Emu “Abidadama Ena Kesi Badana” Oi Dogoatao Noho, A?

1-2. (a) Efeso 6:16 ena hereva bamona, dahaka dainai “abidadama ena kesi badana” ita abia be namo? (b) Edena henanadai do ita herevalaidia?

OI BE mai emu “abidadama ena kesi badana,” a? (Efeso 6:16 duahia.) Oibe. Kesi badana ta ese tauanina ibounai ia gimaia bamona, emu abidadama ese matabodaga karadia, dagedage bona inai nega oromana ena kara dika idauidau amo oi ia gimaia diba.

² To, ita be “dina gabediai” ita noho dainai, gau momo ese iseda abidadama do ia tohoa diba. (2 Tim. 3:1) Edena dala ai emu abidadama ena kesi oi sekea, unai amo do oi diba ia goada noho? Bona edena dala ai emu abidadama oi hagoadaia diba? Mani unai henanadai edia haere ita tahua.

EMU KESI OI SEKEA NAMONAMO

3. Soldia taudia be edia kesi dekenai dahaka idia karaia, bona dahaka dainai?

³ Baibel negadiai, soldia taudia edia kesi be leda amo idia karaia. Danu, edia kesi dekenai oela idia atoa unai amo leda do ia noho daudau bona kesi ena auri kahadia do idia rasta lasi. Bema soldia ta ia itaia ena kesi be ia dika, do ia hanamoa, unai amo ia hegaegae diba tuari ma ta ia lao totona. Edena dala ai unai haheitalai ese emu abidadama ia herevalaia?

4. Dahaka dainai emu abidadama ena kesi oi sekea, bona edena dala ai unai oi karaia?

⁴ Idaunegai idia noho soldia taudia bamona, namona be nega ibounai emu kesi oi sekea bona hanamoa, unai amo hanaihanai tuari totona oi noho hegaegae. Ita be Keristani taudia dainai lauma dikadia ida do ita tuari. (Efe. 6:10-12) Ta ese oi totona emu abidadama ena kesi ia hanamoa diba lasi. Edena dala ai oi diba, hahetoho negadia ai oi gini goada diba? Gau ginigunana be guriguri amo Dirava ena heduru oi noia. Bena, Dirava ena Hereva oi gaukaralaia oi ia durua Iena laloa dalana oi badinaia totona. (Heb. 4:12) Baibel ia gwau: “[Iehova] do oi abidadama henia, mai emu kudouna ibounai. Oi sibona oiemu diba do oi abidadama henia lasi.” (Aon. 3:5, 6) Unai oi laloa neganai, oi karaia abia hidi haida mani oi laloa lou? Hegeregere, moni ena hekwakwanai oi davaria, a? Iehova ena gwauhamata Heberu 13:5 dekenai oi laloa, a? Ia gwau: “Lau ese umui do lau negea lasi, bona umui do lau rakatania lasi momokani.” Unai gwauhamata dainai oi abia dae momokani Iehova ese oi do ia durua, a? Bema oibe, unai ese ia hahedinaraia emu abidadama ena kesi be ia goada.

5. Emu abidadama oi sekea neganai, dahaka do oi diba?

⁵ Reana emu abidadama oi sekea neganai, oi davaria gaudia dainai do oi hoa. Reana emu manoka gaudia haida do oi dibaia. Hegeregere, reana oi laloparara lalohekwarahi momo, koikoi karadia, bona lalomanoka ese emu abidadama idia hadikaia. Bema unai ia vara, edena dala ai emu abidadama do oi hagoadaia?

LALOHEKWARAHI MOMO, LALOMANOKA BONA KOIKOI KARADIA AMO OI NARIA NAMONAMO

6. Lalohekwarahi namodia haida be dahaka?

⁶ Lalohekwarahi haida be namo. Hegeregere, nega haida ita lalohekwarahi Iehova bona Iesu ita hamoalea totona. (1 Kor. 7:32) Kerere badana ta ita karaia neganai, iseda hetura karana Dirava ida ita hanamoa lou totona ita lalohekwarahi. (Sal. 38:18) Danu, ita lalohekwarahi iseda adavana ita hamoalea, bona iseda ruma bese bona tadikaka taihu ita durua totona.​—1 Kor. 7:33; 2 Kor. 11:28.

7. Aonega Herevadia 29:25 ena hereva bamona, dahaka dainai taunimanima ita gari henia lasi?

⁷ Danu, lalohekwarahi momo karana ese iseda abidadama ia hadikaia diba. Hegeregere, reana ita ese aniani bona dabua totona do ita laloa momo. (Mat. 6:31, 32) Unai dainai do ita ura kohu momo ita haboua. Danu, moni do ita ura henia bada. Unai bamona ita karaia neganai, iseda abidadama karana Iehova dekenai do ia manoka, bona iseda hetura karana ia ida do ia dika. (Mar. 4:19; 1 Tim. 6:10) Reana do ita lalohekwarahi momo badina ita ura ma haida ese ita do idia lalonamo henia. Unai dainai taunimanima ese ita idia kirikirilaia eiava dagedage henia neganai do ita gari henidia, bona iseda hetura karana Iehova ida do ita laloa lasi. Unai tarapu lalonai ita moru lasi totona, namona be Iehova ita noia iseda abidadama ia hagoadaia bona goada ia henia unai hahetoho ita haheaukalaia totona.​—Aonega Herevadia 29:25 duahia; Luka 17:5.

8. Ta ese koikoi herevadia ia gwauraia neganai, dahaka do ita karaia?

⁸ Satani be “koikoi ena tamana” dainai, ia ese ia gunalaia noho taudia ia gaukaralaia Iehova bona iseda tadikaka taihu dekenai koikoi herevadia idia halasia totona. (Ioa. 8:44) Hegeregere, aposteit taudia be websait haida, TV bona nius amo Iehova ena orea totona koikoi herevadia idia gwauraia noho. Unai koikoi herevadia be Satani ena peva “mai ena lahi” bamona. (Efe. 6:16) Ta ese ita dekenai unai bamona koikoi herevadia ia gwauraia neganai, dahaka do ita karaia? Ita kamonai lasi be namo! Dahaka dainai? Badina Iehova ita abidadama henia bona iseda tadikaka taihu ita laloa bada. Momokani, ita ura lasi aposteit taudia ita bamoa. Ita ura lasi badina ma haida dainai aposteit taudia ida ita hepapahuahu, ena be idia gwauraia herevadia ese iseda lalona ia veria.

9. Lalomanoka karana dainai dahaka ia vara diba?

⁹ Lalomanoka ese iseda abidadama ia hamanokaia diba. Nega haida hekwakwanai idauidau dainai ita lalomanoka. Unai hekwakwanai ita hamaoromaorodia be namo. To, namo lasi iseda hekwakwanai ita laloa momo. Bema unai bamona ita karaia, Iehova ese ita totona ia gwauhamatalaia gau namodia do ita laloa boio. (Apok. 21:3, 4) Lalomanoka karana dainai iseda goada do ia ore, bona Iehova hesiai henia karana do ita rakatania. (Aon. 24:10) To, ita ura lasi ita dekenai unai bamona ia vara.

10. Taihu ta ese ia torea revareva amo dahaka oi dibaia?

¹⁰ Mani United States ai taihu ta ita laloa. Herevana ena adavana be gorere badana ta ia abia bona ia ese ia naria, to taihu ena abidadama be goada. Hedikwota dekenai ia siaia revareva ai ia gwau: “Emai hekwakwanai be ia bada bona nega haida ai lalomanoka, to emai abidadama be ia goada. Lau moale bada badina Iehova ese dala idauidau ai emai abidadama ia hagoadaia. Unai ese ai ia durua Iehova ai hesiai henia noho, bona Satani ese ia havaraia hahetoho idauidau ai haheaukalaia totona.” Unai taihu ena hereva amo ita diba lalomanoka karana ita hanaia diba! Edena dala ai? Namona be oi laloatao, oi davaria hahetoho be Satani ena gwau-edeede karana dainai idia vara noho. Namona be oi abia dae Iehova ese oi dekenai goada do ia henia. Bona ia henia hakaua hereva namodia oi laloa bada.

11. Iseda abidadama ita sekea totona, edena henanadai ita lalodia be namo?

¹¹ Emu abidadama ia hamanokaia gaudia haida oi diba, a? Hua haida idia hanaia lalonai, lalohekwarahi idia havaraia gaudia oi dadaraia, a? Aposteit taudia ida hepapahuahu bona edia koikoi herevadia kamonai karana oi dadaraia, a? Bona lalomanoka karana oi haheaukalaia, a? Bema oibe, emu abidadama be ia goada noho. To, namona be ita naria namonamo, badina Satani be dala ma haida ai ita do ia tuari henia. Mani unai dala ta ita herevalaia.

KOHU MOMO TAHUA KARANA DEKENAI OI NARIA NAMONAMO

12. Kohu momo tahua karana dainai dahaka ia vara diba?

¹² Kohu momo tahua karana ese iseda abidadama do ia hamanokaia bona iseda hesiai gaukara do ita laloa bada lasi. Aposetolo Paulo ia gwau: “Tuari tauna be mauri ena bisinesi karadia idauidau lalonai do ia vareai lasi, badina ia ura . . . ena ladana ia atoa tauna ena lalonamo ia abia.” (2 Tim. 2:4) Momokani, guna Roma edia soldia be bisinesi idia karaia lasi. Dahaka ia vara diba bema soldia ta be unai hakaua herevana ia badinaia lasi?

13. Dahaka dainai soldia be bisinesi idia karaia lasi be namo?

¹³ Mani inai haheitalai oi laloa. Soldia haida be daba ena treinini ai kaia gaukaralaia dalana idia dibaia, to soldia ta be ia noho lasi. Unai soldia be taoni dekenai ia lao, aniani hoihoilaia ena bisinesi ia hamatamaia totona. Hanuaboi ai, soldia taudia be edia tuari kohudia idia sekea bona edia kaia idia segea. To aniani ia hoihoilaia soldia be dabai do ia hoihoilaia aniani ia hegaegaelaia noho. Murina dinana ai, idia diba lasi horana ai, edia inai taudia ese idia tuari henia. Edena soldia be tuari totona ia hegaegae bona ena biaguna ese do ia lalonamo henia? Bona bema oi be unai tuari lalonai oi noho, oi ura daika be emu badinai do ia gini, treinini ia abia soldia, eiava ia hegaegae lasi soldia?

14. Ita be Keriso ena soldia dainai dahaka be mai anina bada?

¹⁴ Soldia namodia bamona, ita ura iseda tuari biagudia Iehova bona Keriso edia lalonamo ita abia. Unai ese Satani ena tanobada ese ia hahedinaraia gaudia ibounai ia hereaia. Namona be iseda nega bona goada be hegeregere Iehova ita hesiai henia totona, bona iseda abidadama ena kesi bona Dirava amo ita abia tuari dabua ibounai be idia namo.

15. Paulo be dahaka ia gwau, bona dahaka dainai?

¹⁵ Namona be hanaihanai ita gima noho! Dahaka dainai? Badina aposetolo Paulo ia gwau “idia ura idia taga taudia . . . haida ese abidadama idia rakatania.” (1 Tim. 6:9, 10) Inai hereva “idia rakatania” ese ia hahedinaraia, kohu tahua karana ese ita do ia hakaua kerere diba. Bena ‘ura dikadia do ita abia bona kavakava karadia do ita karaia.’ Namo lasi unai gaudia ita laloa momo, to namona be ita laloatao Satani ese unai bamona tuari gaudia ia gaukaralaia iseda abidadama ia hamanokaia totona.

16. Mareko 10:17-22 ese ita ia durua, edena henanadai ita laloa totona?

¹⁶ Reana iseda moni be hegeregere gau momo ita hoia totona. To, do ita gaukaralaia momo lasi gauna ta ita hoia be kerere, a? Reana lasi. Mani inai henanadai oi laloa: Ena be gau ta ita hoia diba, to iseda nega bona goada be hegeregere ita hoia gauna ita naria totona, a? Danu, iseda kohu do ita ura henia bada, a? Kohu momo laloa bada karana dainai ita ese Iesu ena boiboi herevana ia dadaraia tauna ena kara ita tohotohoa, a? (Mareko 10:17-22 duahia.) Namona be kohu momo lasi maurina ita noholaia, bona iseda nega bona goada ita gaukaralaia Dirava ena ura ita karaia totona!

EMU ABIDADAMA ENA KESI OI DOGOATAO AUKA

17. Dahaka ita laloatao be namo?

¹⁷ Namona be ita laloatao, ita be tuari lalonai ita noho bona dina ta ta ai tuari totona ita hegaegae be namo. (Apok. 12:17) Iseda tadikaka taihu ese iseda abidadama ena kesi idia huaia diba lasi. Ita ta ta ese iseda abidadama ena kesi ita dogoatao auka be namo.

18. Dahaka dainai Baibel negadiai soldia taudia be edia kesi idia dogoatao auka?

¹⁸ Baibel negadiai, soldia ta be mai gari lasi ida ia tuari neganai hahenamo ia abia. To, bema tuari lalonai ena kesi ia haboioa bena ena hanua dekenai ia giroa lou, do ia hemarai. Roma ena histori torea tauna, Tacitus ia gwau: “Bema soldia ta be ena kesi ia rakatania, unai be hemarai bada gauna.” Unai badina dainai soldia be edia kesi idia dogoatao auka.

19. Edena dala ai iseda abidadama ena kesi ita dogoatao auka noho?

¹⁹ Iseda abidadama ena kesi ita dogoatao auka diba, bema hanaihanai Keristani heboudia ita lao bona ma haida dekenai Iehova ena ladana bona ena Basileia ita herevalaia. (Heb. 10:23-25) Danu, dina ta ta ai Dirava ena Hereva ita duahia bona iseda mauri ai iena sisiba bona hakaua daladia ita badinaia. (2 Tim. 3:16, 17) Bena, Satani ena tuari gauna ta ese ita do ia hadikaia diba lasi. (Isa. 54:17) Iseda “abidadama ena kesi badana” ese ita do ia gimaia, unai amo mai gari lasi ida iseda tadikaka taihu ida ita gaukara hebou. Bona dina ta ta ai do ita hekwarahi iseda abidadama ita hagoadaia totona. Mai anina bada gauna be Iesu ese Satani mai ena demoni ia haoredia neganai, ita be mai moale ida Iesu ena kahanai do ita gini.​—Apok. 17:14; 20:10.