Iseda Kongregesen Buka Stadi Naria Tauna Ida Ita Gaukara Hebou
1 Kongregesen Buka Stadi be gau badana badina ita ia durua sivarai namona ita harorolaia namonamo totona. Society ena buka ta bona Baibel stadilaia totona grup be idia maragi, ruma bese ta bamona do idia moale hebou totona. Iseda haroro gaukara do ita hanamoa totona unai grup maragidia be namo ita idia hadibaia totona. Buka stadi dekena amo ita ta ta iboudiai be hagoadaia hereva bona heduru ita abia diba. Edena bamona buka stadi naria tauna ida ita gaukara hebou diba bena unai amo buka stadi amo namo do ita davaria?
2 Mai Goada danu Haroro Gaukara Ita Karaia: Buka stadi naria tauna ena maduna badana ta be grup taudia iboudiai ia durudia mai goada danu haroro gaukara idia karaia totona. Unai dainai, ita laloatao totona, Hesiai Gaukara Karaia Totona Ita Hegaegae bukana, rau 44 ai, ia gwau “nega iboudiai mai ena ura namona bona mai goadana danu ia gaukara neganai, idia lao haroro tadikakadia be ia idia tohotohoa.” Nega ta ta ai, buka stadi naria tauna be sibona ena ruma bese taudia danu do idia haroro hebou, to ena nega hegeregerena, mai moale danu ia ura ma haida ia bamodia haroro gaukara dekenai. Haroro gaukara totona hebou ia karaia neganai, hanaihanai oi lao diba, a? Bema unai bamona oi karaia buka stadi naria tauna bona idia lao haroro pablisa taudia do idia moale.
3 Mai goada danu haroro gaukara do idia karaia totona, tadikaka momo dekenai ia hegeregere gabudiai, haroro gaukara totona heboudia idia karaia. Ena be gabu ta ta edia kara be idau, to namona be grup taudia be edia haroro gaukara dekenai do idia lao haraga. Saturday bona Sunday dekenai, pablisa bona pioneer taudia momo be daba kahana ela bona dina tubua murinai idia haroro noho neganai, taunimanima namodia momo idia davaria.
4 Emu haroro gaukara haida do oi hanamoa totona oi ura heduru oi abia, a? Oiemu buka stadi naria tauna be dala ia hegaegaelaia diba oiemu grup dekenai ia noho pablisa namona tauna be oi danu umui haroro hebou totona. Hua dokonai, emu haroro ripotina do oi atoa haraga. Unai mai anina bada karana oi karaia dainai buka stadi naria tauna bona seketere tadikakana danu do idia moale.—Luka 16:10.
5 Haroro Naria Tauna be Grup Ia Vadivadi Henia Neganai: Haroro naria tauna be hua ta ta iboudiai reana grup stadi tamona tamona do ia vadivadi henia, bona grup taudia do ia hagoadadia edia haroro gaukara idia habadaia bona idia karaia namonamo totona. Buka stadi ia doko murinai ia ese miniti 15 lalonai hereva do ia henia neganai, kamonai namonamo, badina ia henia sisibana be grup taudia ia durudia edia haroro gaukara idauidau idia hanamoa totona. Haroro naria tauna ia ura Saturday bona Sunday dekenai, buka stadi taudia ta ta danu idia gaukara hebou. Unai be heduru namona dainai ia ita bamoa, bena namo do ita davaria badina ia haroro momo bona haroro gaukara karaia dalana ia manadalaia.
6 Bema ita hahedinaraia ita ura ia danu ita haroro hebou bona ita ura haroro gaukara idia do manadalaia lasi taudia ita durudia, bona “taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea” neganai, Kongregesen Buka Stadi be moale bona hetura heheni gabunai do ia lao.—Gal. 6:10.