Hereva Momokani Idia Koua Gaudia Ita Dadaraia!

1. Aposetolo Paulo ese edena sisiba aukana be horoa Keristani taudia dekenai ia gwauraia?

‘IDIA umui tohotohoa lasi,’ aposetolo Paulo be unai hereva ia gwauraia. Iena hereva ena anina be dahaka? Ia gwau: “Inai nega oromana ai idia noho taudia do umui tohotohoa lasi.” (Roma 12:2) Paulo ese Keristani taudia ginigunadia dekenai unai hereva ia torea. Dahaka dainai Dirava ese ia lalokau henia bona ia boiria helaga taudia dekenai Paulo be unai sisiba aukana ia gwauraia?​—Roma 1:7.

2-3. Satani ia ura dahaka ia karaia unai amo Iehova do ita rakatania, bona edena dala ai kara dikadia bona lalohadai dikadia ita dadaraia diba?

² Paulo ese idia ia sisiba henia, badina Keristani taudia haida be Satani ena tanobada ese ia hahedinaraia kara bona lalohadai idia tohotohoa noho. (Efe. 4:17-19) Ita dekenai unai ia vara diba. Inai nega oromana ena dirava, Satani, be unai dala idauidau ia gaukaralaia noho badina ia ura dikadika Iehova ita rakatania. Ia gaukaralaia dala ta be, sibona ena ura laloa bada karana. Danu, ia ese iseda mauri dalana, kastom eiava ita abia edukeisen do ia gaukaralaia iena laloa dalana hegeregerena ita laloa totona.

³ Kara dikadia bona lalohadai dikadia ita koua diba, a? (2 Kor. 10:4) Paulo ese unai ia haerelaia dalana mani ita itaia. Ia gwau: “Badina ai ese Dirava ena diba ida idia hegeregere lasi lalohadai kereredia bona hekokoroku lalohadai ibounai, ai koua noho. Bona ai ese lalohadai ibounai ai guia noho, Keriso idia badinaia totona.” (2 Kor. 10:5) Oibe, Iehova ena heduru amo ita ese kara dikadia bona lalohadai dikadia ita dadaraia diba. Muramura ese gorere ia koua hegeregerena, Dirava ena Hereva ese ita do ia durua Satani ena tanobada ena kara dikadia bona lalohadai dikadia ita dadaraia totona.

“EMUI KARA DO UMUI HAIDAUA NOHO”

4. Hereva momokani ita dibaia neganai, dahaka kara dikadia ita rakatania?

⁴ Baibel amo hereva momokani oi dibaia bona emu lalona oi hadaia Iehova oi hesiai henia matamaia neganai, emu mauri ai oi karaia senisi mani oi laloa. Ita momo be hereva momokani ita dibaia neganai guna ita karaia kara dikadia ita rakatania. (1 Kor. 6:9-11) Ita moale badina Iehova ena heduru dainai unai ita karaia diba!

5. Roma 12:2 ena hereva bamona, ita karaia diba gaudia rua be dahaka?

⁵ To, namo lasi ita laloa iseda mauri ai senisi ma haida do ita karaia lasi. Guna bapatiso ita do abia lasi neganai, kara dikadia momo ita karaia, to namona be hari ita gaukara goada ita idia tohoa kara gunadia ita dadaraia totona. Edena dala ai unai ita karaia diba? Paulo ia gwau: “Inai nega oromana ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho.” (Roma 12:2) Ita karaia diba gau ginigunana be, inai nega oromana eiava inai tanobada ai idia noho taudia ita “tohotohoa lasi.” Gau iharuana be, iseda ‘lalona do ita hamatamataia.’

6. Iesu ena hereva Mataio 12:43-45 ese ita dekenai dahaka ia hadibaia?

⁶ Paulo ese inai hereva hamatamataia, ia gwauraia neganai, ia be ta ena toana hanamoa karana ia herevalaia lasi. (Maua ladana “Iseda Kara Ita Haidaua Momokani Eiava Lasi?” itaia.) To, iseda lalona​—⁠unai be iseda kara, hemami bona ura gaudia​—ita hamatamataia be namo. Unai dainai ita ta ta ese inai henanadai ita henia. Keristani tauna ai lau lao totona, egu mauri ai lau karaia senisi be ma haida hamoalea totona lau karaia eiava egu lalona ibounai ida lau karaia? Unai senisi karaia dalana be Iesu ena hereva Mataio 12:43-45 ese ia hahedinaraia. (Duahia.) Unai siri ese ita dekenai mai anina bada hereva momokani ia hadibaia: Lalohadai dikadia dadaraia sibona be hegeregere lasi, to namona be Dirava ese ia ura henia karadia eiava ia moalelaia gaudia sibona ita laloa.

“EMUI LALONA DO UMUI HAMATAMATAIA NOHO”

7. Edena dala ai iseda lalona ita hamatamataia diba?

⁷ Iseda kara gunadia ita rakatania diba, a? Baibel ia gwau: “To emui lalona do umui hamatamataia noho be namo. Bona kara matamata umui atoa be namo. Unai kara be Dirava ena ura hegeregerena ia vara, ia be maoromaoro momokani bona abidadama dalana ia badinaia.” (Efe. 4:23, 24) Momokani, iseda kara gunadia ita rakatania diba, to unai ita karaia totona be mai ena hekwarahi. Lalohadai dikadia bona kara kereredia ita dadaraia sibona be hegeregere lasi. To namona be iseda ‘lalona do ita hamatamataia.’ Anina be iseda ura gaudia, iseda lalohadai bona iseda kara ita haidaua. Unai ita karaia totona nega ibounai ita hekwarahi be namo.

8-9. Tadikaka ta ena ekspiriens ese edena dala ai ia hahedinaraia ta be ena kara ia haidaua diba?

⁸ Mani tadikaka ta ena ekspiriens ta ita laloa, guna ia be dagedage tauna. Inuinu kekero bona heatu karana ia rakatania murinai, ia hegeregere bapatiso ia abia totona bona ena komiuniti ai ia be tau namona ta. To ia bapatiso murinai ia dekenai kara ta ia vara. Dina ta kekero tauna ta be ena ruma dekenai ia mai bona ia ura ia do ia heatu henia. Matamanai, tadikaka be unai ia dadaraia. To unai tauna be Iehova ena ladana ia gwauraia dika neganai, iseda tadikaka be ia badu dikadika. Ena ruma amo ia raka-lasi bona unai tauna ia botaia dikadika. Dahaka dainai unai bamona ia karaia? Herevana ena stadi tauna ese ia durua dagedage karadia ia dadaraia totona, to ia be ena lalona ia hamatamataia lasi eiava ena kara ia haidaua lasi.

⁹ Unai tadikaka be ia hesiku lasi to ia gaukara goada ena kara ia haidaua noho totona. (Aon. 24:16) Elda taudia ese ia idia durua dainai iena hetura karana Iehova ida ia hanamoa lou. Daudau lasi murinai, ia be elda tauna ai ia lao. To, nega ma ta ai, Kingdom Hall murimuri kahanai, guna ia dekenai ia vara hekwakwanai ma ia vara lou. Kekero tauna ta be ia ura elda ta ia botaia. Iseda tadikaka be dahaka ia karaia? Ia badu lasi to mai manau ida unai kekero tauna ia hereva henia namonamo bona ia durua iena ruma dekenai ia giroa lou totona. Dahaka dainai iseda tadikaka be unai tauna ia botaia lasi? Badina iena lalona ia hamatamataia eiava ena kara ia haidaua. Ia be manau tauna bona ia dagedage lasi. Ena kara ese Iehova ia hanamoa!

10. Dahaka ita karaia unai amo iseda kara ita haidaua diba?

¹⁰ Iseda mauri ai ita karaia senisi be do idia vara haraga lasi. To lagani momo lalonai ita “hekwarahi” be namo. (2 Pet. 1:5) Namo lasi ita laloa lagani momo lalonai Iehova ita hesiai henia dainai unai bamona senisi ita karaia be anina lasi. To namona be ita gaukara goada iseda kara ita haidaua totona. Unai senisi do ita karaia totona, ita do idia durua daladia do ita herevalaia.

ISEDA LALONA ITA HAMATAMATAIA DALANA

11. Guriguri karana ese edena dala ai ita ia durua iseda lalona ita hamatamataia totona?

¹¹ Mai anina bada gauna ginigunana be, guriguri karana. Salamo torea tauna ena guriguri dalana ita tohotohoa diba. Ia gwau: “Dirava e, lauegu kudouna lalonai laloa goevagoeva do oi havaraia.” (Sal. 51:10) Iseda lalona ita hamatamataia karana ita laloa bada be namo bona namona be heduru totona Iehova ita noia. Edena bamona ita diba Iehova ese ita do ia durua iseda kara ita haidaua totona? Iehova ese Esekiela ena nega ai idia noho Israela taudia dekenai ia karaia gwauhamatana ese ita ia hagoadaia diba. Iehova ia gwau: “Idia ese edia lalodia do idia hatamonaia . . . bona laloa manada idia dekenai do lau henia.” (Ese. 11:19) Iehova ia ura Israela taudia ia durua edia kara idia haidaua totona, bona unai hegeregerena ia ura ita ia durua danu.

12-13. (a) Salamo 119:59 ena hereva bamona, dahaka gaudia ita laloa dobu be namo? (b) Edena henanadai be sibona dekenai ita henia diba?

¹² Mai anina bada gauna iharuana be, laloa dobu karana. Dina ta ta ai Dirava ena Hereva ita duahia neganai, namona be nega ita atoa ita duahia gaudia ita laloa dobu unai amo do ita diba edena bamona lalohadai bona hemami do ita haidaua. (Salamo 119:59 duahia; Heb. 4:12; Iam. 1:25) Danu, tanobada ena lalohadai dainai idia vara lalohadai eiava kara dikadia dadaraia daladia ita diba be namo. Mai momokani ida iseda manoka gaudia ita dibaia bona ita gaukara goada unai ita haidaua totona.

¹³ Hegeregere, sibona oi nanadaia: ‘Egu lalona dekenai mama lalohadai haida lau abia, a?’ (1 Pet. 2:1) ‘Egu mauri dalana, diba bona egu moni be momo dainai lau be ma haida lau hereaia, a?’ (Aon. 16:5) ‘Egu kohu be momo dainai ma haida eiava tano idau amo idia mai taudia lau laloa maragi, a?’ (Iam. 2:2-4) ‘Satani ena tanobada ese ia hahedinaraia gaudia lau ura henia bada, a?’ (1 Ioa. 2:15-17) ‘Dagedage karadia bona matabodaga karadia idia hahedinaraia moale karadia lau moalelaia, a?’ (Sal. 97:10; 101:3; Amo. 5:15) Unai henanadai edia haere oi dibaia neganai, do oi laloparara emu mauri ai dahaka senisi do oi karaia be namo. Iseda mauri ai idia noho kara bona lalohadai dikadia ita dadaraia neganai, iseda guba Tamana do ita hamoalea.​—Sal. 19:14.

14. Dahaka dainai iseda turadia ita abia hidi namonamo be mai anina bada?

¹⁴ Dala ihatoina be, iseda turadia ita abia hidi namonamo karana be mai anina bada. Herevana ita diba eiava lasi, to iseda turadia ese ita idia hakaua kerere diba. (Aon. 13:20) Moni gaukara gabuna ai eiava sikuli gabuna ai, iseda turadia ese ita do idia hakaua kerere diba Dirava ese ia moalelaia lasi karadia ita karaia totona. To, iseda Keristani heboudia ai tura namodia ita davaria diba. Idia ese ita idia hagoadaia unai amo ita “lalokau heheni bona kara namodia ita karaia.”​—Heb. 10:24, 25.

“ABIDADAMA LALONAI DO UMUI GOADA”

15-16. Edena dala ai Satani ia ura iseda lalohadai ia haidaua?

¹⁵ Namona be ita laloatao, Satani ia ura iseda lalohadai ia haidaua. Unai dainai hahediba hereva koikoidia ia gaukaralaia, Baibel ai ia noho hereva momokani ia hunia totona.

¹⁶ Satani be Eden umana ai Heva ia nanadaia dalana be ita dekenai do ia gaukaralaia danu: Hegeregere, “Momokani, uma gabu ena au huahua ta ania lasi taravatu be Dirava ese ia atoa, a?” (Gen. 3:1) Satani ese ia gunalaia tanobada ai, taunimanima be nega momo inai bamona henanadai idia gwauraia: ‘Momokani Dirava be tatau rua eiava hahine rua idia headava karana ia abia dae lasi, a? Momokani Dirava ia ura lasi Krismas eiava vara dinadia oi moalelaia, a? Momokani emu Dirava ia ura lasi rara oi abia, a? Bema iseda ruma bese ai ta be kongrigeisen amo idia atoa siri, momokani lalokau Diravana be ia ura lasi unai tauna oi bamoa, a?’

17. Ta be ita abia dae gaudia totona ia henanadai neganai dahaka do ita karaia, bona Kolose 2:6, 7 ese edena bamona ita ia durua diba?

¹⁷ Namona be Baibel amo ita dibaia gaudia ita abia dae momokani. Bema unai henanadai edia haere ita diba lasi, anina be ita abia dae gaudia dekenai ita daradara. Unai bamona daradara karana ese iseda lalohadai bona abidadama ia hadikaia diba. Unai dainai dahaka ita karaia be namo? Dirava ena Hereva ese ita ia hadibaia, namona be iseda lalona ita hamatamataia, unai amo ita sibona ese do ita hamomokania “Dirava ena ura be ia namo, ia ese ia abia dae bona ia goevadae.” (Roma 12:2) Baibel ita stadilaia hanaihanai karana amo do ita hamomokania ita dibaia gaudia be hereva momokani. Danu, do ita abia dae momokani Iehova ena taravatu be maoro. Bena, au ta mai ena ramuna goadana bamona, iseda ‘abidadama lalonai do ita goada noho.’​—Kolose 2:6, 7 duahia.

18. Edena dala toi ese ita do idia durua Satani ena tanobada amo idia mai koua gaudia ita dadaraia totona?

¹⁸ Emu abidadama lalonai oi goada noho totona oi hekwarahi be namo, ta be oi totona unai do ia karaia lasi. Unai dainai namona be iseda lalona ita hamatamataia eiava iseda kara ita haidaua noho. Hanaihanai ita guriguri, Iehova ena lauma helaga ena heduru totona. Namona be ita sibona iseda lalohadai bona kara ita tahua namonamo bona ita laloa dobu. Tura namodia oi abia hidi, badina idia ese oi do idia durua emu kara oi haidaua totona. Unai dala toi oi badinaia neganai, “Dirava ena diba ida idia hegeregere lasi lalohadai kereredia bona hekokoroku lalohadai ibounai” oi koua diba.​—2 Kor. 10:5.