Regula Painia Gaukarana—Umui Ai Boiria Inai, Emui Moale Do Umui Habadaia Totona
1 Bema ta ese oi ia boiria, kara ta, ia amo moale bona laga-ani do oi abia karana ta, lalonai do oi vareai totona, unai neganai dahaka oi karaia? Reana ena hereva oi abia dae mai emu moale bona mai emu ura ida. Iesu be mai ena lalokau ida ena hahediba taudia ia boiria, doko diba lasi moalena bona laga-anina do idia abia totona. Ia gwau: “Egu huaia auna be emui pagana dekenai do umui atoa, . . . vadaeni emui laumana be do idia laga-ani.” Ta ese unai huaia auna ia huaia, anina be Keristani hahediba tauna ai ia lao bona ma haida ia boiria, Basileia ena sivarai namona harorolaia gaukarana lalonai do idia vareai. Regula painia gaukarana be dala hereana amo emu ahuna unai haroro gaukarana lalonai do oi habadaia bona iena amo moale bona laga-ani bada do oi abia.—Mat. 11:28-30; 28:19, 20.
2 Iseda lalona ia hagoadaia momokani sivaraina be inai: Lagani 1988 lalonai regula painia taudia be 101 sibona, bena idia momo daekau ela bona lagani 1994 ena hesiai laganina lalonai idia be 211—anina be idia be 109 pesen amo idia momo daekau. Unai ese ita be dahaka ia hadibaia? Gauna be, Basileia harorolaia taudia momo ese Iehova ena hesiai gaukarana goadalaia karana amo moale idia davaria bona edia lalona idia hegeregere. Edia lalo-goada painia gaukarana lalonai ese ma haida edia lalona ia hamarerea bena sibodia edia noho dalana idia tahua namonamo, painia taudia ai do idia lao totona idia danu be edia noho dalana idia haidaua diba eiava. Painia tauna ai do oi lao dalana oi gurigurilaia, a?
DAIDIA IDIA PAINIA DIBA
3 Tadikaka ta, ena noho dalana ia haidaua bena ena sikuli laganina ginigabena lalonai regula painia gaukarana ia karaia merona, ena hereva be inai: “Hari lau abia moalena ese guna lau abia moalena ia hereaia momokani.” Taihu ta mai ena natuna maragidia rua be painia gaukarana ia karaia matamaia murinai, ia gwau: “Guna lau moale, to hari lau moale bada herea.” Ena adavana ia mase murinai, taihu ma ta ia gwau: ‘Mai edia dala painia gaukarana idia karaia diba taudia iboudiai, be mai egu momokani ida lau hagoadaia unai gaukara do idia karaia. Iehova bona oiemu kongregesen kahirakahira dekenai oi do ia veria mai.’ Regula painia gaukarana karaia totona idia boiridia neganai unai boiboi idia kamonai henia taudia idia moale bada!
4 Reana ita gwau painia gaukarana ita karaia diba lasi. To bema ita gurigurilaia, do ita lalo-parara ita be mai eda dala regula painia gaukarana do ita karaia eiava lasi. Mai ena moale ida hari painia gaukarana ia karaia taihuna ta ia gwau, guna nega taina daudau lalonai painia gaukarana ia lalohadailaia, bena painia gaukarana ia karaia lasi ena badina bona ia karaia diba ena badina ia hahegeregerea neganai, ia hedinarai goevagoeva namona be painia gaukarana ia karaia. Ena daradara ia halusia bena ena abidadama bona ena lalokau Iehova dekenai be idia kwalimu.—Hadibaia Tauna 11:4 itaia.
5 Hari oi ese emu ful-taim moni gaukarana oi rakatania diba, a? Bema oi gorere lasi bona emu noho ia hegeregere dainai regula painia gaukarana do oi karaia diba, oiemu mauri ena anina be do ia bada ia lao diba. Headava taudia haida be mai edia natudia lasi eiava edia natudia idia bada vadaeni. Bema oi be unai bamona taudia ta, emu noho dalana oi haidaua diba, regula painia gaukarana do oi karaia totona, bena unai amo emu moale do oi habadaia, a?
6 Painia gaukarana idia karaia guna bena gabeai edia natudia idia havaraia taudia, be mai edia dala sibodia idia abia dibana amo edia natudia do idia hagoadaia, painia gaukarana be do idia tahua gauna ai do idia halaoa. Haida be edia natudia idia do naria noho negana lalonai, painia gaukarana idia karaia noho diba. (Aon. 22:6) Papua New Guinea dekenai, regula painia taudia hani hani amo ta ta be headava taudia, tatau bona hahine, bona idia haida, ena be idia be mai edia natudia, to dala idia karaia painia gaukarana idia karaia totona. Unai dainai edia famili be lauma dalana ai idia goada momokani!
7 Papua New Guinea dekenai, painia taudia 10 10 amo 7 7 bamona be headava lasi taudia. Idia momo be mai edia maduna lasi edia famili dekenai, bona edia lalona idia parara, idia be mai edia dala namona, regula painia gaukarana amo Iehova ena lalona idia hamoalea bona sibodia edia moale idia habadaia danu.
8 Reana nega daudau lasi sikuli amo do oi doko. Unai neganai dahaka do oi karaia? Iesu ese ita ia sisiba henia, iseda ‘matana do idia namo.’ Anina be kohu bona moale karadia do ita laloa bada lasi. Heau helulu tauna namona ia diba, aonega dalana be ia idia hametaua bona ena heau idia hadikaia diba gaudia iboudiai do ia negea be namo. Unai hegeregerena, oi, matamata tauna, ese Iehova ena hesiai do oi lao henia goadagoada neganai, Iehova ese oi do ia lalo-namo henia, bona oi be tanobada ena hedibagani amo do oi raka siri diba. Painia gaukarana ese emu lalohadai, Dirava badinaia lalohadaina, do ia hagoadaia, bona unai gaukara dainai do oi ura emu nega be lauma gaudia tahua karana ai do oi haorea. Unai dainai, bema mai emu dala regula painia tauna ai do oi lao, namona be oi laloa unai be emu maduna korikori, ani?—Mat. 6:22; 1 Kor. 15:58; 1 Tim. 6:7, 8.
9 Iehova ena ura bema ita karaia, hari amo ela bona hanaihanai do ita moale diba. Iesu ese ia hahedibalaia herevadia amo bona ia karaia karadia amo, unai ia hahedinaraia goevagoeva. (Ioa. 4:34; Heb. 12:2) Ita gaukara goada ma haida ita boiridia ‘mauri ranuna do idia abia dae, ia be davana lasi’ neganai, iseda mauri ita moalelaia bada diba. Oi ai boiria inai, regula painia tauna ai do oi lao; oiemu moale habadaia totona, inai gaukara oi karaia diba, a?—Apok. 22:17; Aon. 11:25.