Mauri Hanaihanai Buka Hariharilaia Hamatamaia Hereva Namodia
1 Iesu ena hamatamaia herevadia be mai aonega danu ia karaia. Ia diba dahaka do ia hereva taunimanima edia lalona veria totona. Nega ta Samaria hahine ta dekenai ranu totona ia noinoi, unai amo ena hereva ia matamaia. Unai ese Samaria hahine ena lalona ia veria badina ‘Iuda bona Samaria taudia be idia turana karaia lasi.’ Bena idia herevalaia gaudia ese ia bona ma haida ia durudia Iesu idia abidadama henia totona. (Ioa. 4:7-9, 41) Iesu ena kara amo diba ita abia diba.
2 Mauri Hanaihanai buka hariharilaia totona oi hegaegae neganai, oi sibona inai henanadai oi laloa, ‘Teritori dekenai idia noho taudia ese dahaka gaudia idia laloa momo? Matamata taudia, taunimanima badadia, tau ta, eiava hahine ta ese dahaka hereva do idia ura kamonai?’ Oi ese hamatamaia hereva haida oi hegaegaelaidia diba, bena daika oi davaria hegeregerena ta oi gaukaralaia diba.
3 Ruma bese edia mauri ia dika ia lao dainai momo idia lalohisihisi, unai dainai oi hereva:
◼ “Dina ta ta edia hekwarahi ese ruma bese lalonai lalo-metau ia havaraia. Edeseni amo heduru idia abia diba? [Haere oi naria.] Baibel be ita ia durua bada diba. [2 Timoteo 3:16, 17 duahia.] Baibel lalonai sisiba namodia idia noho ruma bese durua totona. Mani inai buka Mauri Hanaihanai Paradaiso Lalonai ena rau 238, paragraf 3 ena hereva oi kamonaia.” Paragraf 3 oi duahia bena buka oi hariharilaia.
4 Bema unuseniai ia vara sivarai ta oi gaukaralaia, inai bamona oi hereva:
◼ “Niusi dekenai [unuseni ia vara sivarai gwauraia] oi kamonai, a? Dahaka oi laloa unai gauna dekenai? [Haere oi naria.] Reana oi laloa inai tanobada be ia dika ia lao bona hanamoa dalana be lasi, ani? Baibel ese unai bamona kara ia gwauraidia toa, idia hahedinaraia ita be nega dokona lalonai ita noho.” Bena Mauri Hanaihanai buka lalonai rau 150-3 ena hereva umui kikilaia.
5 Momo be kara dika ia bada dainai idia lalohisihisi. “Herevalaia” buka ena rau 16 ai, “Taravatu Utua Karadia/Noho Namo” henunai ia noho hereva ginigunana oi gaukaralaia.
◼ “Do ita noho namo dalana be taunimanima ida ai herevalaia. Raskol karadia bona taravatu utua karadia ma haida be bada, bona unai ese iseda noho ia hadikaia, ani? Oi laloa dahaka ia vara be namo bena gari lasi ida dala dekenai ita loaloa diba?” Salamo 37:10, 11 oi duahia diba, bena Mauri Hanaihanai buka rau 156-8 lalonai Dirava ena Basileia ese do ia havaraia hahenamo oi gwauraidia.
6 Auka lasi hamatamaia hereva “Herevalaia” buka ena rau 15 ai oi gaukaralaia:
◼ “Ai be taunimanima ai hagoadaia, Baibel ese ia gwauraia, gabeai do ia vara nega namo hereana, do idia laloa totona. [Apokalupo 21:3, 4 duahia.] Unai hereva oi moalelaia, a? [Haere oi naria.] Inai buka ena karoa 19 ese Dirava ena Basileia ena hahenamo kamonai taudia dekenai ia gwauraia.” Bema idia ura, Mauri Hanaihanai buka oi hariharilaia.
7 Hamatamaia hereva namona oi hegaegaelaia neganai, kara maoromaoro totona idia hitolo noho taudia do oi durudia diba.—Mat. 5:6.
This article is repeated in km 6/95.