Kongregesen Ena Buka Stadi
Kahana 4: Hagoadaia Heheni Noho
1 Kongregesen Buka Stadi grup taudia ta ta iboudiai be ma haida idia durudia diba lauma dalana dekenai idia tubu totona. Ita ibounai ita ura ‘iseda ekalesia varavara taudia edia lalona do ita hagoadaia, oibe, inai kara do ita habadaia. Badina be Lohiabada ena Dina be kahirakahira do ia ginidae.’—Heb. 10:24, 25.
2 Ita Heduru Heheni: Iboudiai be buka stadi dekenai idia gaukara diba hetura heheni karana idia habadaia totona. Ita ta ta ibounai be ma haida ita laloa neganai, grup taudia edia hetura karana ia habadaia. Galatia 6:10 dekenai ita ia hamaoroa “taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea be namo.” Haheitalai be, buka stadi grup taudia haida be gorere dainai hebou dekenai idia mai lasi neganai, unai oi laloa, a? Reana telefon amo oi hereva henidia eiava oi vadivadi henidia diba. Buka stadi grup lalonai unai bamona ita karaia neganai, tadikaka idia hetura heheni karana ia habadaia.
3 Haida be dina ibounai metau idia davaria dainai, ruma bese ena gaukara dainai, eiava ma hekwakwanai haida dainai hagoadaia hereva idia abia be namo, a? Oi gaukara goada hebou dekenai ma haida oi hanamoa sibona lasi to idia ida oi herevahereva hebou totona danu. Haida be reana idia hemarai to idia ura ma haida danu idia herevahereva bona ta ese idia hereva henia neganai do idia haere. (uw rau 137-8) Aposetolo Paulo ese Keristen taudia ia hamaorodia, ia gwau: “Gari taudia umui hagoadaia, bona manoka taudia umui durua. Bona taunimanima ibounai dekenai do umui lalo namo henidia.” (1 Tes. 5:14) Bema ta ia gorere eiava ia lalo-hesiku, turana haida idia vadivadi henia eiava idia durua neganai ia be goada ia abia diba! Nega momo bema ta ia diba ia idia laloa, unai sibona be hegeregere.
4 Danu, ita ura haroro gaukara dekenai grup ena gaukara dalana ita badinaia. Namona be grup taudia idauidau ida ita gaukara hebou. (2 Kor. 6:11-13; 12:15) Reana nega haida buka stadi naria tauna ese ita ia noia ma taunimanima ta ita durua totona. Unai neganai, dahaka do ita karaia? Pablisa taudia bona pioneer taudia be haroro gaukara bona hahediba taudia karaia gaukara idauidau dekenai idia gaukara hebou neganai, unai ese buka stadi grup ia hagoadaia bada.
5 Ita Sibona be Haheitalai Namona Ita Karaia: Ma dala haida dekenai buka stadi gaukara dalana oi durua diba. Oi be haheitalai namona oi karaia be gau badana. Hegeregere, buka stadi dekenai oi mai neganai, bema Kingdom Hall hebou dekenai oi lao neganai dabua oi karaia dalana oi badinaia, unai amo hemataurai oi hahedinaraia. Oi be dabua idia karaia namonamo lasi taudia dekenai haheitalai namona oi karaia. Hebogahisi dainai ita ura wiki iboudiai nega korikori ai ita ginidae buka stadi hebouna ita hadikaia lasi totona.
6 Ena lalokau amo Iehova ese Kongregesen Buka Stadi ia henia ita ia durua totona. (Isa. 40:11) Ita ta ta be heduru ita abia diba bona danu ma haida ita durudia diba lauma dalana dekenai edia lalona idia matamata lou totona. Namona be unai gaukara dalana ita durua neganai, ita ibounai be ita “ta ta dekenai goada do [ita] henia, bona durua [ita] henia.”—1 Tes. 5:11.
[Questions]
1. Edena dala ai buka stadi grup taudia ta ta iboudiai, matamata taudia danu, be grup taudia ma haida idia durudia diba? Heberu 10:24, 25 dekenai ita ia hagoadaia, hebou dekenai dahaka ita karaia totona?
2. Galatia 6:10 duahia. Edena dala ai iseda buka stadi grup dekenai unai sisiba ita badinaia diba?
3. Edena dala ai (a) hemarai taudia, (b) lalo-hesiku taudia, (c) bona gorere taudia iseda buka stadi grup dekenai ita durudia diba?
4. Haroro gaukara bona hahediba taudia karaia gaukarana dekenai edena dala ai ita heduru heheni diba?
5. (a) Kongregesen Buka Stadi totona dabua ita karaia neganai, edena dala ai haheitalai namona ita karaia diba? (b) Buka stadi dekenai nega korikori ai ita ginidae neganai dahaka kara ita hahedinaraia?
6. Kongregesen Buka Stadi dalana ita durua neganai, edena dala ai 1 Tesalonika 5:11 ena sisiba ita badinaia namonamo diba?