Kongregesen Ena Buka Stadi
Kahana 1: Stadi Naria Tauna Ena Maduna
1 Kongregesen Buka Stadi be gau badana Iehova ena taunimanima be lauma dalanai idia tubu idia lao totona. Vaira huadia lalonai Kongregesen Buka Stadi ese ita ia durua daladia idauidau do ita kikilaia. Hari hua ena Iseda Basileia Gaukara pepana lalonai ita ura diba Kongregesen Buka Stadi naria tauna be dahaka ia karaia diba stadi herevana amo ita ia hagoadaia bona iseda abidadama ia hagoadaia totona.
2 Hadibaia gaukara do ia karaia namonamo totona, stadi naria tauna be ia hegaegae namonamo be gau badana. Ia ese Dirava ena Hereva ia stadilaia momo dainai, ia ese henanadai iboudiai edia haere ia diba, to unai sibona lasi, namona be haere idia maoro ena badina do ia diba danu. Namona be ia ura dikadika grup taudia iboudiai ia durudia haere edia badina idia diba totona. (1 Pet. 3:15) Unai ese ia durudia, stadi herevadia idia laloa bada totona.
STADI NARIA TAUNA IA TAHUA GAUDIA
3 Stadi naria tauna ia tahua gauna ta be inai: Ia ura stadi herevana ia gwauraia hedinarai grup taudia iboudiai edia abidadama ia hagoadaia totona, bona ia ura idia ia hasiahua Dirava ena gaukara karaia urana do idia habadaia totona. (Sal. 110:3; 2 Tes. 1:3-5) Unai bamona ia karaia totona, stadi naria tauna be nega ta ta dekenai stadi hereva ena anina ia habadaia grup taudia ia durudia edia abidadama Iehova dekenai, iena Hereva dekenai, bona iena orea dekenai idia habadaia totona. (Gal. 6:6, Ref, Bi. ftn.) Nega ia noho hegeregerena, ia ese henanadai namodia ma haida ia gaukaralaia diba abidadama hagoadaia herevadia idia gwauraia hedinarai totona.
4 Ia tahua gauna ma ta be inai: Ia ura grup taudia ibounai ia durudia stadi herevana idia gaukaralaia dalana idia diba totona. Edena bamona idia gaukaralaia diba haroro gaukara dekenai? Tadikaka bona kamonai matamata taudia idia hagoadaia totona? Edia ruma bese taudia bona sibodia idia hagoadaia totona? Kongregesen Buka Stadi naria taudia ese stadi ena hereva idia hegaegaelaia namonamo neganai, namona be grup taudia be edena bamona stadi ena hereva badadia idia gaukaralaia diba ia laloa namonamo.
5 Hereva haida idia gaukaralaia diba edia Witness lasi varavara taudia, sikuli turadia, eiava idia danu idia gaukara hebou taudia idia durudia totona. Hereva ma haida be idia gaukaralaia diba mai edia tomadiho rua ruma bese taudia, eiava tamana o sinana lasi ruma bese taudia durua totona. Stadi naria tauna be grup taudia edia lalona ia veria stadi hereva idia laloa namonamo totona bona badinaia dalana idia diba totona. Stadi naria tauna be henanadai bona haere dalana amo do ia karaia sibona be hegeregere lasi, to namona be grup taudia edia lalona ia veria danu stadi herevana idia moalelaia totona.—1 Korinto 14:9, 19 itaia danu.
IA HAHEDINARAIA IBOUDIAI IA URA DURUDIA
6 Grup taudia ta ta iboudiai ia durudia neganai, stadi naria tauna ese iboudiai ia hagoadaia diba haere idia henia totona. Idia gari taudia be hebou vairanai ia hamaorodia siri ta do idia duahia totona, eiava henanadai ta do ia henidia idia hegaegaelaia totona bona gabeai stadi lalonai idia haerelaia totona. Namona be grup taudia iboudiai be sibodia edia hereva amo do idia haere toho. Stadi naria tauna be edia haere ia kamonai henia namonamo, bona unai amo ia diba haida ese heduru ma idia abia be namo eiava lasi. Ia ese grup taudia goadadia ia abia hidi diba unai heduru be ma haida dekenai idia henia totona.
7 Kongregesen Buka Stadi be hahenamo gauna ta ita dekenai. Dala ia kehoa grup maragina dekenai ita hebou totona bona ita ta ta ibounai be heduru bada ita abia totona. Namo lasi ita laloa unai hebou ena namo be maragi to hebou badadia edia namo be bada. Emu Buka Stadi naria tauna be ena gaukara maduna ia laloa bada, unai dainai ia hekwarahi bada stadi herevana amo oi ia durua emu abidadama karana Iehova dekenai oi hagoadaia, bona Iehova ese oi ia henia gaudia oi lalodia bada totona.