Gorere Badana Ta Oi Abia Neganai

Doketa ese lau ia hadibaia lau be egu lung bona colon (bogana ena varovaro) ai kensa gorere lau abia neganai, lau diba do lau mase. To doketa lau itaia murinai ruma dekenai lau lao, bona lau gwau, ‘OK, unai lau laloa lasi, to dala do lau tahua unai gorere lau haheaukalaia totona.’”—Linda, ena mauri lagani be 71.

“Lau abia gorere badana be nerve syndrome, bona unai gorere dainai egu vairana ena lauri kahana ai hisihisi bada lau mamia. Nega haida, unai gorere dainai, lau lalohisihisi. Nega momo lau mamia lau be sibona lau noho bona sibona hamasea lalohadaina lau abia.”—Elise, ena mauri lagani be 49.

Wilsea ai ia helai gorere tauna ena lalokau taudia be ia badinai idia gini.

BEMA oi eiava emu lalokau tauna ta be gorere badana ta umui abia bona unai gorere dainai umui mase diba, do oi lalohisihisi bada. Danu, ia gorere tauna be ia badu haraga eiava ia lalohisihisi diba. Reana medical appointment be momo, medikol heduru abia o hoia dalana be auka, eiava idia inua muramura ese ia havaraia hisihisi dainai, do idia gari bona lalometau. Unai gorere badana laloa momo karana ese lalometau ia havaraia diba.

Edeseniai heduru ita abia diba? Momo idia davaria Dirava guriguri henia karana bona Baibel ai hagoadaia siridia idia duahia karana ese idia ia durua. Dala ma ta be famili bona turadia ese idia hahedinaraia lalokau bona heduru karana amo goada idia abia.

MA HAIDA IDIA HAHEAUKA DALANA

Robert ena mauri lagani 58, be ia gwau: “Dirava oi abidadama henia, bona oi do ia durua emu gorere oi haheaukalaia totona. Iehova oi guriguri henia. Ia dekenai emu hemami oi gwauraia. Lauma helaga totona oi noinoi. Bona Dirava oi noia oi ia durua lalohadai maorona oi abia, emu famili oi hagoadaia bona mai gari lasi ida emu gorere oi haheaukalaia totona.

“Emu famili ese oi idia durua neganai, unai be moale gauna. Nega ibounai egu famili ta eiava rua ese lau do idia rini henia bona nanadaia, ‘Oi namo?’ Danu gabu idauidau ai idia noho turadia amo hagoadaia herevadia lau abia. Idia ese lau idia hagoadaia bona unai ese lau ia durua lau hesiku lasi totona.”

Bema emu turana ta ia gorere bona ia oi vadivadi henia, Linda ena hereva mani oi laloa, ia gwau: “Gorere tauna be oi bamona, ia ura ena mauri ia moalelaia bona do ia ura lasi ena gorere umui herevalaia momo. Unai dainai hanaihanai umui herevalaia gaudia oi gwauraia.”

Dirava ena heduru, Baibel ena hagoadaia herevadia bona iseda lalokau turadia bona famili edia heduru dainai, ita abia dae diba iseda mauri be mai anina bada ena be gorere badana ta ita haheaukalaia.

Oi Idia Durua Diba Baibel Siridia

Dirava dekenai oi tabekau.

“Lohiabada dekenai lau guriguri, bona ia ese lau dekenai ia haere. Ia ese egu gari ibounai dekena amo, lau ia hamauria. Lau be durua tauna ta lasi neganai, Lohiabada dekenai lau taitai, vadaeni ia ese lau dekenai ia haere.”—Salamo 34:4, 6.

Linda, matamanai ita herevalaia hahine ia gwau: “Egu guriguri lalonai lau gwau lasi ‘Egu hisihisi oi hanamoa.’ To nega ibounai lau gwau, ‘lau oi hagoadaia bona durua egu gorere lau haheaukalaia totona.’”

Dirava ena Hereva duahia karana amo goada oi abia.

“Siona dekenai idia noho taudia ta ese do ia gwau lasi, ‘Lau be gorere.’”—Isaia 33:24.

Dirava ena gwauhamata vaira nega totona oi laloa dobu. Unai ese oi dekenai helaro do ia henia, bona oi do ia hagoadaia oi haheauka totona.

Emu famili bona turadia amo heduru oi noia.

“Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.”—Aonega Herevadia 17:17.

Elise, matamanai ita herevalaia hahine ia gwau, “Sibona oi noho lasi. Namona be emu turadia edia heduru oi abia dae. Nega haida reana do oi laloa oi be sibona oi noho bona Dirava be oi ia laloa lasi, to sibona oi noho lasi be namo.”