Kongregesen Buka Stadi amo Tadikaka Ita Durudia
1 Keristen ginigunadia be edeseniai idia hebou Iehova idia tomadiho henia totona? Aposetolo Paulo ia hahedinaraia nega momo tadikaka bona taihu edia ruma dekenai idia hebou.—Roma 16:5; Filemona 2.
2 Hari inai negai, tano momo lalonai kongregesen be tadikaka edia ruma dekenai idia hebou. Badina be dahaka? Badina be tano momo lalonai iseda gaukara idia taravatulaia. Unai tano haida oi diba, a? To tano haida lalonai iseda gaukara idia taravatulaia lasi bona Kingdom Hall idia habadaia eiava matamatadia idia haginia, badina taunimanima momo be hebou dekenai idia mai. Unai tano haida oi gwauraia diba, a?
3 Kongregesen ibounai lalonai hebou haida idia karaia tadikaka edia ruma dekenai. Edena hebou? Kongregesen ena Buka Stadi. Badina be dahaka unai be karaia dalana namona ta? Badina Buka Stadi dekenai idia lao henia taudia be ‘ruma bese’ ta bamona ai idia lao. Stadi ia naria tauna be tamana ta bamona, bona ia ura buka stadi dekenai idia mai taudia ibounai ia diba. Hereva Lada-isidia 27:23 ese edena bamona ia hahedinaraia stadi naria tauna be unai bamona ia karaia be namo?
TADIKAKA TA TA IBOUNAI OI LALODIA
4 Ruma bese tauna ta be aniani negana dekenai ia hedinarai lasi neganai, tamana bona sinana idia laloa momo, ani? Reana ta idia siaia unai tauna davaria totona. Unai hegeregerena, bema tadikaka ta be buka stadi ena ‘aniani’ dekenai ia mai lasi, ita danu ita laloa momo, ani?
HAHEITALAI: (Buka stadi grup ena tadikaka rua idia kiki hebou.)
Tomu: Bili e, varani hanuaboi buka stadi dekenai oi mai lasi dainai lau laloa momo. Oi diba buka stadi taudia be ruma bese bamona, bona oi be iseda ‘ruma bese’ tauna ta, unai dainai oi lau laloa momo.
Bili: Lau moale lau oi laloa momo dainai, Tomu. Oiemu hereva dainai egu mamina ia namo. Maleria gorere lau abia, unai dainai ruma dekenai lau noho bona bilankesi amo sibona lau koua.
Tomu: Madi, unai be namo lasi Bili. Hari oiemu hemami be ia namo, a?
Bili: Oibe, kwinin lau ania bona egu hemami be ia namo hari. Lau ura lasi buka stadi lau reaia, badina oi hereva bamona, ita be ruma bese bamona bona tadikaka ta be hebou ta ia reaia neganai ita laloa momo.
Tomu: Oibe, ita ibounai ita hekwarahi Galatia 6:10 ena sisiba ita badinaia totona. Egu Bible ia noho, do lau duahia. (Ia duahia.)
Bili: Tanikiu Tomu. Lau moale badina lau diba lau oi laloa momo dainai. Vaira wiki ena buka stadi dekenai do ita hedavari lou!
OIEMU KARA NAMO
5 Oi be dala idauidau ai buka stadi oi hanamoa diba. Hegeregere, buka stadi dekenai oi mai neganai, namona be dabua namona oi karaia, Kingdom Hall dekenai oi karaia bamona. Unai kara amo oi hahedinaraia Iehova bona emu tadikaka bona taihu oi matauraidia. Namona be oiemu kara namo amo tadikaka bona taihu oi durudia idia danu ese dabua namona idia karaia totona. Danu, gau badana be hanaihanai nega korikori dekenai oi ginidae, bena hebou do oi hadikaia lasi.
6 Tadikaka ibounai idia hegaegae namonamo neganai, buka stadi do ia heau namonamo. Haere ibounai oi makaia, a? Sibona emu hereva dekenai haere oi henia, a? Stadi ena siri ibounai oi duahia guna bena hebou dekenai oi herevalaia, a? Oi be unai henanadai ibounai dekenai oi haere “Oibe,” a? Unai be namo. Bema unai kara haida oi karaia lasi, namona be harihari unai kara oi karaia hamatamaia.
7 Buka stadi dekenai idia lao hanaihanai taudia idia diba Iehova ese unai hebou ia hanamoa. Buka stadi dekenai heduru oi abia diba, bona lauma dalana ai ma haida oi durudia diba danu. Namona be Kongregesen ena Buka Stadi dekenai oi lao hanaihanai, badina oi be unai ‘ruma bese tauna ta,’ bona oi lao lasi neganai, tadikaka ese oi do idia laloa momo!