Kongregesen Lalonai Iseda Basileia Gaukara Ita Hagugurua
1 Keristen kongregesen ena Kwarana, Iesu Keriso dekena amo, Iehova ese maduna ia henia “kohu naria tauna” eiava ruma naria tauna dekenai. (Luka 12:42, 43) Unai dala amo idia printaia toretoredia amo hakaua herevadia ita abia, bona ita diba “edena kara do ita karaia Dirava ena ekalesia lalonai.” (1 Tim. 3:15) Idia printaia hereva idauidau ita davaria totona, heduru gauna ta be Watch Tower Publications Index. Bema unai Index be oi dekenai ia noho lasi, namona be Hesiai Gaukara Karaia Totona Ita Hegaegae buka ena Indeks oi gaukaralaia diba.
2 Oi be elda ta, a? Bema oibe, Index buka bona Hesiai Gaukara Karaia Totona Ita Hegaegae buka ena Indeks dekenai, hereva kwarana maragidia “Elda” bona “Naria taudia” henunai, edia gaukara maduna idia herevalaia. “Naria taudia” henunai dagi ena gaukara ta ta idia torea, hegeregere kongregesen ena “gunalaia tauna”, “haroro naria tauna”, bona “seketere.” (omMO rau 41-43) Hereva kwarana badana “Kongregesen” henunai, heduru hereva ma haida oi davaria diba.
3 Hesiai tauna ena dagi umui abia taudia danu ese gaukara namona kongregesen dekenai umui karaia. Index eiava Hesiai Gaukara buka ena Indeks dekenai, “Hesiai taudia” henunai, umui badinaia taravatudia bona emui gaukara maduna ia torea. Danu hesiai gaukara ma haida do oi tahua diba bona dahaka do oi karaia unai gaukara do oi abia totona ena heduru hereva idia torea.
4 Elda bona hesiai taudia be mai edia maduna kongregesen heboudia dekenai. Hesiai Gaukara buka dekenai, Indeks ena hereva kwarana “Hebou” henunai, hereva idauidau idia torea, bona Index buka lalonai, heduru hereva namodia be “efforts to attend” [“hebou lao henia daladia tahua”] henunai oi davaria diba. Momokani, Index buka bona Hesiai Gaukara buka ena Indeks ena hereva kwarana haida henunai hebou idauidau edia sivarai idia torea, hegeregere “Pablik Tok,” “Hesiai Hebou” bona ma haida danu.
5 Salamo 68:11 ia gwau: “Sivarai namona idia gwauraia hahinedia be tuari oreana badana ta.” Kongregesen ena tatau bamona, “Dirava ena ekalesia” lalonai, taihu danu edia kara do ia goeva be gau badana. Nega haida daradara ia vara, hegeregere, edena negai taihu ta be ena kwarana do ia koua, eiava dahaka idia karaia bema tadikaka ta ia hegeregere lasi eiava ia noho lasi hebou ia gunalaia totona? Index buka dekenai, “Women” [“Hahine”] henunai eiava Hesiai Gaukara buka ena Indeks dekenai, “Taihu” henunai, unai sivarai oi davaria diba.
6 Timoteo Ginigunana 3:15b dekenai, ia gwau Keristen kongregesen be “hereva momokani ena du bona iena badina momokani.” Iseda maduna namona be hereva momokani ita abia dae bona Dirava ena ekalesia lalonai ita kara maoromaoro, unai neganai kongregesen lalonai iseda Basileia gaukara do ita hagugurua diba.