Sivarai Namona Harorolaia—Taunimanima Idauidau Dekenai
1 Haroro gaukara ita karaia neganai, ita ura bada ita haroro henidia taudia edia kudouna ita hamarerea. Aposetolo Paulo be unai kara ia diba momo. Bible ese ia hahedinaraia taunimanima momo ia durudia noho ela bona bapatiso idia abia, bona kongregesen momo ia haginidia danu.
2 Edena bamona dala namona ai unai ia karaia diba? Ia karaia dalana be 1 Korinto 9:22, 23 dekenai ia gwauraia, bona iena kara ita tohotohoa neganai do ita kwalimu. Ia gwau: “Lau be taunimanima idauidau ibounai edia mauri dalana dekenai lau halaoa, dala idauidau ibounai dekena amo haida do lau veria mauri totona.” Ia haroro henidia taudia, Iuda taudia bona idau bese taudia, edia lalohadai hegeregerena ia haroro henidia.
3 Iena haroro dalana ia haidaua, ia haroro henidia taudia ta ta edia namo havaraia totona. Unai dala amo idia kamonai henia. (Her. 25:11) Bema Paulo ena kara ita tohotohoa, iseda haroro gaukara ese anina bada do ia havaraia.
ITA HEGAEGAE GUNA
4 Pablisa haida be haroro gaukara idia karaia gwauraia neganai, edia lalona dekenai idia hegaegae, taunimanima idauidau, hegeregere tatau, hahine, memero kekeni, buruka taudia, Katolik taudia, Dirava abidadama henia lasi taudia bona ma haida danu, be dala idauidau ai idia haroro henidia totona. Ruma tauna ena lalona ania herevadia idia hegaegaelaia, ena lalona habadua herevadia idia laloa hegaegae lasi. Idia hegaegae, idia henia toho bukana ena rau idauidau hahedinaraia totona, unai amo ruma tauna ena lalona do ia parara, unai buka ese do ia durua momokani.
5 Hari hua lalonai Mauri Hanaihanai buka do ita hariharilaia. Bema ruma tauna be tanobada dekenai idia vara gaudia dainai ia laloa momo, namona be Mauri Hanaihanai bukana ena rau 99 bona 100 edia hereva ita kikilaia. Memero kekeni ita haroro henidia neganai, namona be rau 11-13 edia laulau ita herevalaia.
HEREVA IDAUIDAU AMO ITA HARORO
6 Taunimanima idauidau ita haroro henidia neganai, namona be idia danu ita heai lasi, to hereva namodia sibodia, idia abia dae diba herevadia unai, ita herevalaia be namo. Reana ruma tauna ta oi davaria, bona ia gwau: “Lau be Katolik tauna bona dubu dekenai lau lao vadaeni. Lau ura lasi egu tomadiho lau haidaua.” Helai taudia oi nanadaia, idia be ruma tauna dekenai edena bamona haere do idia henia. Bena murinai haheitalai do oi henia, haere henia dalana tamona oi hahedinaraia totona.
Ruma Tauna: Lau be Katolik tauna bona lau ura lasi egu tomadiho lau haidaua.
Pablisa: Lau moale oiemu tomadiho dalana oi gwauraia dainai. Hari inai negai taunimanima momo be tomadiho dalana ta idia abia dae lasi. Lagani haida gunanai Pope ese Papua New Guinea ia vadivadi henia neganai, Katolik taudia momo idia moale bada herea.
Ruma Tauna: Oibe, ia vadivadi neganai lau danu lau moale bada.
Pablisa: Io, to reana gau ta ita ibounai ita laloa. Unai be ‘Lohiabada ena Guriguri,’ bona ita gurigurilaia danu. Dirava ena Basileia sibona ese kara dika bona taravatu utua karana ia hadokoa diba, ani?
Ruma Tauna: Oibe, unai bamona heduru ita abia be namo.
Pablisa: Iesu ese iseda nega dikana ia perovetalaia. Mani, lau ura iena hereva Mataio 24:7 dekenai lau duahia. (Ia duahia.) Ta be inai nega dikana ia perovetalaia sibona lasi, to ia hahedinaraia haida be do idia roho mauri danu. Oi ura Iesu ena hereva, siri 13 dekenai, oi duahia?
7 Mani 1 Korinto 9:19-21 ita duahia. Unai siri ia hahedinaraia aposetolo Paulo ia laloa namonamo guna, ia diba ia haroro henidia taudia edia lalohadai be dahaka, bena unai hegeregerena ena haroro herevana ia haidaua, idia ta ta ia haroro henidia namonamo totona. Bema iena kara ita tohotohoa, iseda haroro gaukara ese anina bada do ia havaraia, bona Iehova ena hesiai gaukara do ita moalelaia bada, unai amo iseda teritori lalonai idia noho taudia edia namo be mai eda lalona ibounai danu ita tahua noho.