Sivarai Namona Harorolaia—Buklet Amo
1 Basileia ena sivarai namona ena hereva momokani taunimanima dekediai ita harorolaia be moale gauna. (Kara 15:3) To iseda nega be bada lasi unai gaukara ita karaia totona. Mai ena aonega danu, iena orea dekena amo Iehova ese Baibel stadi buka bona buklet namodia ita ia henia, bona unai heduru gaudia kamonai taudia dekenai ita hariharilaidia diba, bena heduru do idia abia lauma dalanai idia tubu totona. Namona be ita hegaegae namonamo bena Kiki Herevana hegeregerena unai Baibel durua buklet eiava pepapepa do ita henia toho namonamo diba.
2 July lalonai ita ese Kiki Herevana matamatana do ita gaukaralaia, ena ladana be “Moale Ia Havaraia Gauna.” Bona ita ese inai buklet ta do ita gaukaralaia: Toi Tamona, Iehova ena Witness Taudia, Mauri Hanaihanai, “Itaia!”, Gavamani, Dirava ese Ita Ia Laloa Eiava?, Mase Taudia Edia Lauma. Haroro gaukara ita do karaia lasi neganai, namona be ita hegaegae guna unai Baibel durua buklet do ita henidia toho namonamo totona.
HEDURU HEREVADIA
3 Mauri Hanaihanai Tanobada Dekenai Oi Abia!: Memero bona kekeni bona idia duahiduahi diba namonamo lasi taudia ese unai buklet idia ura henia. Ena laulau bona Baibel siridia badinai namba idia torea ita davaridia haraga totona. Edena dala amo unai buklet do oi haheitalaia diba? Kiki Herevana, “Moale Ia Havaraia Gauna,” oi herevalaia murinai, reana do oi gwau: “Oi ura inai tanobada dekenai moale korikori do oi abia, a? [Nega oi henia ia haere totona.] Mani emu kara inai Baibel stadi buklet ena laulau mai hairaina oi itaia, taunimanima idia moale, ani? [Oi kehoa rau 49 dekenai, bona laulau ena atai kahana dekenai ia noho herevana oi duahia.] Inai buklet ese oi do ia durua Baibel oi diba totona, bona oi ia hadibaia edena bamona do oi moale diba, inai taudia bamona, bona edena bamona tanobada dekenai do oi noho ela bona hanaihanai danu. Buklet ena davana be 30 toea sibona.”
4 Ruma tauna ia hanamoa murinai, reana pablisa mero o kekeni ta ese buklet do ia henia toho, do ia gwau: “Taunimanima dekenai inai buklet ai hariharilaia, bona ia hahedinaraia edena dala amo Dirava ese moale do ia havaraia tanobada ibounai dekenai. Mani emu kara ena kopina dekenai ia noho laulauna oi itaia; unai taudia idia moale, ani? Bema oi ura inai sivarai do oi duahia, bona ena laulau bona Baibel siridia do oi tahudia namonamo, oi abia diba. Ena davana be 30 toea sibona.”
5 Inai Gavamani ese Paradaiso Do Ia Mailaia: Inai buklet dekenai Dirava ena Basileia ia herevalaia momo—Iesu bona ita danu ese unai sivarai tamona ita kikilaia momo be namo. Kiki Herevana oi herevalaia neganai, edena bamona unai buklet oi henia toho diba dala rua ai torea hedinarai:
6 “Dirava ena Hereva idia badinaia bona idia moalelaia taudia be dohore Dirava ena Gavamani henunai mauri mai moalena do idia abia. Unai gavamani ese tanobada ibounai dekenai paradaiso do ia havaraia. Inai buklet lalonai unai sivarai ia kikilaia namonamo, bona oi abia diba, ena davana be 30 toea sibona. Rau 3 dekenai unai gavamani ia gwauraia inai bamona.” Bena unai paragraf do oi duahia.
7 Eiava, do oi gwau, “Dirava ena Hereva idia badinaia taudia be harihari idia moale sibona lasi, to gabeai danu do idia moale bada herea. Inai be Baibel stadi buklet ta, bona rau 29 dekenai ia hahedinaraia dahaka dainai Dirava ena Hereva idia badinaia taudia be do idia moale. [Kehoa rau 29 dekenai bona ruma tauna dekenai kikilaia.] Lau diba inai buklet do oi duahia neganai do oi moale. Inai be hadibaia buklet namona ta bona oi abia diba, ena davana be 30 toea sibona.”
8 Hari hua lalonai, haroro gaukara dekenai, reana dala namodia ma haida amo buklet do oi hariharilaidia toho. Hegaegae namonamo, bena Iehova ese oi do ia hamoalea, buklet amo sivarai namona oi harorolaia neganai.
[Questions]
1. (a) Mai ena aonega danu, Iehova be iena orea dekena amo dahaka ia henia ita dekenai? (b) Unai heduru gaudia be edena bamona do ita gaukaralaidia be namo?
2. Haroro gaukara lalonai buklet ita hariharilaidia totona, dahaka do ita karaia guna?