Basileia Harorolaia Gaukarana Ita Hanamoa Daladia Haida
1 Hari inai negai iseda haroro gaukara be mai anina bada herea. Taunimanima ese sivarai namona idia kamonai neganai bema idia abia dae do idia mauri to bema idia abia dae lasi, do idia mase. (1 Pet. 4:5, 6, 17; Apok. 14:6, 7) Unai dainai, namona be hanaihanai dala ita tahua iseda Basileia haroro gaukarana do ita hanamoa totona. Edena dala haida amo ita hanamoa diba?
2 Hegaegae Namonamo Guna: Hari hua ena Iseda Basileia Gaukara pepana amo emu teritori dekenai taunimanima momo do idia ura kamonai henia kiki herevana ta oi abia hidi. Gau badana be oi herevalaia gaudia be oiemu gabu dekenai idia vara gaudia. Eiava oi sibona oi ura henia kiki herevana ta do oi hegaegaelaia, reana guna unai hereva bona Baibel ena siri haida oi gaukaralaidia dainai oi diba idia namo. Namona be emu hamatamaia herevana ese taunimanima edia lalona ia veria. (Buka Helaga Herevalaia bukana, rau 9-17 itaia.) Reana oi hegaegae ruma tauna dekenai lalona veria henanadai ta do oi henia totona, eiava do oi nanadaia hanua dekenai ia vara sivaraina ta dekenai iena lalohadai be dahaka. Kiki herevana oi lalohadailaia namonamo murinai, namona be emu ruma bese tauna ta eiava pablisa ma ta ida oi karaia toho, bena emu kiki herevana oi hanamoa diba dalana oi ia hadibaia diba.
3 Taunimanima Ida Oi Kiki Hebou: Iseda gaukara ena badina be ita ura mai anina bada sivaraina ita gwauraia hedinarai. Unai ita karaia diba bema kamonai tauna ida anina bada gaudia ita kikilaia. Bema ruma tauna ese iseda hereva ia abia dae lasi eiava sibona ena lalohadai ia gwauraia, namona be ena hereva ita kamonai henia namonamo. Iena hereva ese oi do ia durua bena oi diba haere henia totona edena dala ai emu helaro Baibel amo do oi gwauraia hedinarai diba. (1 Pet. 3:15) Bema iena lalohadai be Baibel ena lalohadai hegeregerena lasi, reana mai emu hemataurai danu do oi gwau: “Taunimanima momo be oi hegeregerena idia laloa. To, unai sivarai dekenai lalohadai ma ta ia noho.” Bena hamomokania siri namona ta do oi duahia, bona iena lalohadai unai siri dekenai ia gwauraia neganai oi kamonai henia.
4 Oi Haidaua Diba Sediual ta Oi Karaia: Ena be oi hegaegae namonamo, to bema taunimanima oi hereva henidia lasi ia be anina lasi. Hari inai negai, taunimanima edia ruma dekenai ita lao vadivadi neganai vaia momo herea idia noho lasi. Bema unai be momokani oiemu teritori dekenai, namona be oiemu sediual oi haidaua toho bona taunimanima momo idia noho negana lalonai ruma-ta-ruma-ta gaukara oi karaia. Reana do oi davaria Saturday bona Sunday oi vadivadi henidia be ia namo; reana ma haida be Monday ia lao Friday oi davaridia diba bema adorahi kahanai, dina ia do diho lasi neganai, oi vadivadi henidia. Gabu ma haida dekenai pablisa taudia be holide dinadia dekenai idia haroro be namo badina ruma dekenai taunimanima momo idia davaridia. Unai holide negadiai taunimanima momo idia laga-ani bona reana idia ura kiki hebou. Namona be emu hamatamaia herevana be mai anina unai holide karana dekenai bona murinai oi hakapua Baibel ena sivarai ta dekenai.
5 Oi Kikilaia Herevana Ena Namo Oi Tahua Namonamo: Ruma ta ta iboudiai oi rakatanidia neganai, sibona dekenai oi henanadai: ‘Ruma tauna ena kudouna lau hamarerea, a? Ena lalona lau veria ena lalohadai ia herevalaia totona a, bona ena hereva lau kamonai henia namonamo, a? Mai hemataurai ida lau haere henia, a? Haere henia totona lau ese dala namona amo lau karaia, a?’ Nega ta ta dekenai ia manada pablisa ta eiava painia ta ida umui gaukara hebou be heduru namona; namona be kiki herevana ia gwauraia dalana oi kamonai henia namonamo, bena unai amo emu haroro gaukara do oi hanamoa diba.
6 Bema mai emu aonega danu emu haroro gaukara oi karaia, oi ese Basileia ena hereva momokani harorolaia gaukarana amo “oi sibona mauri do oi davaria, bona oi idia kamonai taudia danu mauri do idia davaria.”—1 Tim. 4:16; Her. 22:29.