Matamata Taudia E, Diabolo Ena Koikoi Karadia amo Umui Gini Goada

1, 2. (a) Dahaka dainai Keristani matamata taudia be lauma dikadia tuari henia karana amo idia kwalimu noho? (Laulau ginigunana herevalaia.) (b) Dahaka do ita herevalaia?

APOSETOLO PAULO ese iseda Keristani maurina be soldia ida ia hahegeregerea. Oibe, ita be lauma tuarina ai ita tuari, to tuari korikorina lasi. To, iseda inai taudia be idia mauri noho. Satani bona ena demoni be tuari daladia idia diba momo. Unai dainai matamanai do ita laloa, ita kwalimu diba lasi. Bona reana Keristani matamata taudia be hegeregere lasi idia kwalimu totona. To lauma dikadia amo idia kwalimu diba, a? Oibe, matamata taudia idia kwalimu diba, bona hari idia kwalimu noho! Dahaka dainai? Badina idia ese “Lohiabada amo . . . . siahu do [idia] abia noho.” To Dirava ena siahu sibona amo lasi to ma gau haida idia karaia danu. Idia be tuari dabuadia idia hahedokilaia. Bona idia treinini namonamo tuari taudia bamona, “Dirava ese ia henia tuari dabua ibounai . . . [idia] hahedokilaia.”​—⁠Efeso 6:10-12 duahia.

² Paulo ena haheitalai ia gwauraia neganai, reana ia be Roma tuari taudia ese idia karaia tuari dabua ia laloa. (Kara 28:16) Mani unai haheitalai ena badina ita itaia. Unai ita karaia lalonai, matamata taudia haida be Dirava ese ia henia tuari dabua ta ta idia hahedokilaia dainai idia davaria hekwakwanai bona ena namo idia herevalaia daladia do ita itaia.

“HEREVA MOMOKANI ENA BELETA”

3, 4. Edena dala ai Baibel ai ia noho hereva momokani be Roma tuari tauna ena beleta ida ia hegeregere?

³ Efeso 6:14 duahia. Roma tuari tauna ena beleta be mai ena auri gaudia, unai ese soldia ena gabana ia gimaia. Unai bamona idia karaia unai amo kemena ai idia atoa auri dabua ena metau ia hamaragia diba. Danu beleta haida dekenai kaia atoa gabudia idia karaia unai amo kaia badana bona maragina idia atoa diba. Soldia be ena beleta ia auka neganai, tuari lalonai mai gari lasi ida do ia tuari diba.

⁴ Unai hegeregerena, Dirava ena Hereva amo ita dibaia hereva momokanidia ese hadibaia hereva koikoidia amo iseda abidadama ia gimaia. (Ioa. 8:31, 32; 1 Ioa. 4:1) Bona iseda ura hereva momokani dekenai ia bada neganai, do ia auka lasi iseda “kemena ena auri dabua” ita huaia totona, unai be, Dirava ena kara maoromaoro taravatudia ita badinaia karana. (Sal. 111:7, 8; 1 Ioa. 5:3) Danu, bema Dirava ena Hereva amo ita dibaia hereva momokanidia ita lalopararalaia namonamo, mai gari lasi ida do ita gini goada bona hereva momokani idia inai henia taudia amo hereva momokani ita gimaia diba.​—⁠1 Pet. 3:15.

5. Dahaka dainai hereva momokani ita gwauraia be namo?

⁵ Bema Baibel ena hereva momokani ita dogoatao auka, ita do ia durua iseda mauri lalonai ita badinaia totona bona nega ibounai hereva momokani do ita gwauraia. Dahaka dainai ita koikoi lasi be namo? Badina koikoi karana be Satani ese ia gaukaralaia tuari kohu badana ta. Koikoi herevadia ese ia koikoi tauna bona ena hereva ia abia dae tauna ia hadikaia diba. (Ioa. 8:44) Ita be goevadae lasi dainai, namona be ita gaukara goada koikoi herevadia ita gwauraia lasi totona. (Efe. 4:25) To unai ita karaia totona be mai ena hekwarahi. Mauri lagani 18 kekeni ta, Abigail, ia gwau: “Nega haida reana hereva momokani ita gwauraia be anina lasi, hegeregere, koikoi herevana ta gwauraia karana ese dala ia kehoa diba, hekwakwanai badana ta oi hanaia totona.” To dahaka dainai, nega ibounai ia ura hereva momokani ia gwauraia? Ia gwau: “Hereva momokani lau gwauraia neganai, Iehova vairanai egu lalomamina ia goeva. Danu egu tama sina bona turadia ese lau idia abidadama henia diba.” Victoria, ena mauri lagani be 23, ia gwau: “Hereva momokani oi gwauraia bona oi abia dae gaudia oi gwauraia hedinarai dainai, reana oi idia dagedage henia diba. To, nega ibounai unai oi karaia ena namo haida be: Do oi gari lasi, emu hetura karana Iehova ida do ia goada, bona oi idia lalokau henia taudia ese oi do idia matauraia.” Momokani, nega ibounai “emui gabana dekenai hereva momokani ena beleta do umui kwatua,” be mai anina bada.

“KEMENA DEKENAI KARA MAOROMAORO ENA AURI DABUA”

6, 7. Dahaka dainai kara maoromaoro be kemena ena auri dabua ida ia hegeregere?

⁶ Aposetolo edia negai Roma soldia be kemena ena auri dabua idia hahedokilaia. Unai auri dabua be auri maragidia amo idia karaia, idia be palaka. Bona auri palaka ta be ma ta latanai idia atoa. Unai auri maragidia be idia hagagevadia soldia ena tauanina dekenai ia hegeregere totona. Bona unai auri maragidia ai be leda idia atoa bona huku bona buckle ida idia kwatua hebou. Soldia ena pagana dekenai auri palakadia ma haida idia noho, unai danu be leda ese ia dogoatao. Ena be inai bamona dabua ese soldia ia durua diba to ena marere dalana be mai ena hetoana. Unai dainai nega ibounai ia karaia auri dabua ia sekea loulou be namo. To ena kemena ai ia noho auri dabua ese ena kudouna eiava tauanina ena kahana haida be kaia o diba ena matana amo ia gimaia.

⁷ Unai kemena ena auri dabua ena haheitalai ese laulau dalanai Iehova ena kara maoromaoro taravatudia be iseda kudouna ia gimaia karana ia herevalaia namonamo! (Aon. 4:23) Soldia ta be ena kemena ena auri dabua do ia haidaua lasi auri manokana amo idia karaia dabua totona, unai hegeregerena, Iehova ena taravatu maorodia be iseda laloa dalana hegeregerena ita haidaua diba lasi. Sibona ita karaia abia hidi ese ita do ia gimaia lasi. (Aon. 3:5, 6) Unai dainai, nega ibounai Iehova ese ia henia ‘auri dabuadia’ ita sekea loulou, unai amo iseda kudouna ia gimaia namonamo diba.

8. Dahaka dainai Iehova ena taravatu badinaia karana be mai ena namo?

⁸ Nega haida oi mamia Iehova ena kara maoromaoro taravatudia ese oi idia hametaua eiava emu ura kwalimu idia koua toho, a? Daniel, ena mauri lagani be 21, ia gwau: “Tisa taudia bona sikuli turadia be lau idia kirikirilaia badina Baibel ena taravatu lau badinaia. Nega sisina lalonai, lau gari bona lau lalometau.” Edena bamona ia goada lou? Ia gwau: “Gabeai, lau itaia Iehova ena taravatu badinaia karana be mai ena namo. Egu ‘turadia’ haida be drag idia abia matamaia; haida be edia sikuli idia haorea lasi. Madi, edia mauri be ia dika. Iehova be ita ia gimaia namonamo.” Madison, ena mauri lagani be 15, ia gwau: “Lau hekwarahi Iehova ena taravatu lau badinaia bona egu turadia edia moale karadia lalonai lau vareai lasi totona.” Edena dala ai unai ia haheaukalaia? Ia gwau: “Sibona lau hadibaia loulou lau be Iehova ena ladana lau abia bona unai hedibagani be Satani ena tarapu ta. Hekwakwanai ta amo lau kwalimu neganai, lau moale.”

MAINO ENA SIVARAI NAMONA HAROROLAIA TOTONA OI HEGAEGAE TAMAKA OI ATOA BAMONA

9-11. (a) Laulau dalanai edena bamona tamaka be Keristani taudia ese idia karaia? (b) Dahaka ese ita ia durua diba sivarai namona ita harorolaia namonamo totona?

⁹ Efeso 6:15 duahia. Bema Roma soldia ta be ena tamaka ia karaia lasi, do ia hegeregere lasi tuari lalonai ia vareai totona. Iena tamaka ena henuna kahana be leda toi amo idia karaia, unai dainai soldia ena tamaka be ia auka. Unai tamaka be do ia dika haraga lasi bona soldia be do ia raka namonamo diba.

¹⁰ Roma soldia be tuari idia lao totona, tamaka idia karaia be namo. To laulau dalanai Keristani taudia ese idia karaia tamaka be idia ia durua maino sivaraina idia harorolaia totona. (Isa. 52:7; Roma 10:15) To, dala ia kehoa neganai mai gari lasi ida ita haroro be namo. Roberto,a ena mauri lagani be 20, ia gwau: “Egu klas turadia haroro henidia totona lau gari. Reana lau hemarai dainai. Unai lau laloa lou neganai, lau hemarai be anina lasi. Hari lau moale egu turadia lau haroro henidia diba.”

¹¹ Matamata taudia momo idia davaria bema sivarai namona harorolaia totona idia hegaegae namonamo, edia gaukara idia karaia diba. Oi hegaegae totona dahaka oi karaia diba? Julia, ena mauri lagani be 16, ia gwau: “Egu sikuli baege lalonai Baibel bukadia lau udaia. Bona egu klas turadia ese edia lalohadai bona idia abia dae gaudia idia herevalaia neganai lau kamonai. Bena dahaka ese idia do ia durua daladia lau lalohadailaia. Bona lau hegaegae neganai, idia do ia durua daladia lau herevalaia diba.” Maria, ena mauri lagani be 23, ia gwau: “Bema oi be hebogahisi bona kamonai namonamo tauna, emu uru tamona taudia edia lalohekwarahi do oi lalopararalaia. Matamata taudia totona idia halasia pablikeisen ibounai lau duahia. Unai dala amo egu uru tamona taudia dekenai Baibel o jw.org ai idia noho heduru daladia haida lau hahedinaraia.” Unai matamata taudia bamona, haroro totona oi hegaegae namonamo neganai, emu “tamaka” be do ia hegeregere momokani.

“ABIDADAMA ENA KESI BADANA”

12, 13. Satani ena “peva ibounai mai ena lahi” haida be dahaka?

¹² Efeso 6:16 duahia. Roma tuari tauna ese ia huaia “kesi badana” be lata bona ena pagana amo ia diho ela bona ena tuina ia koua. Unai amo peva bona tuari kohudia idauidau amo ia ia gimaia.

¹³ Satani ese “peva ibounai mai ena lahi” ia negea, idia haida be Iehova dekenai ia gwauraia koikoi herevadia. Hegeregere, Ia be oi ia laloa bada lasi bona ta ese oi ia lalokau henia lasi. Aida, ena mauri lagani be 19, ia lalohekwarahi badina ia mamia ta ese ia ia laloa bada lasi. Ia gwau, “Nega momo lau mamia Iehova be lau kahirakahira ia noho lasi bona ia ura lasi egu Turana ai ia lao.” Edena dala ai unai hemami ia hanaia? Aida, ia gwau: “Hebou lao henia karana be egu abidadama ia hagoadaia dala badana ta. Hebou dekenai lau helai sibona bona haere lau henia lasi, badina lau laloa ta be do ia ura lasi egu haere ia kamonai. To, hari, hebou ibounai totona lau hegaegae bona lau hekwarahi nega rua o toi lau haere totona. Ia auka, to lau haere murinai lau moale. Danu tadikaka bona taihu be lau idia hagoadaia. Hebou amo lau giroa neganai lau diba Iehova be lau ia lalokau henia.”

14. Aida ena sivarai amo dahaka mai anina bada gauna ta ita dibaia?

¹⁴ Aida ena sivarai ese ia hahedinaraia mai anina bada gauna ta be inai: Soldia ese ia huaia kesi ena bada be ia idau diba lasi, to iseda abidadama ena kesi be ia maragi ia lao eiava ia bada ia lao diba. Abia hidi be ita sibona dekenai. (Mat. 14:31; 2 Tes. 1:3) Iseda abidadama ita hagoadaia be gau badana!

“HAHEMAURI ENA KWARA GAUNA”

15, 16. Edena dala ai abidadama be kwara gauna bamona?

¹⁵ Efeso 6:17 duahia. Roma tuari taudia ese idia karaia kwara gauna ese edia kwarana, aiona bona vairana ia gimaia. Kwara gaudia haida be mai edia dogoatao gabuna unai amo soldia ese imana amo idia dogoatao diba.

¹⁶ Kwara gauna ese soldia ena harana ia gimaia hegeregerena, iseda “hahemauri helarona” ese eda lalohadai ia gimaia. (1 Tes. 5:8; Aon. 3:21) Abidadama ese ita ia durua Dirava ena gwauhamata ita laloa noho bona hekwakwanai idauidau ita laloa namonamo totona. (Sal. 27:1, 14; Kara 24:15) To bema ita ura iseda “kwara gauna” ese ita ia gimaia noho, namona be kwarana dekenai ita atoa, iseda imana dekenai ita dogoatao lasi.

17, 18. (a) Edena dala ai Satani ese ita ia tohoa iseda kwara gauna ita kokia totona?

¹⁷ Satani ese edena dala ai ita ia tohoa iseda kwara gauna ita kokia totona? Iesu dekenai ia karaia gauna mani ita laloa. Satani ia diba Iesu be kahirakahira taunimanima do ia lohiaia. To Iesu be do ia naria ela bona Iehova ese ia abia hidi dinana do ia ginidae. Bona unai ia do vara lasi lalonai, Iesu be hisihisi do ia mamia bona do ia mase guna. Unai dainai Iesu be ena helaro do ia hagugurua haraga totona Satani ese ia tohoa. Satani ia laloa bema Iesu ese nega tamona sibona ia ia tomadiho henia, unai nega amo gau ibounai do ia henia. (Luka 4:5-7) Unai hegeregerena, Satani ia diba tanobada matamatana lalonai Iehova be ita dekenai tauanina gaudia do ia henia. To do ita naria noho, bona nega sisina lalonai reana hekwakwanai idauidau do ita davaria. Unai dainai hari Satani be dala idauidau ai ita ia tohoa mauri namona ita moalelaia totona. Ia ura tauanina ena ura gaudia do ita atoa guna. Satani ia ura lasi Basileia ita atoa guna.​—⁠Mat. 6:31-33.

¹⁸ Karina, ena mauri lagani 20, be Keristani matamata taudia momo bamona Satani ena koikoi karadia ia dadaraia. Ia gwau: “Lau diba Dirava ena Basileia sibona ese iseda hekwakwanai ibounai do ia hamaoromaoroa.” Edena dala ai hari unai helaro ese ena lalohadai bona kara ia durua? Ia gwau: “Paradaiso helarona ese lau ia durua tauanina gaudia tahua karana dekenai lalohadai maorona lau abia totona. “ Egu diba bona goada lau gaukaralaia lasi moni gaukara o ladana bada lau abia totona. To, egu nega bona goada lau gaukaralaia noho Dirava lau hesiai henia totona.”

DIRAVA ENA HEREVA BE, “LAUMA HELAGA ENA TUARI KAIA”

19, 20. Edena dala ai Dirava ena Hereva gaukaralaia daladia ita hanamoa diba?

¹⁹ Paulo ena revareva ia torea negana ai idia noho Roma tuari taudia, edia tuari kaia ena lata be 50 sentimita bamona bona tuari lalonai idia gaukaralaia. Roma soldia idia goada ena badina ta be tuari totona idia treinini negadia ibounai edia tuari kohudia idia gaukaralaia.

²⁰ Paulo ese Dirava ena Hereva, Iehova ese ita dekenai ia henia gauna, be kaia ta ida ia hahegeregerea. To ita gaukaralaia namonamo dalana ita dibaia be namo, unai amo iseda abidadama ita gimaia o iseda lalohadai ita hamaoromaoroa diba. (2 Kor. 10:4, 5; 2 Tim. 2:15) Edena dala ai Dirava ena hereva gaukaralaia daladia oi hanamoa diba? Sebastian, ena mauri lagani be 21, ia gwau: “Egu Baibel duahiduahi lalonai lau be karoa ta ta amo siri tamona lau torea diho. Lau ura henia siridia edia lista ta lau karaia. Unai dala amo, lau mamia Iehova ena lalohadai lau dibaia noho.” Matamanai ita herevalaia merona, Daniel, ia gwau: Egu Baibel duahiduahi lalonai, lau ese haroro gaukara ai lau davaria taudia do ia durua diba siridia lau abia hidi. Lau davaria taunimanima do idia kamonai namonamo bema idia itaia oi be Baibel oi laloa bada bona oi gaukara goada noho idia oi durua totona.

21. Dahaka dainai Satani bona ena demoni dekenai ita gari lasi?

²¹ Inai atikol ese ia herevalaia matamata taudia bamona, Satani bona ena demoni dekenai ita gari lasi. Herevana idia be mai edia siahu to do idia kwalimu diba lasi. Bona idia mase diba. Kahirakahira, Keriso ena Lagani 1,000 Lohia negana ai, idia do ia guia unai amo tanobada besedia do idia hakaua kerere lou lasi, unai murina idia do ia hadikaia ore. (Apok. 20:1-3, 7-10) Ita be iseda inai tauna, iena koikoi karadia, bona iena ura gaudia ita diba. Danu Iehova ena heduru dainai, Diabolo ena koikoi karadia amo ita gini goada diba!