Lauma helaga ena gaudia laloa karana” be gau ta lalohadailaia bona herevalaia karana ia gwauraia lasi. “Lauma helaga ena gaudia” ia laloa tauna be Baibel eiava iena lalokau Dirava dekenai bona vaira nega helarona sibona ia laloa bona ia herevalaia. Mani oi laloa, aposetolo edia negai Dirava idia hamoalea taudia, hegeregere Paulo bona ma haida ese edia dina ta ta maurina idia moalelaia. Idia aniani bona inuinu. Momo be idia headava bona edia famili maurina idia moalelaia, bona idia gaukara sibona idia naria totona.​—Mar. 6:3; 1 Tes. 2:9.

16. Paulo ena mauri ai, ia be dahaka ia laloa bada?

¹⁶ To, unai abidadama taudia ese dina ta ta ai idia karaia gaudia be edia mauri ena badina ai idia halaoa lasi. Baibel ese ia hahedinaraia Paulo be palai rumadia ia karaia, to iena mauri lalonai unai gaukara sibona ia laloa lasi: Ia ese Keristani haroro bona hahediba gaukarana ia laloa bada. (Kara 18:2-4; 20:20, 21, 34, 35 duahia.) Unai dainai Roma ai idia noho tadikaka taihu dekenai unai gaukara ia herevalaia momo. Oibe, Paulo ese ena mauri ai Dirava ena sivarai namona harorolaia gaukarana ia atoa guna. Namona be Roma taudia ese ia idia tohotohoa, bona hari ita danu.​—Roma 15:15, 16.

17. Bema “lauma helaga ena gaudia” ita laloa, edena bamona mauri do ita abia?

¹⁷ “Lauma helaga ena gaudia laloa karana” ena namo be dahaka? Haere be Roma 8:6 ai, ia gwau: “Lauma helaga ena gaudia laloa karana ese mauri bona maino ia mailaia.” Anina be ita ura lauma helaga ese iseda lalohadai ia biagua bona Dirava ena laloa hegeregerena do ita laloa. Namona be ita abia dae momokani, bema “lauma helaga ena gaudia” ita laloa, iseda mauri do ita moalelaia. Bona vaira negai mauri hanaihanai do ita abia, herevana ia be guba ai o tanobada ai.

18. Bema “lauma helaga ena gaudia” ita laloa, unai ese dahaka ia havaraia?

¹⁸ Mani inai ita laloa, “lauma helaga ena gaudia laloa karana ese . . . maino ia mailaia.” Taunimanima momo be idia hekwarahi lalomaino idia abia totona. Idia be unai idia karaia noho lalonai, ita be lalomaino ita abia vadaeni. Unai maino ita moalelaia totona, namona be ita hekwarahi iseda famili bona kongrigeisen taudia ida maino ai ita noho. Laloatao, ita bona iseda tadikaka taihu be goevadae lasi. Unai dainai, nega ta ta ai hekwakwanai idia vara diba, bona bema unai ia vara, namona be Iesu ena sisiba ita badinaia, ia gwau: “Emu tadikaka ida maino oi karaia.” (Mat. 5:24) Do ia auka lasi bema unai tadikaka o taihu be “maino ia henia Diravana” ia hesiai henia.​—⁠Roma 15:33; 16:20.

19. Bema “lauma helaga ena gaudia” ita laloa, daika ida maino ita karaia diba?

¹⁹ To daika ida maino ita karaia be gau badana? Oibe, bema “lauma helaga ena gaudia” ita laloa, iseda Havaraia Tauna ida maino ai ita noho diba. Isaia ese iena negai idia noho taudia dekenai inai hereva ia torea, to iseda negai unai ia guguru momokani, ia gwau: “Tau ta, bema oi Lohiabada dekenai ia laloa noho nega ibounai, oi ese maino namo herea ia dekenai do oi henia, badina be ia ese oi dekenai ia abidadama henia noho.”​—Isa. 26:3; Roma 5:1 duahia.

20. Dahaka dainai Roma karoa 8 ai ia noho sisibana dainai oi moale?

²⁰ Unai dainai herevana ita be horoa taudia o tanobada paradaiso ai do ita noho hanaihanai, Roma karoa 8 ai ia noho sisibana dainai ita moale. Oibe, ita moale badina unai karoa ese ita ia hagoadaia “tauanina gaudia” ita laloa bada lasi totona! To, aonega karana be inai sisiba ita badinaia: “Lauma helaga ena gaudia laloa karana ese mauri bona maino ia mailaia.” Bema unai ita karaia, ia noho hanaihanai ahuna do ita abia, badina Paulo ia gwau: “Kara dika ena davana be mase, to Dirava ese Keriso Iesu iseda Lohiabada amo ia henia harihari gauna be mauri hanaihanai.”​—Roma 6:23.