Ruma Bese Taudia Idia Gaukara Hebou Namonamo Neganai, Namo Idia Davaria
1 Gunaguna ema bona hari, taunimanima be ruma besedia lalonai idia noho. Iehova ese ruma bese ia laloa bada, badina “iena bese taudia ibounai guba dekenai bona tanobada dekenai be ia dekena amo edia ladana idia abia.”—Ef. 3:15.
2 Bible idia torea negana lalonai, tamana be mai ena maduna badana, iena ruma bese taudia be Dirava henunai idia noho totona. Hari inai negai danu, tamana ena maduna be unai bamona. (Ios. 24:15; Ef. 6:1-4) Ruma bese taudia ese edia gaukara ibounai do idia naria be auka sisina. Edena bamona unai bamona idia karaia diba? Ruma bese taudia idia gaukara hebou namonamo bona idia hegaegae namonamo neganai.—1 Kor. 14:40.
RUMA BESE TAUDIA EDIA KWARANA BAMONA OI HAKAUDIA
3 Gau badana be ruma bese taudia iboudiai be lauma dalanai idia goada. Namona be ruma bese stadi idia karaia nega ibounai bona idia karaia dalana be ruma bese taudia ta ta iboudiai ia durua. Namona be dina ena siri idia kikilaia neganai danu, unai bamona idia karaia. Namona be Dirava ena Hereva idia kikilaia daba daba iboudiai! Unai dina lalonai unai siri ita laloa noho neganai, unai ese ita do ia durua bena “kara goevagoeva, lalokau karadia, mai mataurai karadia” do ita laloa noho. (Fil. 4:8) Umui be unai kara dekenai emui kara umui hanamoa be namo, a?
4 Gau badana be ruma bese taudia idia stadi hebou sibona lasi to danu ruma bese taudia ta ta sibona sibona idia stadi. Iosua 1:8 ena hereva be mai anina ita ta ta ibounai dekenai, ia gwau: “Inai taravatu bukana ena hereva be oiemu uduna dekenai do idia noho be namo. Dina ai bona hanuaboi ai oi duahia. Unai amo ia lalonai ia torea herevadia iboudiai do oi badinaia bona karadia do oi karaia; bena emu raka do ia namo bona do oi kara mai emu aonega danu.”
5 Ita be kongregesen ena hebou dekenai ita ginidae nega korikori ai be auka sisina. Unai bamona do ita karaia totona, gau badana be ita gaukara hebou namonamo. Ruma bese ena kwarana ese unai kara ia naria neganai, unai ese dala do ia kehoa bona bema heduru idia abia be namo, ruma bese taudia ese unai heduru do idia abia. Unai dala amo ruma bese taudia iboudiai be hebou dekenai do idia ginidae, nega korikori ai, bona hebou be ane bona guriguri amo idia kehoa neganai, ane do idia abia diba bona guriguri do idia kamonaia diba.
6 Gau badana be ruma bese ena kwarana ese edia guriguri karana ia gunalaia, badina gau momo ese ruma bese taudia edia lalo-tamona karana idia hadikaia diba. (2 Tim. 3:1-5) Paulo be Roma 12:12 dekenai inai sisiba ia henia: “Guriguri do umui goadalaia nega ibounai.” Bema ruma bese taudia be unai bamona idia karaia nega ibounai, do idia noho hebou namonamo. Namona be ruma bese taudia idia guriguri hebou sibona lasi, to danu idia ta ta be sibona sibona edia guriguri idia karaia.
HEGAEGAE
7 Iehova ita tomadiho henia karana ta be ma taunimanima haida dekenai iena ladana ita hadibaia. Bema ruma bese taudia ese haroro daladia idia karaia loulou badina idia ura hegaegae, unai ese idia iboudiai do ia durua haroro gaukara totona do idia hegaegae namonamo. Unai bamona do ita karaia totona, gau namona ta be Reasoning bukana ita gaukaralaia. Unai buka ena rau 9-15 dekenai, haroro hamatamaia herevadia idia noho bona idia haida ita abia hidi, Kiki Herevana danu do ita gwauraia hebou totona. Ruma bese ena kwarana ese haroro dalana hanamoa totona sisiba ia henia diba.
8 Ruma bese tauna tamona o reana haida be nega ibounai hesiai gaukara idia karaia diba, a? (1 Kor. 16:9) Unai bamona do idia karaia totona, ruma bese taudia iboudiai idia gaukara hebou namonamo bona idia hegaegae namonamo be namo. Kohu momo idia tahua lasi bona hekwakwanai idia hanaia dainai, ruma bese taudia momo ese unai moale bona hahenamo idia davaria.
9 Ena be tamana eiava ruma bese kwarana ese ruma bese ena gaukara ia gunalaia be namo, to namona be ruma bese taudia ta ta iboudiai idia laloatao idia be mai sibona edia maduna edia ruma bese idia durua Iehova tomadiho henia karana lalonai. Bema dala idia tahua ruma bese taudia iboudiai idia noho namo totona, unai ese edia moale bona lalo-tamona do ia havaraia.
[Questions]
1, 2. (a) Dahaka dainai Iehova ese ruma bese ia laloa bada? (b) Dahaka sisiba namona tamadia dainai ia noho 1 Korinto 14:40 dekenai? Iosua 24:15 dekenai? Efeso 6:1-4 dekenai?
3, 4. (a) Ruma bese taudia be dina iboudiai dina ena siri idia kikilaia neganai, unai be edena bamona ia durudia? (b) Filipi 4:8 oi duahia. Dahaka ese ruma bese taudia do ia durua, unai sisiba do idia badinaia totona? (c) Ita ta ta ibounai ese dahaka ita karaia diba, Iosua 1:8 ena sisiba do ita badinaia totona?
5, 6. (a) Namona be tamana ese dahaka ia karaia, bena iena ruma bese taudia iboudiai be hebou dekenai nega korikori dekenai do idia ginidae? (b) Gau badana be tamana ese dahaka ia karaia, Roma 12:12 ena hereva do ia badinaia totona? Danu, ruma bese taudia ta ta iboudiai ese dahaka idia karaia be gau badana?
7-9. Ruma bese taudia ta ta iboudiai, tama sina bona natudia, ese dahaka idia karaia diba lalo-tamona bona moale be edia ruma bese lalonai do idia havaraia totona?