Sivarai Namona Harorolaia—Nega Momo Ita Haroro Teritori Dekenai
1 Bema teritori ta dekenai nega momo ita haroro, hekwakwanai idia noho ita hanaia totona. Dahaka ita karaia taunimanima ese sivarai do idia ura kamonai henia totona? Bema haida idia gwau idia ura lasi idia kamonai, dahaka do ita gwau diba? Bema haida idia gwau ita be nega momo ita mai, dahaka do ita gwau diba?
HARORO GOADAGOADA
2 Ena be taunimanima haida idia diba lasi, to teritori ta dekenai nega momo ita haroro namonamo neganai, unai gaukara amo huahua momo ita abia, to ia lalonai ita haroro momo lasi teritori amo huahua haida sibona ita abia. Unai dainai, bema teritori ta dekenai taunimanima haida edia ruma dekenai ita lao nega momo ita haroro totona, namona be ita daradara lasi to ita haroro goadagoada. Taunimanima iboudiai be Basileia ena sivarai idia kamonai henia be gau badana. Namo lasi ita laloa kerere; bema ita laloa nega momo unai taudia ita haroro henidia vadaeni bona idia ura lasi dainai, Iehova ese ia hahemaoro henidia vadaeni, ita kerere.
3 Teritori ta dekenai nega momo ita haroro neganai, taunimanima dekenai hebogahisi karana ita hahedinaraia be gau badana. Bema ita harorolaia sivaraina be mai ena anina taunimanima idia noho gabuna dekenai, reana guna idia ura lasi kamonai taudia haida edia lalona do ita veria diba bena iseda hereva do idia kamonai henia. Taunimanima durudia totona namona be tanobada dekenai hari idia vara sivaraidia oi diba, bona namona be oi hegaegae bena taunimanima do oi hadibaia diba Bible ena sivarai be edena bamona idia ia durudia diba edia hekwakwanai idia hanaia totona.
HAMATAMAIA HEREVA IDAUIDAU GAUKARALAIA
4 Teritori ta dekenai nega momo oi haroro neganai, namona be hamatamaia hereva idauidau oi gaukaralaidia. Nega ta, hamatamaia herevana dekenai reana pepapepa ta do oi gaukaralaia diba. Ma nega ta ai, Reasoning buka ena rau 9-15 dekenai idia torea hamatamaia herevadia ta be reana do ia namo oiemu teritori dekenai oi gaukaralaia totona. Guna unai gabu dekenai oi haroro be reana ruma tauna dekenai do oi gwauraia; unai neganai, reana unai hereva idia gwauraia lasi oi idia dadaraia totona. Guna oi lao henidia ruma taudia idia gwauraia diba hereva badadia oi laloatao. Gabeai idia dekenai ma oi hereva henidia neganai, unai hereva oi habadaia diba bena reana edia lalona do oi veria diba umui kiki hebou totona.
5 Namona be taunimanima ita lalodia Iehova ese ia lalodia bamona, bona ena be taunimanima idia gwau idia ura lasi kamonai, to namona be ita hahedinaraia edia namo ita tahua noho. Ena be idau negai Israel taudia idia ura lasi idia kamonai, to Iehova be nega momo iena bese taudia dekenai iena hesiai taudia ia siaidia idia ia durua toho totona. (2 Sis. 36:15; Ier. 7:13) Guna, taunimanima haida idia laloa idia ura lasi idia kamonai, to hari unai taudia momo be iseda Keristen tadikaka bona taihu. Witness taudia idia dagedage henia bada taudia danu idia durudia bena hereva momokani idia abia dae. Hari, idia moale badina sivarai namona harorolaia taudia be mai haheauka danu idia vadivadi henidia loulou.
GAUKARA TOREA NAMONAMO
6 Ruma ta ruma ta gaukara ena kadi oi torea be gau badana. Bema oi ura teritori dekenai taunimanima iboudiai oi davaria, taunimanima be ruma dekenai oi davaria lasi neganai, do oi giroa idia oi tahua totona. Unai dala amo, unai teritori dekenai ma idia haroro ena nega do oi hadaudaua sisina. Haida idia davaria dala namona be pura lalonai sibona idia haroro taudia bona Saturday bona Sunday sibona idia haroro taudia be taunimanima idia davaria lasi rumadia idia torea edia ruma ta ruma ta kadi dekenai, bena unai kadi idia henia hanai heheni. Unai anina be nega idauna dekenai ruma ita vadivadi henidia diba. Unai bamona ita karaia neganai, bema pura iboudiai dina ena hora haida eiava dina haida lalonai ruma taudia be edia ruma dekenai idia noho lasi, unai taudia be reana ita davaria diba.
7 Bema ita hekwarahi bada kamonai taudia iboudiai ita hereva henidia totona, Iehova be unai kara ia itaia. Keriso ena hakaua siahuna henunai iena hereva ita badinaia noho, bona ita diba ia henia negana lalonai unai gaukara do ita hagugurua diba.—Esek. 9:11.
[Questions]
1. Teritori ta dekenai nega momo ita haroro neganai, do ita hanaia hekwakwanaidia be dahaka?
2. Teritori ta dekenai nega momo ita haroro neganai, namona be iseda lalohadai be dahaka?
3. Dahaka dainai tanobada ena sivarai ita diba be namo?
4. Ruma taudia edia lalona veria totona, dahaka ita karaia diba?
5. Hari, dahaka dainai tadikaka bona taihu momo idia moale?
6. Dahaka dainai pablisa iboudiai be taunimanima idia davaria lasi neganai, unai ruma edia namba idia toredia be gau badana?