Iesu ese Davana Ia Henia Karana Ita Moalelaia
1 Herevana ita be edena gabu amo, to iseda turana ta eiava varavarana ta ia mase neganai, vaia ita ibounai be hemataurai karana ita hahedinaraia. Bema iseda lalokau tauna be ia mase haida ia hamauridia totona, unai tau do ita mataurai henia bada. Mauri hanaihanai ena helaro idia abia taudia iboudiai be April 6 ai, Keriso ena mase hahelagaia totona, Memorial hebouna dekenai do idia lao neganai, edia hemataurai bada karana idia hahedinaraia diba.—2 Kor. 5:14; 1 Ioane 2:2.
2 Iehova Ena Lalokau Moalelaia: Ita ia Durua Bada Tauna, Iehova Dirava, ita moalelaia be maoro, badina ia ese dala ia kehoa Iesu ese davana ia henia totona! (1 Ioane 4:9, 10) Iehova be dala ia kehoa neganai Iesu ese davana ia henia totona, ia ese hariharibada gauna ita ia henia, bona unai ese iena lalokau ena bada ia hahedinaraia, badina kara maoromaoro aneruna ta ia abia hidi lasi, to iena lalokau Natuna tamona sibona ia abia hidi unai davana ia henia totona. (Her. 8:22, 30) Unai Natuna, Iesu Keriso, be Iehova ia diba namo herea, bona ita dekenai ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.”—Ioane 3:16.
3 Iesu Keriso Ena Lalokau Moalelaia: Danu, namona be Iesu Keriso ita moalelaia, badina iena mauri ia henia taunimanima iboudiai do idia mauri diba totona. (Mat. 20:28) Iehova ena ura hegeregerena, Iesu ese mai ena ura danu davana ia henia neganai, iena lalokau ia hahedinaraia bada. Ena be ia diba mai edia kara dika taudia huanai do ia noho bona edia siahu henunai do ia noho, bona ia diba mauri davana henia totona do ia mase, to unai gaudia ia laloa lasi. Bena “iena dagi badana ia negea, bona hesiai tauna momokani ia lao. Ia be taunimanima hegeregerena ia vara, bona taunimanima edia toana ia abia. Oibe, . . . ia manau momokani. Bona ia ese Dirava ia kamonai henia ela bona ia mase, oibe, satauro dekenai ia mase.”—Fil. 2:5-8.
4 Iesu ese Davana Ia Henia Karana Ita Moalelaia be Edena Bamona Ita Hahedinaraia Diba?: Iesu ese davana ia henia karana ita moalelaia ita hahedinaraia totona, tanikiu herevana sibona ita gwauraia be hegeregere lasi. Iesu Keriso dekena amo Dirava ese ia kehoa hahemauri dalana do ita diba be gau badana. (Ioane 17:3) Bena murinai Iesu ese davana ia henia karana be mai abidadama danu ita abia dae. (Kara 3:19) Ma danu, gwauhamata bona bapatiso karadia amo iseda mauri be Iehova Dirava dekenai do ita henia be gau badana. (Mat. 16:24) Iseda mauri dekenai iseda gwauhamata herevana ita hagugurua noho lalonai, gau badana be nega ita hoia, taunimanima dekenai Iesu ese davana ia henia karana namona amo hahemauri dalana ita harorolaia totona.—Roma 10:10.
5 Ita ibounai be unai kara ita karaia diba. Mika 6:8 ia gwau: “Ia ese umui ia hamaoroa, kara namona be dahaka, Iehova ena ura umui dekenai be dahaka. Inai sibona: umui hahemaoro maoromaoro, hebogahisi umui ura henia, bona emui Dirava ida do umui raka hebou mai emui manau ida, ani?” Unai hegeregerena, David be Iehova dekenai ia gwau: “Gau iboudiai be oiemu amo idia mai, bona oi sibona emu gau be ma ai henia lou oi dekenai.”—1 Sis. 29:14.
6 Iehova ese ia kehoa dala namona dainai iseda moale ita habadaia totona, namona be Memorial dinana ia do ginidae lasi neganai, iseda ruma bese taudia ida Tau Hereadaena buka ena karoa 112 ia lao 126 ita duahidia, ani? Unai dala amo ita ibounai ese iseda lalona ita hegaegaelaia diba, bona April 6, 1993 ai, Memorial hebouna dekenai, Iesu ese mauri davana ia henia karana dainai iseda moale ita hahedinaraia diba.