Manau Karana Ia be Aonega Karana
Toñi ena gaukara be buruka taudia ia naria. Nega ta, ia be ruma ta ena iduara dekenai ia pidipidi, bona hahine ta ese iduara ia kehoa. Unai hahine ese Toñi ia gwau henia, badina ia ginidae haraga lasi unai hahine ena sinana burukana ia naria totona. Toñi be ia leiti lasi. To, unai hahine ena lalohadai kererena dainai, Toñi be mai manau ida sori herevana ia gwauraia.
MURINA dinana ai, unai hahine ese Toñi ia gwau henia lou. Toñi be dahaka ia karaia? Ia gwau: “Lau dekenai unai be auka momokani, badina ia gwauraia herevadia be maoro lasi.” To, Toñi be unai hahine dekenai sori herevana ia gwauraia lou bona hahine ia hamaoroa ia mamia hisihisina ia lalopararalaia.
Bema unai be oi, edena bamona do oi kara? Do oi manau, a? Do ia auka emu badu oi biagua totona, a? Momokani, unai bamona negadiai do ia auka emu badu oi biagua totona. Oibe, hekwakwanai ia vara o ta ese oi ia habadua neganai, do ia auka oi manau totona.
To Baibel ese Keristani taudia ia hagoadaia do idia manau. Bona Dirava ena Hereva ese manau karana be aonega ida ia hakapua tamona. Iamesi ia gwau: “Umui huanai daika be mai ena aonega bona laloparara? Namona be ena kara namodia amo ia hamomokania iena gaukara be mai manau ida ia karaia. Unai manau karana ena badina be aonega.” (Iam. 3:13) Edena dala ai manau karana ese atai amo ia mai aonegana ia hahedinaraia? Bona dahaka ese ita ia durua diba unai kara ita hahedinaraia totona?
MANAU BE AONEGA KARANA
Manau karana ese badu ia koua diba. “Mai manau danu ia haere tauna, ese badu ia koua noho, to hereva auka ese badu ia havaraia noho.”—Aon. 15:1.
Bema ta be mai badu ida ia kara, unai ese hekwakwanai do ia habadaia, hegeregere oi be lahi dekenai au oi atoa noho bamona. (Aon. 26:21) To, bema mai manau ida oi hereva, unai ese badu do ia koua. Momokani, manau karana ese kara auka taudia ia hamanaua diba.
Toñi ese unai ia itaia. Hahine ia itaia Toñi be mai manau ida ia hereva neganai, ia tai matamaia. Bena Toñi ia hamaoroa ia bona ena ruma bese ena hekwakwanai dainai ia lalometau. Toñi ena manau karana dainai, unai hahine be Baibel ia stadilaia matamaia.
Manau karana ese ita ia hamoalea diba. “Manau taudia be idia moale, badina idia ese tanobada do idia abia.”—Mat. 5:5.
Dahaka dainai manau taudia be idia moale? Haida be guna dagedage taudia, to hari manau karana be dabua bamona idia hahedokilaia dainai, idia moale. Edia mauri be ia namo, bona idia diba vaira negai hahenamo idauidau do idia davaria. (Kol. 3:12) Adolfo be hari Spain ai sekit gaukara ia karaia. To hereva momokani ia do dibaia lasi neganai, ena mauri be ia dika.
Adolfo ia gwau: “Lauegu mauri be anina lasi. Lau be badu haragaharaga tauna, bona egu turadia haida be egu hekokoroku bona dagedage karadia dainai idia gari. Gabeai ia vara gauna ese egu mauri ia haidaua momokani. Heatu badana ta ai, nega 6 lau idia gwadaia bona rara bada lau halusia dainai kahirakahira lau mase.”
Hari Adolfo be ma haida ia hadibaia edia hereva bona kara amo manau idia hahedinaraia totona. Iena kara namodia dainai momo be ia idia ura henia. Adolfo ia gwau iena kara ia haidaua dainai ia moale. Bona Iehova ia tanikiu henia badina iena heduru dainai, ia manau diba.
Manau karana ese Iehova ia hamoalea. “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.”—Aon. 27:11.
Momokani, Diabolo be hanaihanai Iehova ia gwauraia kerere. Bona iena kara ese Dirava ia habadua diba, to Baibel ia gwau Iehova be “badu dekenai [ia] haraga lasi.” (Eso. 34:6) Bema ita hekwarahi Dirava hegeregerena ita badu haraga lasi bona ita manau, ita be aonega dalana ita badinaia bona unai ese Iehova ia hamoalea.—Efe. 5:1.
Hari taunimanima momo edia kara be dika. Idia momo be ‘sibodia idia abia isi, idia hekokoroku, hadikaia herevadia idia gwauraia, . . . ladana hadikaia taudia, sibodia edia ura idia biagua lasi, idia dagedage.’ (2 Tim. 3:2, 3) To, namo lasi edia kara dainai Keristani tauna be manau karana ia hahedinaraia lasi. Baibel ia gwau, “atai amo ia mai aonegana ia abia tauna . . . be maino tauna, ia laloa maoromaoro.” (Iam. 3:17) Oibe, bema maino bona laloa maoromaoro karana ita hahedinaraia, ita hamomokania ita be atai amo ia mai aonegana ita abia. Unai aonega ita abia dainai, ma ta ese ita ia habadua neganai, mai manau ida ita hereva diba bona aonega ibounai Diravana, Iehova, kahirakahira ita lao.