Sivarai Namona Harorolaia—Holide Negadiai
1 Kerisimasi bona Lagani Matamata edia nega lalonai, taunimanima edia moale karadia momo be sene karadia amo idia mai, to lagani ta ta iboudiai, sibodia idia gwauraia Keristen taudia bilion momo ese unai holide dina idia hahelagadia. Taunimanima momo idia laloa Dirava ia ura unai dina idia hahelagadia. Holide negana lalonai, dahaka do ita karaia diba sivarai namona be unai bamona taudia edia lalona dekenai ita atoa totona?
ITA LALOA NAMONAMO BONA ITA HEMATAURAI
2 Holide neganai, haroro gaukara ita karaia totona, namona be elda taudia ese nega idia hegaegaelaia, badina ita momo be unai nega lalonai moni gaukara ita karaia lasi. Ruma taudia ita hemataurai henidia totona, namona be ruma-ta-ruma-ta gaukara hamatamaia negana do ita haidaua sisina, badina reana unai holide negana lalonai taunimanima be mahuta amo idia toreisi haraga lasi.
3 Iseda haroro gaukara ita karaia neganai, reana ruma taudia momo idia bisi, badina edia vadivadi taudia idia mai bona aniani idia hegaegaelaia dainai. Namona be inai ita laloatao, idia dekenai unai be dina badana, unai dainai mai iseda hemataurai ida do ita hereva henidia bona do ita hereva daudau lasi. Keristen ena hemataurai karana do ita hahedinaraia dainai, reana gabeai haroro herevana do idia ura kamonai henia.
4 Ita be tanobada ena tomadiho orea edia moale karadia lalonai ita vareai lasi, bona holide ena hanamoa herevadia do ita gwauraia heheni lasi. Unai dainai, bema ita dekenai unai hanamoa herevana ta idia gwauraia neganai, namona be hemataurai dalana amo ita haere henidia. Namo lasi unai hanamoa hereva dainai ita hepapahuahu, nega momo ruma tauna ena hereva namona dainai ita tanikiu henia sibona be ia hegeregere. Bema taunimanima idia ura diba iseda tomadiho dalana be dahaka, namona be ita hamaorodia Keriso Iesu ena ladana ita hanamoa, badina unai be hahegani badana Dirava ena ladana ita hanamoa totona. (Ioane 5:23) To, holide lalonai kara momo ese Keriso eiava Dirava ena ladana idia hanamoa lasi. Bema taunimanima ta ta be unai nega lalonai eiava ma nega ta ai, hereva ma haida idia ura diba, namona be Reasoning buka ena rau 176-8 bona 180 amo sivarai ita kikilaia diba.
HAMATAMAIA HEREVADIA
5 Kerisimasi holide dekenai tomadiho karadia idia karaia dainai, lagani ena dina iboudiai amo unai dina dekenai ita davaria taudia momo be reana idia ura Dirava ena sivarai ita kikilaia. Namona be iseda hamatamaia hereva dekenai unai ita kikilaia. Reana inai bamona ita hereva diba: “Tanobada ibounai dekenai taunimanima milion momo be Kerisimasi bona Lagani Matamata edia holide idia moalelaia. Oi laloa edia moale karadia dainai idia be Dirava kahirakahira dekenai idia mai, a?” Ruma tauna ese unai moale karadia idia namo eiava idia dika ia gwauraia murinai, reana inai bamona do ita hereva diba. “Taunimanima momo idia ura edia turana karana Dirava dekenai idia hanamoa, badina reana idia laloa Dirava be idia kahirakahira dekenai ia noho lasi. To, moale gauna be inai, Dirava ese ita ia boiria ita tahua totona.” Murinai, hua ena Kiki Herevana ita gwauraia.
6 Do ita hereva henidia dala ma ta be inai: “Hari Kerisimasi negana lalonai, taunimanima momo edia hereva ita kamonai, idia gwau namona be tanobada dekenai maino do ia vara bona taunimanima iboudiai do idia lalo-namo heheni. Oi laloa iseda mauri negana lalonai Dirava ese tanobada dekenai maino do ia havaraia, a?” Murinai, do ita hahedinaraia Iesu Keriso be idia perovetalaia “Maino Lohiana.” (Isa. 9:6, 7) Keriso be Dirava ena gavamani lalonai, lohia dagina ia abia dainai, kahirakahira kara ta do ia karaia tanobada dekenai maino hanaihanai do ia havaraia totona.—Dan. 2:44; Apok. 21:3-5.
7 Ena be taunimanima momo be Basileia ena sivarai idia laloa bada lasi, bona edia tomadiho koikoi holide dinadia idia moalelaidia, to bema ita hekwarahi noho hereva momokani idia tahua taudia do ita davaridia totona, Iehova ese iseda gaukara do ia hanamoa, badina ia ese “unai bamona idia tomadiho henia taudia ia tahua noho,” bona iena orea dekenai do ia hakaudia.—Ioane 4:23, 24.
[Questions]
1. Dahaka dainai sibodia idia gwauraia Keristen taudia bilion bona ma haida ese Kerisimasi bona Lagani Matamata edia dina idia hahelagadia?
2. Holide negana lalonai, haroro totona ita hegaegae neganai, dahaka ita laloa be namo?
3. Taunimanima ita vadivadi henidia neganai, bema idia bisi, dahaka do ita karaia be namo?
4. Ta ese ita dekenai holide ena hanamoa herevana ta ia gwauraia neganai, dahaka do ita karaia be namo?
5. Holide negana lalonai, edena dala amo taunimanima dekenai do ita haroro diba?
6. Holide negana lalonai, taunimanima dekenai sivarai namona do ita gwauraia dalana ma ta be dahaka?
7. Bema ita hekwarahi noho hereva momokani idia tahua taudia ita davaridia totona, dahaka do ia vara?