Haroro Gaukara Ita Ura Henia Noho
1 Lagani 1992 murinai, tanobada hegegemadai Iehova ena Witnes taudia be lagani ta ta ai hora bilioni ta mai kahana idia gaukaralaia, haroro bona hahediba taudia halaoa gaukarana idia karaia totona. Ita moale badina ita be unai gaukara namona ita durua danu!—Mat. 28:19, 20.
2 Momokani, Iehova ita tanikiu henia bona hanamoa, badina “metau dikadia” momo negadia lalonai, Ia ese ita ia durua iena hesiai gaukara ita karaia namonamo totona. (2 Tim. 3:1) To unai mai anina bada gaukarana ita karaia goadagoada noho totona, dahaka ita karaia be namo?
3 Ena Badina: Dirava bona dekena taudia ita lalokau henidia, bona ita ura iseda gwauhamata ita hagugurua dainai, Basileia ena hesiai gaukara ita karaia. (Mat. 22:37-39; 1 Ioa. 5:3) Unai lalokau dainai ita be sibona eda ura ita dadaraia, unai amo haroro gaukara ita karaia goadagoada diba.—Luka 9:23.
4 Ita Gaukara Goada Noho: Diabolo ia ura iseda lalona ia hamanokaia, unai amo haroro gaukara do ita ura henia lasi. Bona ia gaukaralaia gaudia haida be inai: Iseda teritori dekenai taunimanima be sivarai namona idia ura lasi kamonai, tanobada ena lalona veria gaudia, dina ta ta ai ita laloa momo gaudia, bona gorere lalohekwarahilaia karana.
5 Unai dainai, namona be haroro gaukara ita ura henia noho. Gau badana be Iehova bona Iesu lalokau henia karana ita habadaia, guna ita karaia hegeregerena. Unai ena anina be Baibel ita duahia hanaihanai bona ita laloa dobu, bona “hesiai tauna mai ena kamonai, bona mai ena kara maoromaoro” ese ia halasia gaudia ita gaukaralaidia hanaihanai.—Apok. 2:4; Mat. 24:45; Sal. 119:97.
6 Baibel ena peroveta herevadia ese idia hahedinaraia goevagoeva, Iehova ese kara dika taudia do ia hadikaia ore dinana be kahirakahira vadaeni. (2 Pet. 2:3; 3:10) Unai dainai, namona be ita gaukara goada tanobada hegegemadai Basileia harorolaia bona hahediba gaukarana ita durua noho totona!