Emu Lalona Oi Hadaia Nega Ibounai Hesiai Gaukarana Karaia Totona
1 Iseda gwauhamata hagugurua totona bona mauri hanaihanai do ita abia totona, gau badana be Keristen ena haroro gaukarana ita karaia. (Roma 10:10; 1 Tim. 4:16) Iesu ese taunimanima haida ia boiridia neganai iena hahediba taudia ai do idia lao totona, ia hahedinaraia goevagoeva edia maduna ta be Dirava ena Basileia ena sivarai do idia harorolaia. (Luka 9:57-62) Iesu ena boiboi ita kamonai bona ena hahediba taudia ai ita lao neganai, reana iseda moni gaukara do ita haidaua lasi, to ena anina be iseda lalohadai ita haidaua mai anina bada gaudia do ita lalodia guna totona. Mai anina bada gaukarana ta be Iehova ena “hoa kara badadia [ita] gwauraia hedinarai.” Unai anina be hahediba taudia ita halaodia danu. (1 Pet. 2:9; Mat. 24:14; 28:19, 20) Iehova dekenai edia mauri idia gwauhamatalaia taudia iboudiai be haroro gaukara idia laloa guna. Idia momo be mai edia dala dainai nega ibounai hesiai gaukarana idia karaia.—2 Kor. 4:1-7.
IA BE MAURI DALA NAMONA
2 Pioneer ta be lagani 54 lalodiai nega ibounai hesiai gaukarana ia karaia, bona ia gwau: “Lau abia hekwakwanai be momo lasi, to lau abia hahenamo be momo herea. Bema mai egu dala lau matamata lou, egu mauri dala lau haidaua lasi, do lau ura egu mauri ibounai lau henia Dirava badana, Iehova, ena hanamoa gaukarana lau karaia totona.” Tanobada ena gaukara ta amo unai bamona lalona ena mamina namona bona moale bada karana do lau abia diba lasi. Nega ibounai hesiai gaukarana be Dirava abidadama henia dalana ta, bona unai gaukara amo hahenamo momo hari bona gabeai danu do ia havaraia diba.—1 Tim. 4:8.
3 Nega ibounai hesiai gaukarana amo oi moale bada badina heduru karana bona henia karana oi karaia momo dainai. (Kara 20:35) Emu turana karaia karana Iehova bona ena Natuna, Iesu Keriso dekenai ia habadaia bona ia hagoadaia badina Basileia gaukarana oi karaia hanaihanai dainai. (Luka 16:9; 1 Kor. 15:58) Oi lalo-manau bona emu lalona ena mamina ia namo, badina mai emu dala neganai emu goada ibounai ida pioneer haroro gaukarana oi karaia. Unai maduna oi manadalaia dainai unai ese oi ia durua haroro gaukara habadaia bona Iesu ena hahegani oi badinaia totona, ia gwau, ”Basileia bona iena kara maoromaoro do umui tahua guna.”—Mat. 6:33.
4 Taunimanima momo idia karaia hegeregerena, bema oi ura pioneer gaukara do oi karaia, namona be unai oi gurigurilaia noho Iehova dekenai dala ia kehoa totona. (Mat. 7:7, 8) Momo herea be heduru pioneer gaukara idia karaia guna, bena unai dala amo edia abidadama Iehova dekenai idia habadaia.
5 Mai ena diba bona aonega bada taudia sibodia lasi be pioneer gaukara idia karaia diba. To bema Dirava bona taunimanima oi lalokau henidia momokani, bona oi hegeregere nega haida oi sibona emu ura oi reaia, vadaeni pioneer gaukara oi karaia diba. (Mat. 22:37-39; Fil. 4:13) Keristen haroro gaukarana ese oi do ia durua kara namodia oi manadalaia totona, bona Aramagedono amo do idia roho mauri taudia ese unai bamona kara idia hahedinaraia be mai anina bada. Bema nega ibounai hesiai gaukarana oi karaia unai ese emu lalokau, abidadama, moale bona maino do ia habadaia. (Gal. 5:22, 23) Unai dainai namona be emu lalona oi hadaia pioneer gaukara oi karaia totona bona unai gaukara namona oi karaia noho!
[Questions]
1. (a) Roma 10:10 oi duahia. Oiemu Keristen haroro gaukarana oi laloa bada, a? (b) Luka 9:57-62 ia gwau Iesu murinai ia raka tauna ese dahaka hahegani ia abia? (c) Edena Bible siri idia hahedinaraia gwauhamata Keristen taudia be haroro gaukarana do idia laloa guna be gau badana, a? (d) Korinto Iharuana 4:1, 7 hegeregerena, dahaka dainai Keristen taudia momo be nega ibounai hesiai gaukarana idia karaia?
2. (a) Tanobada gaukara ta amo lasi, to pioneer gaukara amo dahaka hahenamo do oi abia diba? (b) Timoteo Ginigunana 4:8 ai, Paulo ese dahaka hahenamo haida ia gwauraidia?
3. (a) Dahaka dainai nega ibounai hesiai gaukarana amo moale bada oi abia? (b) Luka 16:9 ese turana karaia karana ia gwauraia. Unai turana taudia be daidia?
4. Mataio 7:7, 8 lalonai dahaka sisiba ia noho idia ura pioneer gaukara idia karaia taudia totona?
5. (a) Dahaka do oi karaia nega ibounai hesiai gaukarana oi karaia namonamo totona? (b) Edena bamona nega ibounai hesiai gaukarana ese oi do ia durua Aramagedono amo do oi roho mauri totona?
This article is repeated in km 12/93.