Oi Ura Karaia Gaudia Gwauraia Guna, Emu Abidadama Ia Goada Totona
1 Iehova bona ena Basileia ena lohia gaukarana Keriso Iesu ena amo ita abidadama henia be gau badana Dirava do ita hamoalea totona. (Heb. 11:6) Unai dala amo Iehova ita tura henia namonamo diba, bona iseda mauri hanaihanai helarona ia hagoadaia. To aposetolo Paulo ia gwau: “Haida sibona mo Dirava ena hereva idia abia dae.” Ita diba bema ita abidadama lasi, Dirava ita hamoalea diba lasi, bona ita diba mauri do ita abia totona ita abidadama be gau badana. “Tanobada dokona” lalonai ita noho. Unai dainai, iseda abidadama ita hagoadaia be gau badana.—2 Tes. 3:2; Mat. 24:3, 36.
2 Iseda abidadama do ita habadaia totona, dahaka ese ita do ia durua reana? Bema Dirava ena ura hegeregerena, gau haida ita ura karaia, unai ese ita do ia durua. Bema mai iseda aonega ida haroro gaukara lalonai bona iseda kara ma haida dekenai ita ura karaia gaudia ita gwauraia hidi, kara momo do ita karaia diba bona unai kara ese ita do idia durua, bona iseda guba Tamana do idia hanamoa.
HARORO GAUKARA LALONAI BONA SIBONA EDA STADI LALONAI
3 Haroro gaukara lalonai ita karaia gaudia be idauidau. Ena be hekwakwanai haida dainai haroro gaukara momo ita karaia diba lasi, to mai eda ura ida hesiai gaukara ita karaia neganai, Iehova do ita hamoalea. Haheitalai ta be vabu ogogamina ta be mai ena kudouna ibounai ida harihari monina, moni maragi rua, ia henia. (Luka 21:1- 4) Hesiai laganina 1993 lalonai ita ta ta ibounai be dala haida amo iseda hesiai gaukara do ita habadaia diba reana. Reana haida be hari hesiai laganina lalonai dala idia kehoa haroro gaukarana lalonai do idia negea negana do idia habadaia totona. Oi ese sediual ta oi karaia diba, hari lagani lalonai heduru pioneer gaukara do oi karaia hua tamona o hua haida lalonai, a? Eiava reana dala do oi tahua regular pioneer gaukara do oi karaia totona. Bema harihari palani oi karaia namonamo, reana unai ese oi do ia durua, oi ura karaia gaudia do oi karaia totona.
4 Ita ura karaia gauna badana ma ta be ita sibona eda stadi amo heduru bada ita abia. Unai do oi karaia totona, reana Bible ena hereva ibounai be hua haida o lagani ta lalonai do oi duahia. Reana oi ese nega ta wiki ta ta iboudiai lalonai oi gwauraia hidi, Bible do oi duahia totona, bena emu sediual oi badinaia namonamo. Bible ena hereva ena anina dekenai do oi lalo-parara bona do oi abia dae momokani totona, namona be oi duahia gaudia be haroro gaukara lalonai oi gaukaralaidia, ma taunimanima haida ida oi kikilaia, eiava ma dala haida amo sibona emu mauri lalonai oi gaukaralaidia.
MATAMATA TAUDIA BONA TAMA SINA
5 Namona be matamata taudia ese dala idia tahua, tisa bona edia kalasi taudia dekenai do idia haroro namonamo totona. Witness tauna matamatana ese Sikuli buklet be inai bamona ia herevalaia: “Unai buklet dainai iseda tisa bona sikuli taudia dekenai iseda abidadama ita gwauraia be auka momokani lasi.” Unai buklet oi gaukaralaia toho, a? Unai do oi karaia totona, oi boga-auka be gau badana, to namona be oi abidadama Iehova ese oi do ia hanamoa.
6 Umui matamata taudia e, namona be emui ura ta be, hebamo dikana, drag bona sihari kava karadia ese emui kara maorona do idia hadikaia lasi vaira huadia lalodiai.
7 Reana emu mauri bona emu haroro gaukara lalonai gau haida oi ura hanamoa. Oi bona emu ruma bese taudia umui ura do umui karaia gaudia do umui hagugurua totona, namona be sibona emui ura haida do umui dadaraia. To namona be oi laloatao inai tanobada gaudia “be kahirakahira do idia ore.” (1 Ioane 2:17) Unai oi laloatao neganai, do oi ura dala oi tahua goadagoada Dirava ese oi do ia lalo-namo henia totona. Namona be sibona emu lalona oi hadaia, oi bona emu ruma bese taudia emui abidadama do oi hagoadaia totona. Namona be oi ura karaia gaudia oi gwauraia hidi guna bena oi hekwarahi do oi karaia totona.
[Questions]
1. (a) Badina be dahaka ita ura iseda abidadama do ia goada? (b) Badina be dahaka taunimanima momo herea ese Dirava do idia hamoalea lasi bona unai dainai mauri do idia abia lasi? (c) Tesalonika Iharuana 3:2 ese unai edena bamona ia hamomokania?
2. Mai eda aonega ida ita ura karaia gaudia ita abia hidi neganai, dahaka dainai unai ese ita do ia durua haroro gaukara lalonai? Iseda mauri ibounai lalonai?
3. (a) Badina be dahaka ita ta ta ibounai ita ura karaia gaudia be reana idia idauidau? (b) Tadikaka ta ta idia ura karaia gaudia haida be dahaka dahaka reana? (c) Dahaka dainai palani ita karaia harihari be namo?
4. (a) Sediual oi karaia sibona emu stadi do oi karaia totona be auka momokani lasi, to dahaka hekwakwanai be nega momo ia vara? Unai hekwakwanai be edena bamona do oi hanaia diba? (b) Dahaka oi karaia diba, sibona emu stadi ese oi do ia durua bada totona?
5. (a) Matamata taudia be Sikuli buklet edena bamona idia gaukaralaia namonamo diba? (b) Bema oi hemarai tisa dekenai buklet do oi henia toho totona, dahaka oi karaia be namo?
6. Namona be matamata taudia edia ura ma ta be dahaka?
7. (a) Oi bona emu ruma bese taudia ese umui ura karaia gaudia do umui hagugurua totona, badina be dahaka nega haida emui ura haida umui dadaraia be namo? (b) Ioane Gunigunana 2:17 ena hereva ese oi edena bamona ia durua, oi ura karaia gaudia do oi hagugurua totona?