Haroro Gaukara Dekenai Bible Ita Gaukaralaia
1 Dirava ena siahu amo idia torea herevadia Bible dekenai be mai edia siahu taunimanima edia lalona idia hamarerea totona. Unai dainai, Keristen taudia ginigunadia ese sivarai namona idia harorolaia neganai, idia ese Buka Helaga ena hereva idia gaukaralaia. Paulo be “Buka Helaga idia danu ia herevalaia,” hereva ena anina idia ia hadibaia bona Bible dekena amo ena hereva ia hamomokania. (Kara 17:2, 3) Apolo be Iuda taudia dekenai ia haroro neganai, idia ia hadibaia “Buka Helaga amo ia hedinarai momokani Iesu be Keriso.”—Kara 18:24-28.
2 Hari inai negai Iehova ena Witness taudia ese unai taudia edia kara idia tohotohoa. November, 1986 Gima Kohorona ena rau 22 dekenai, ia gwau: “Taunimanima idia haroro henidia neganai, idia ura idia diba, idia harorolaia herevana be sibodia edia lalohadai lasi, to ia be Bible ena amo. Unai dainai, bema mai dalana, Bible ena hereva be idia dekenai idia duahia toho.” Haroro gaukara dekenai oi ese Bible oi gaukaralaia namonamo, a?
BIBLE ENA NAMO
3 Dahaka dainai Bible ena hereva be namo? Badina ia be Dirava ena Hereva bona “iseda laloa bona iseda ura ibounai ia tahua diba.” (Heb. 4:12) Bible ena hereva momokani idia diba neganai taunimanima edia ura ia hedinarai. Kudou-maoro taudia ia veria idia abia dae totona. Haheitalai ta be inai: tau ta mai adavana be idia goada haraga Iehova ena hesiai gaukara dekenai, bona dahaka dainai idia be sivarai namona idia abia dae haraga idia henanadai henidia neganai, idia gwau: “Bible ena hereva dainai.” Idia vadivadi henia pablisa taudia ese edia lalona idia veria Bible ena hereva idia laloa totona, bona idia ese “naria tauna namona” ena gadona idia kamonai henia.—Ioane 10:14; w78 6/1 rau 22, 23.
4 Haroro gaukara dekenai, nega haida oi laloa Bible oi gaukaralaia namonamo lasi, a? Unai gaukara namona do oi karaia namonamo totona, gau badana be hanaihanai sibona oi stadi, oi hegaegae kongregesen hebou iboudiai totona bona hebou ta do oi reaia lasi, unai neganai goada do oi abia. (2 Tim. 3:16, 17) Haroro gaukara dekenai oi do ia bamoa tauna eiava ruma bese taudia ida Kiki Herevana umui karaia toho heheni diba. Danu, Reasoning buka ena rau 6-15 dekenai idia torea hamatamaia herevadia momo dekenai, Bible ena siri ta idia torea ita duahia totona. Namona be unai hamatamaia hereva haida oi karaia toho, ani? Namona be oiemu teritori dekenai taunimanima ia durua bona edia lalona ia veria herevana do oi gaukaralaia.
LALOA NAMONAMO
5 Nega haida ruma tauna ita durua diba sibona ena Bible do ia abia bona ita danu siri do ia duahia totona. To namona be ita laloa namonamo. (Reasoning buka, rau 67, par. 3; bona rau 279, par. 2.) Bema oi laloa hereva kwadogi sibona oi henia be ia namo, Kiki Herevana ena siri tamona sibona do oi duahia. Eiava bema oi itaia ruma tauna ia bisi, hereva kwadogina sibona do oi henia bona ruma tauna oi hamaoroa unai be Bible ena hereva. Iesu bona aposetolo taudia idia haroro neganai, idia ese Heberu Revarevadia edia kopi ta idia abia loaloa lasi. To, nega ibounai unai hereva be edia lalona amo idia gwauraia hedinarai. Namona be ita danu ita goada karaia Bible ena hereva be iseda lalohadai amo ita gwauraia hedinarai diba totona, badina unai neganai iseda haroro gaukara dekenai ita gwauraidia diba.
6 Paulo ese Timoteo ia sisiba henia “hereva momokani do [ia] hadibaia maoromaoro” totona. (2 Tim. 2:15) Hari inai negai unai sisiba be mai anina ita dekenai danu. Iesu bona aposetolo taudia edia kara ita tohotohoa totona, iseda haroro gaukara dekenai Bible ita gaukaralaia namonamo be gau badana. Dala ia kehoa neganai, Bible dekena amo siri ita duahia, to dala ia kehoa lasi neganai, iseda lalohadai amo do ita herevalaia. Bema unai bamona ita karaia neganai, do ia hedinarai goevagoeva ita be Dirava ena hesiai taudia bona iseda haroro herevana be iena Hereva amo.
[Questions]
1. (a) Iseda haroro gaukara dekenai, dahaka dainai Bible ita gaukaralaia be namo? (b) Paulo bona Apolo be Buka Helaga edena bamona idia gaukaralaia?
2. Iseda haroro gaukara dekenai, dahaka dainai Bible ita gaukaralaia namonamo be namo?
3. Dahaka dainai Bible ena hereva be namo?
4. Edena bamona haroro gaukara oi karaia namonamo diba?
5. (a) Edena negai ita laloa namonamo be gau badana? (b) Dahaka dainai Bible siridia be iseda lalohadai amo ita gwauraidia diba be namo?
6. Paulo ena sisiba 2 Timoteo 2:15 dekenai be edena bamona do ita badinaia namonamo diba?