Lalona Veria Hamatamaia Herevadia
1 Iesu be hamatamaia herevadia namodia ia gaukaralaia tauna hereadaena. Taunimanima hutuma eiava tau tamona ia hereva henia neganai, idia ura idia kamonai badina idia ia laloa bada mamina idia abia. Iena hereva ena namo idia dekenai ia hahedinaraia.—Mat. 5:3-12, NW; Ioa. 4:7-30.
2 Oi Hegaegaelaia be Namo: Taunimanima be sivarai idia kamonai urana habadaia totona, iseda hamatamaia herevadia amo do ita hahedinaraia edia hekwakwanai bona idia ita laloa bada, bona Basileia ena sivarai ese idia do ia durua.
3 Haroro totona ita hegaegae neganai, taunimanima idia lalo-hekwarahilaia gaudia ita laloa. Niusi lalonai gau ta idia kikilaia momo, a? Matamata taudia idia ura kikilaia gaudia be dahaka? Buruka taudia idia ura kikilaia gaudia be dahaka? Idia headava tatau, hahine, eiava tama sina dekenai, dahaka do oi herevalaia? Namo lasi hamatamaia hereva tamona sibona ita gaukaralaia, haida oi hegaegaelaia bona ruma tauna ena toana oi itaia neganai emu hereva oi haidaua diba. Pablisa haida be Buka Helaga Herevalaia bukana idia gaukaralaia edia ruma-ta-ruma-ta hamatamaia herevadia idia hegaegaelaia neganai. (rs-MO rau 9-17) Unai amo edia hamatamaia herevadia do idia namo noho bona idia hesikulaia lasi.
4 July lalonai, reana inai bamona hamatamaia herevana do oi ura gaukaralaia:
◼ “Daba namona. Hari dina, ai be emu dekena taudia ida ai herevahereva bona edena bamona lohia taudia idia ura henia ai kikilaia. Lohia taudia dekenai, edena kara ta o kara rua oi laloa be mai anina bada? [Haere naria. Iena hereva kamonaia. Bema ia hereva maoro oi gwau maoro.] Baibel ese taunimanima lohiaia gwaumaorona ia abia Tauna ena kara ia herevalaia, unai oi duahia vadaeni, a? Isaia 9:6, 7 lalonai ia noho. [Duahia.] Unai bamona biaguna henunai oi noho neganai, oiemu mauri be edena bamona?” Haere oi naria bena Salamo 146:3, 4 bona Buka Helaga Herevalaia bukana, rau 131-2 amo ese Iesu henunai ita noho namo gwauhamatadia oi kikilaia. Eiava Mauri Hanaihanai bukana, rau 112 bona 113 oi gaukaralaia kiki hamatamaia totona. Bema ia kamonai namonamo, reana unai buka oi hariharilaia.
5 Bema idia be mai edia ruma bese, Mauri Hanaihanai buka oi hariharilaia neganai, reana inai hamatamaia herevana do ia namo.
Oi hanamoa henia murinai, reana oi gwau:
◼ “Oi laloa dina ta ta ena metau bona hekwakwanai haheaukalaia totona famili momo be hari idia hekwarahi bada, a? [Haere naria.] Sisiba namona abia totona, edeseniai oi laloa idia lao be namo? [Haere naria.] Ai ura Baibel ia gwauraia gaudia oi itaia. Headava ia Havaraia Tauna ena hereva Adamu bona Heva dekenai mani oi itaia.” Genese 1:28 duahia bona Mauri Hanaihanai bukana oi kehoa rau 238 dekenai bona karoa 29 ena hereva haida amo emui herevahereva oi habadaia.
6 Iesu ena hamatamaia herevadia ia karaia dalana ita tohotohoa bona kamonai taudia edia hereva kamonai karana amo, kudou namo taudia dekenai lauma gaudia edia namo ena bada ita hahedinaraia.
This article is repeated in km 12/95.