Kudouna Ibounai Ida Hesiai Gaukara Ita Karaia
Kahana 4: Hesiai Gaukara Karaia Namonamo Totona Ita Hegaegae
1 Haroro gaukara be mai iseda ura ibounai ita karaia totona namona be gau iboudiai ita karaia namonamo. Iesu be haheitalai namona hari inai negai iseda hesiai gaukara ita karaia totona. (Luka 10:1, 2; Kara 1:8) Danu Keristen taudia ginigunadia edia nega lalonai iena hahediba taudia be edia hesiai gaukara idia karaia dalana amo ita be diba ita abia. (Kara 5:42; 2 Tim. 4:5) To hari inai nega ai edena dala ai oi karaia dalana oi hanamoa diba bona Iesu ena hahediba taudia bamona anina oi havaraia diba?
2 Haroro Gaukara Totona Sediual Oi Karaia: Iseda hesiai gaukara be iseda mauri lalonai nega haida sibona ita karaia gauna lasi, bona ia be ita karaia kava gauna lasi. Iseda hesiai gaukara karaia totona nega do ita abia kava diba lasi. Iseda hesiai gaukara ita karaia namonamo bona anina ita havaraia totona, namona be ena gaukara idauidau totona sediual ita karaia. (Ef. 5:15, 16) Pablisa momo be hua ta ta iboudiai lalonai haroro totona hora hida do idia karaia idia makaia guna, bona unai kara ese ia durudia. Unai idia karaia totona nega momo idia be sediual idia karaia wiki ta ta ibounai lalonai haroro gaukara idia karaia totona. Keristen tama sina taudia be edia natudia idia durudia be namo, nega ibounai haroro gaukara daladia idauidau idia karaia totona.—Deut. 6:7; Her. 22:6.
3 Tahua Gaudia Oi Makaia: Oi karaia diba gaudia oi tahua neganai, gau ta totona oi gaukara diba. Oi tahua gaudia oi davaria neganai, oi karaia dainai do oi moale. (Her. 13:12) Aposetolo Paulo be inai sisiba ia henia, ia gwau: “Gau badana be inai: guna ita abia dae dalana do ita badinaia noho be namo.” (Fil. 3:16) Oiemu dala iboudiai lauma dalana dekenai hegeregerena, namona be oiemu haroro gaukara ese ia hahedinaraia oi be gau iboudiai oi karaia namonamo.
4 Hegeregere, pepapepa momo be oi dekenai idia noho oi haria totona, a? Magasin matamata momo be oi dekenai idia noho oi haridia totona bona edia toana ia namo, a? Ruma ta ruma ta gaukara lalonai gabu oi makaia totona pepa be oi dekenai idia noho, pepa ta dekenai kamonai taudia edia ladana oi torea bona ma pepa ta dekenai bema ruma haida dekenai taunimanima oi davaria lasi oi torea totona, a?
5 Haroro totona ita do lao lasi neganai, namona be hari hua ena Kiki Herevana oi laloa lou guna. Henia gauna ena hereva haida oi laloa, bona oi hegaegae unai hereva oi gwauraia namonamo taunimanima idia kamonai totona. Danu, haroro gaukara durua bukana, Reasoning From the Scriptures, amo oi hegaegae. Ruma ta oi rakatania neganai bona ma ruma ta ai oi do lao lasi neganai oi be unai buka ena hereva haida oi itaia haraga diba. Unai durua herevadia oi gaukaralaia neganai, oiemu hesiai gaukara ena anina do oi habadaia diba.
6 Inai dina dokodia lalonai “Dirava ena Sivarai Namona [ita] harorolaia” be gaukara namona mai ena hahenamo momo. (Roma 15:16) Namona be ita gaukara goadagoada, iseda hesiai gaukara ita hagugurua totona bona ‘iseda uduna bibina ena anina’ ita henia totona. (Heb. 13:15; Hosea 14:2 itaia danu.) Unai ita karaia totona, namona be nega ibounai haroro ena sediual ita karaia bona iseda hesiai gaukara do ita hagugurua diba bena Iehova do ita hanamoa totona ita karaia diba gaudia ita tahua.
[Questions]
1. Bible siri haida oi gwauraia, idia hahedinaraia Iesu bona iena hahediba taudia be gau iboudiai idia karaia namonamo edia haroro gaukara idia karaia namonamo totona.
2. (a) Efeso 5:15, 16 duahia. Badina be dahaka haroro gaukara karadia idauidau ita karaia totona sediual ita karaia be namo? (b) Deuteronomi 6:7 bona Hereva Lada-isidia 22:6 edia hereva hegeregerena, Keristen tama sina edia gaukara namona bona maduna be dahaka?
3. (a) Filipi 3:16 duahia. Paulo ese dahaka sisiba ia henia ita ia hagoadaia totona? (b) Hereva Lada-isidia 13:12 duahia. Oiemu haroro gaukara dekenai oi makaia tahua gaudia oi karaia neganai, dahaka ia vara? (c) Dahaka ese do ia hahedinaraia iseda haroro gaukara dekenai gau iboudiai ita karaia namonamo eiava lasi?
4. Haroro totona ita do lao lasi neganai, dahaka gaudia ita hegaegaelaidia guna?
5. (a) Ita do lao lasi haroro neganai ma dahaka gaudia ita hegaegaelaia guna be namo? (b) Edena dala ai Reasoning bukana ese iseda hesiai gaukara ia durua diba?
6. (a) Inai dina dokodia lalonai iseda gaukara namona mai ena hahenamo momo be dahaka? (b) Oiemu mauri lalonai oi laloa dahaka oi tahua guna be namo? (c) Heberu 13:15 ena hereva hegeregerena, ‘iseda uduna bibina ena anina’ be dahaka? Iseda haroro gaukara ita hanamoa totona, dahaka gau badadia haida ita laloatao be namo?