Henanadai

◼ Edena bamona heduru pioneer gaukara ita laloa?

Heduru pioneer gaukara be hahenamo ta bona maduna ta. Pablisa taudia tausen tausen momo be hua ta ta ai idia abidia hidi heduru pioneer gaukara idia karaia totona, bona haida be hanaihanai unai gaukara idia karaia. Unai gaukara goadagoada pablisa ai hanamodia, badina hua ta ta ai heduru pioneer gaukara idia karaia neganai hora 60 idia karaia haroro gaukara dekenai. Namona be heduru pioneer idia karaia pablisa taudia be elda taudia bona haida ese idia durudia edia gaukara idia laloa bada totona.

Regular pioneer taudia, bona hua ta eiava hua haida lalonai heduru pioneer gaukara idia karaia taudia ese unai gaukara ena metau idia laloa namonamo guna be namo. (Luka 14:28) Namona be haroro gaukara dekenai do idia hagugurua hora idia laloa namonamo, namo lasi edia Keristen maduna haida do idia huaia namonamo lasi. Bema ta ia ura heduru pioneer gaukara ia karaia neganai, namona be ia guriguri guna bona ia hegeregere ia karaia totona. Namo lasi haida idia karaia dainai, ia danu ia ura karaia. Namona be mai ena badina namona dainai ia karaia, sediual ia karaia hegeregerena ia hagugurua be namo. Namona be aplikeisen pepana dekenai idia torea gaudia ia duahia namonamo, bona sibona ena kudouna amo ena lalona ia hadaia, bona mai momokani ida unai gaukara ia hagugurua.

Momokani, oi hekwarahi danu. Hua haida be momokani sivarai namona idia ‘harorolaia goada noho totona.’ (Kara 18:5) Memorial ena nega March bona April ai, bona sekit tauna ese kongregesen ia vadivadi henia neganai be nega namodia danu. Pablisa momo be mai moale danu edia sediual karaia unai nega lalodiai haroro gaukara idia karaia totona, idia diba unai amo hahenamo bada do idia abia. (2 Kor. 9:6) Pablisa momo be edia laga-ani huadia ai nega idia atoa pioneer gaukara idia karaia totona, eiava Saturday bona Sunday ima ena hua lalonai idia karaia. Pioneer pepana idia sainia neganai, namona be edia hereva “Oibe” do idia badinaia, bona heduru pioneer gaukara idia karaia neganai, idia gaukara goadagoada hora 60 idia abia totona.​—Mat. 5:37.

Pioneer gaukara idia karaia diba lasi pablisa taudia be heduru pioneer idia karaia taudia ida idia gaukara hebou diba, idia danu nega idia gwauhamatalaia idia gaukara hebou totona. Pioneer taudia ida haroro gaukara dekenai nega daudau ita gaukara neganai idia ita durudia bada. Bema pablisa taudia ese pioneer taudia daba momokani ai, bona adorahi ai idia durudia neganai do idia moale bada. Heduru pioneer taudia ita boiridia ita idia bamoa iseda lou-henia bona Baibel stadi hamatamaia gaukarana dekenai, unai neganai do idia moale danu. Heduru pioneer taudia idia durua taudia be henia karana idia karaia dainai moale bada do idia davaria.​—Kara 20:35.

Heduru pioneer taudia idia gaukara goada dainai ita hanamodia. Idia danu idia gaukara hebou taudia ese hahenamo bada do idia abia danu. (Her. 10:4) Edena negai heduru pioneer gaukara lalonai oi vareai diba gaukara oi habadaia totona, a?