Hari Mauri Ita Moalelaia Diba
NEGA ta, gorere, buruka bona mase do ia ore. Inai bamona mauri do oi moalelaia momokani! To hari, mauri be hekwakwanai bona hisihisi momo amo ia honu. Dahaka ese oi ia durua mauri namona oi moalelaia totona? Baibel ese oi do ia durua diba. Mauri ai idia vara hekwakwanai haida bona Baibel ese ia durua dalana mani ita herevalaia.
MOALE DAVARIA DALANA
Baibel ena sisiba: “Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere.”—Heberu 13:5.
Hari inai negai taunimanima idia ura gau momo idia abia. To, Baibel ia gwau “umui dekenai idia noho gaudia be hegeregere.” Edena dala ai?
“Moni ura henia bada” karana dadaraia. Taunimanima be “moni idia ura henia bada” dainai edia helt, famili, hetura karana, edia kara namodia bona danu edia abidadama ia dika diba. (1 Timoteo 6:10) Unai be namo lasi! Badina dokonai, moni ia ura henia tauna ese moni do ia abia, to unai moni ena bada be “hegeregere lasi ia dekenai.”—Hadibaia Tauna 5:10.
Taunimanima laloa bada, kohu lasi. Momokani, kohu be mai edia namo. To unai gaudia ese ita do idia lalokau henia o hanamoa lasi; taunimanima sibona ese unai kara idia hahedinaraia diba. “Turana” korikorina ese ita ia durua diba moale ita davaria totona.—Aonega Herevadia 17:17.
HARI MAURI ITA MOALELAIA DIBA BEMA BAIBEL ENA HAKAUA HEREVADIA ITA BADINAIA
GORERE HAHEAUKALAIA KARANA
Baibel ena sisiba: “Iena kudouna ia moale tauna ese namo ia havaraia noho, muramura namona bamona.”—Aonega Herevadia 17:22.
“Muramura namona” bamona, moale ese ita ia durua diba gorere ita haheaukalaia totona. To ita gorere neganai, edena dala ai moale ita davaria diba?
Tanikiu karana hahedinaraia. Bema iseda hisihisi sibona ita laloa, iseda “mauri dinadia ibounai” ai do ita moale lasi. (Aonega Herevadia 15:15) Unai dainai Baibel ia gwau, “tanikiu karana do umui hahedinaraia.” (Kolose 3:15) Namona be emu mauri lalonai gau maragidia dekenai tanikiu karana oi hahedinaraia. Hegeregere, dina ia diho ena hairai, lai namona, ta ena kiri toana—unai gaudia ese iseda mauri ia hanamoa diba.
Haida durua karana. Ena be ita gorere, to “henia kara ena moale be bada, to abia kara ena moale be maragi.” (Kara 20:35) Ita karaia gaukara namona dainai haida ese ita idia hanamoa neganai, do ita moale bona iseda hekwakwanai do ita laloa momo lasi. Iseda mauri ita hanamoa diba bema haida ita durua edia mauri idia hanamoa totona.
HEADAVA MAURINA HAGOADAIA
Baibel ena sisiba: “Mai anina bada gaudia do umui diba.”—Filipi 1:10.
Headava taudia be nega momo ta ta idia bamoa lasi neganai, edia hetura karana ia dika diba. Headava tau bona hahine edia mauri lalonai edia headava be mai anina bada.
Gaukara hebou karana. Sibona emu ura oi dadaraia bona palani umui karaia umui gaukara hebou totona. Baibel ia gwau: “Tau rua ese tau tamona idia hereaia noho.” (Hadibaia Tauna 4:9) Badina aniani umui nadua, umui eksasais bona hagoevaia gaukarana umui karaia hebou diba.
Emui adavana dekenai lalokau hahedinaraia. Baibel ese headava tau bona hahine ia hagoadaia ta ta idia lalokau henia bona matauraia. (Efeso 5:28, 33) Emu kiri toana, adavana oi rosia karana eiava harihari gauna maragina henia karana ese headava ia hagoadaia diba. Oibe, headava tau bona hahine be idia sibona huanai lalokau karadia idia hahedinaraia be namo.—Heberu 13:4.