Kudouna Ibounai Ida Hesiai Gaukara Ita Karaia
Kahana 5: Hesiai Gaukara amo Idia Vara Gau Namodia
1 Kudouna ibounai ida iena hesiai gaukara idia karaia taudia dekenai Iehova ese hahenamo momo ia henidia. (Sal. 116:12) Iseda hesiai gaukara dekenai, Iehova ia henia hahenamo bada be edena bamona do ita abia diba? Dahaka hahenamo do ita abia diba? Ita ia lalo-namo henia bona ita ia hanamoa totona, dahaka do ita karaia be gau badana?
2 Oi Hekwarahi be Namo: Bema oi hekwarahi bada Dirava ena ura oi karaia totona, Dirava dekena amo hahenamo bada do oi abia. Hesiai gaukara ia herevalaia neganai, Paulo ia gwau: “Dirava ese ta ta edia gaukara davana do ia henia, edia hekwarahi hegeregerena.” (1 Kor. 3:8) Unai dainai, namona be iseda goada ibounai ida hesiai gaukara do ita karaia. Aposetolo Paulo ese taunimanima momo bona kongregesen haida danu ia durudia Dirava idia diba totona; unai be hahenamo bada ia dekenai. Abidadama dekenai idia gini goada ia itaia neganai ia moale bada herea! (1 Tes. 2:19, 20) Paulo be iena nega bada hesiai gaukara dekenai ia negea diba, to reana oi be ia bamona oi karaia diba lasi. To, bema mamoe bamona tauna ta eiava ruma besena ta oi durua diba, mauri dalana dekenai idia raka totona, unai be hahenamo badana ta oi dekenai, ani? Unai ese ita ia hagoadaia ruma ta ruma ta gaukara, lou-henia bona Bible stadi gaukara dekenai ita hekwarahi totona!
3 Ma Hahenamo Haida: Kudouna ibounai ida hesiai gaukara ita karaia ena hahenamo ma ta be, Iehova bona Iesu Keriso danu ita gaukara hebou dainai, ita ia veria idia kahirakahira dekenai ita noho totona. (Mat. 11:29, 30; 1 Kor. 3:9) Hesiai gaukara dekenai Dirava ena lauma helaga ese ita ia durua ena mamina ita abia neganai, unai be moale gauna badana! (Mat. 10:20; Ioane 14:26) Ma danu, kongregesen taudia ida ita gaukara hebou goadagoada neganai, unai ese iseda lalokau bona lalo-tamona karana ia hagoadaia.
4 Hari inai nega dokona lalonai, Iehova ese orea ta ia gaukaralaia iena ura ia karaia totona; bema unai orea ena hereva ita badinaia lasi, Iehova dekena amo hahenamo momo do ita abia diba lasi. (2 Hanua Pavapavadia 10:15 itaia.) Dirava ese ia abia hidi oreana dekena amo heduru hereva ita abia neganai, bona iseda kudouna ibounai ida unai hereva ita badinaia namonamo neganai, Satana ena hedibagani ese lauma dalanai ita do idia hadikaia diba lasi. Unai neganai, iseda hesiai gaukara do ita karaia namonamo diba.
5 Inai kahana 5 sivaraidia lalonai, kudouna ibounai ida hesiai gaukara ita karaia ena hereva badadia idia kikilaidia. Inai hereva oi lalodia tao, a?
a. Dahaka gaudia ese ita idia durua, Iehova ita laloa bada totona bona iseda kudouna ibounai ida hesiai gaukara ita karaia totona?—Mat. 22:37-39; Heb. 10:24, 25. (Iseda Basileia Gaukara, October 7, 1991 ai ia matamaia purana oi itaia.)
b. Dahaka dainai hegaegae be gau badana iseda hesiai gaukara ena moale ita habadaia totona? Edena bamona ita hegaegae diba?—Ioane 2:17. (Iseda Basileia Gaukara, November 11, 1991 ai ia matamaia purana oi itaia.)
c. Pablisa goadadia be edena bamona ma haida idia durudia diba mai edia kudouna ibounai ida idia gaukara totona?—Ef. 5:15, 16. (Iseda Basileia Gaukara, January 6, 1992 ai ia matamaia purana oi itaia.)
Unai heduru herevadia oi karaia toho, a?
6 Iehova ia ura iena hereva ita badinaia karana dainai namo do ita davaria. (Isa. 48:17) Danu, kudouna ibounai ida hesiai gaukara ita karaia neganai, ita idia kamonai henia taudia ese hahenamo do idia davaria danu. (1 Tim. 4:15, 16) Bema ita be mai goada danu ita gaukara, “davana namona [ita] do ia henia,” unai be mauri hanaihanai.—Kol. 3:23, 24.
[Questions]
1. Salamo 116:12 duahia. Unai hahenamo ita abia dainai, ita ta ta ibounai be sibona dekenai dahaka henanadai do ita henia be namo?
2. (a) Korinto Ginigunana 3:8 ia gwauraia hereva momokanina be dahaka? (b) Aposetolo Paulo ese ia davaria hahenamodia be dahaka? (c) Dahaka ese ita ia hagoadaia kudouna ibounai ida hesiai gaukara do ita karaia totona?
3. Kudouna ibounai ida Iehova ena hesiai gaukara ita karaia neganai, dahaka hahenamo toi ita abia? Bible siri dekena amo oi hamomokania.
4. Iehova ena orea danu ita gaukara hebou goadagoada neganai dahaka hahenamo ita abia?
5, 6. Kolose 3:23, 24 ena hereva amo dahaka ita diba?