Inai Oi Diba, A?
Idaunegai, edena dala ai davara ai ia loaloa tauna be ena palani ia karaia?
PAULO ena negai, taunimanima idia guia bouti be lasi. Davara ai idia loaloa taudia be bouti amo idia lao totona, ma haida do idia nanadaia bema kohu ia abia lao bouti be do idia lao gabuna ia lao bona taunimanima idia guia diba. (Kara 21:2, 3) Ena be unai bouti amo loaloa tauna be ia ura henia gabuna ia lao lasi, to ia be unai bouti ia stopu gabuna ai do ia diho bona bouti ma ta do ia tahua unai amo ia ura lao henia gabuna kahirakahira ia lao diba.—Kara 27:1-6.
Nega ibounai davara ai idia loaloa lasi bona idia be bouti ena loaloa sediual ta idia badinaia lasi. Davara ia dika dainai bouti taria taudia be davara dekenai idia lao lasi, to unai sibona lasi, hegeregere bouti taria taudia ese manu koremana ta idia itaia varo latanai ia helai bona ia boiboi neganai idia laloa idia dekenai gau dikana ta do ia vara. Lai ia toa neganai bouti taria taudia be unai lai ena toa hegeregerena bouti idia abia lao. Loaloa tauna be ena kohu ida bouti abia gabuna dekenai do ia lao bona do ia naria ela bona bouti ai ia gaukara tauna ta be guia taudia ibounai ia boiria bouti ai idia guia totona.
Histori torea tauna Lionel Casson ia gwau: “Loaloa taudia be Roma ena siti dekenai idia lao neganai bouti idia davaria, unai amo idia sibona ese bouti do idia tahua lasi. Bouti abia gabuna be Tiber sinavai dekenai ia noho. Ostia ena taoni kahirakahira ai, bouti naria taudia be naria gabuna ta (piazza) dekenai idia helai bona bouti idia naria. Unai naria gabuna ta ta ai be ofesi ta ta idia noho. Bona unai ofesi momo be bouti ai idia gaukara taudia edia ofesi, hegeregere: Narbonne [hari inai negai idia gwauraia France,] Carthage [hari idia gwauraia Tunisia] bona ma haida danu. Bema ta be ia ura bouti amo ia ura henia gabuna ia lao, vadaeni unai ofesi dekenai do ia lao bona bouti ena sediual do ia sekea.”
Davara ai loaloa karana ese taunimanima ia durua nega kwadogi lalonai gabu momo idia lao totona, to hekwakwanai ia vara diba. Nega momo Paulo be bouti amo ena misinari loaloa ia karaia neganai hekwakwanai momo ia davaria.—2 Kor. 11:25.