Sivarai Namona Harorolaia—Pepapepa Idauidau Amo
1 Tau ta Society dekenai inai bamona ia torea: “Hahine ta lau raka hanaia neganai ia ese pepapepa ta lau ia henia. Unai pepapepa ena ladana be Mauri mai Mainona Tanobada Matamatana Lalonai. Unai pepapepa lau do duahia lasi neganai, lau lalohisihisi, to lau duahia murinai lauegu lalona ia moale bona maino mamina lau abia.” Unai tau ia ura sivarai ma haida do ia diba, unai dainai revareva ia torea, ia gwau: “Mai moale danu lau naria noho umui dekena amo Mauri Hanaihanai Paradaiso Lalonai bukana do lau abia totona.”
2 Oibe, guna taunimanima momo be pepapepa ta eiava pablik haroro pepana ta murinai idia torea Bible sivaraina idia duahia dainai, lauma gaudia edia mamina idia abia. Oiemu haroro gaukara dekenai pepapepa oi gaukaralaidia, a? Momo herea be unai bamona idia karaia. Brooklyn dekenai, unai Mauri mai Mainona Tanobada Matamatana Lalonai ena pepapepa milion 122 idia printaia, bona danu Bible Oi Abidadama Henia Diba; Dahaka Hereva be Iehova ena Witness Taudia ese Idia Abia Dae? bona Helaro Namona Mase Taudia Totona be Ia Noho, A? edia pepapepa milion 250 idia printaia. Lagani ta ta ibounai, United States lalonai, kongregesen idauidau dekenai pablik haroro pepapepa milion 12 idia siaia.
3 Unai pepapepa edia sivarai be kwadogi, to unai be Dirava ena Hereva dainai ia be mai ena siahu. (Heb. 4:12; Sekaria 4:10; Iakobo 3:4, 5 itaia danu.) Witness ta Arizona dekena amo ia torea, ia gwau: “Lau be Watch Tower Society ena pepapepa momo lau duahia, bona sisina sisina lau ese hereva momokani lau diba.” Ia gwau: “Hari inai nega lalonai, taunimanima idia haragaharaga momo, bona nega idia atoa lasi idia duahiduahi totona. Unai pepapepa edia sivarai kwadogina be idia hegeregere mai anina bada sivaraina idia hahedinaraia totona, bona sivarai be lata herea lasi dainai, taunimanima momo idia dadaraia kava lasi idia do itaia lasi neganai.”
4 Taunimanima be ita dekena amo magasin eiava buka idia ura lasi abia ena badina be idauidau. To, taunimanima momo be pepapepa idia ura abia. Sekit naria tauna ta ia gwau ia be mai ena plastik gauna ta, bona ia lalonai pepapepa ia atodia bona ruma taudia dekenai ia hahedinaraia idia ura henia gauna idia abia hidi totona. Ia gwau, “idia abia hidi momo pepapepana be Dahaka Hereva be Iehova ena Witness Taudia ese Idia Abia Dae?”
NEGA GINIGUNANA RUMA TAUNA OI HEREVA HENIA NEGANAI
5 Pablisa taudia haida idia gwau pepapepa eiava pablik haroro pepapepa henia guna karana be dala namona ruma taudia dekenai hereva idia hamatamaia totona. Unai pepapepa oi henia toho neganai, reana ruma taudia edia daradara idia ore bena edia iduara idia kehoa ta idia abia totona. Pablik haroro pepapepa dekenai hebou edia nega oi hahedinaraia neganai, dala do oi kehoa diba iseda gaukara ena badina oi kikilaia totona.
6 Bema ruma tauna ia bisi eiava ena toana be ia lalohisihisi, unai pepapepa ena sivarai be reana do ia durua diba. Hahine ta be Helaro Namona Mase Taudia Totona be Ia Noho, A? ena pepapepa ia duahia neganai, ena lalohisihisi be sisina ia ore, unai dainai, Society dekenai revareva ia torea sivarai ma haida do ia diba totona. Ruma dekenai ta oi davaria lasi neganai, unai pepapepa ta oi rakatania diba ruma tauna do ia davaria totona, to oi atoa namonamo idia raka hanai taudia idia itaia garina.
LOU-HENIA KARAIA NEGANAI
7 Guna ia kamonai tauna oi lou-henia neganai, reana inai bamona oi hereva diba: “Namo, (emu ladana oi gwauraia.) Lau moale ruma dekenai oi lau davaria dainai. Guna ita hedavari neganai, lau hoa badina oi ura Bible ena hereva ita kikilaia. Bona hari lau mai badina sivarai ma ta lau ura kikilaia, lau diba inai hereva do oi moalelaia danu. Sivarai be inai pepapepa dekenai idia torea, ena ladana be Mauri mai Mainona Tanobada Matamatana Lalonai. Taunimanima momo ese gwauhamata namona ena sivarai idia duahia neganai, idia laloa unai kara be guba dekenai do idia vara, to mani Salamo 37:29 ena hereva oi itaia, ia gwau unai hahenamo be tanobada dekenai do idia vara. (Bible siri oi duahia, bona pepapepa dekena amo unai siri idia torea gabuna oi hahedinaraia ruma tauna dekenai.) Unai be namo herea, ani? (Paragraf haida edia sivarai oi kikilaia.) Inai pepapepa dekenai Bible siri ma haida idia noho ita idia hagoadaia totona, idia danu do oi moalelaidia diba. Gabeai do lau giroa mai neganai, reana unai siri do ita duahia hebou diba, hari ita karaia bamona.” (Inai paragraf ena anina hahedinaraia totona, namona be haheitalai ta oi hegaegaelaia namonamo. Ta ese guna pepapepa ia abia tauna ia lou-henia.)
8 Momokani, iseda pepapepa bona pablik haroro pepapepa be hariharibada gaudia Iehova ena amo. Namona be unai mai anina bada pepapepa be aonega dalanai ita gaukaralaidia iseda haroro gaukara ita karaia namonamo totona, Iehova ena ladana ita hanamoa totona, bona hahenamo ela bona hanaihanai ita abia totona.—Her. 22:29.
[Questions]
1, 2. (a) Dahaka gau dainai, tau ta be Society dekenai revareva ia torea buka ta ia abia totona? (b) United States lalonai, pepapepa bona pablik haroro pepapepa hida idia gaukaralaidia?
3, 4. (a) Ena be unai pepapepa edia sivarai idia kwadogi, to Heberu 4:12; Sekaria 4:10 bona Iakobo 3:4, 5 be edena bamona idia hahedinaraia unai sivarai be mai edia siahu bada?
5, 6. Nega ginigunana ruma tauna oi hereva henia bona pepapepa oi henia diba dalana oi hahedinaraia.
8. Hereva Lada-isidia 22:29 ese ita ia hagoadaia dahaka ita karaia totona?